Boloka

Dithero tše Šišintšwego Bakeng sa Tirelo ya Tšhemo

Kamoo o ka Dirišago Pampiri ye ya ka Gare

Bontši bja dithero tše latelago di ile tša tšwelela ka ditokollong tša nakong e fetilego tša Tirelo ya Rena ya Mmušo. Leka go diriša tše dintši kamoo o ka ratago ka gona modirong wa gago wa go nea bohlatse, gomme o bone gore ke mafelelo afe ao o bago le ona. Boloka pampiri ye ya ka gare, gomme o dire ditšhupetšo go yona ge o lokišetša bakeng sa bodiredi.

O ka tsoša kgahlego ya motho ya go kgahlegela Lentšu la Modimo ge e ba o tsena tabeng ka ntle le go dika-dika. Rotoša potšišo e itšego, ke moka o bale Lengwalo le le kopana la go araba. O ka leka ditšhišinyo tše:

“Ge o dutše o nagana ka bokamoso, na o ikwa o e-na le kholofelo goba o belaela? [Dumelela karabo.] Beibele e boletše e sa le pele ka ditiragalo tše ferekanyago tšeo re di bonago lehono gaešita le mafelelo a tšona.”—2 Tim. 3:1, 2, 5; Die. 2:21, 22.

“Go na le go tshwenyega mo go golo kudu ka tlhokomelo ya tša maphelo mehleng yeno. Na o be o tseba gore Modimo o holofetša gore o tla rarollela sa ruri mathata ka moka a tša maphelo?”—Jes. 33:24; Kut. 21:3, 4.

“Na o be o tseba gore Beibele e boletše e sa le pele gore go tla ba le mmušo o tee feela wo o tlago go buša lefaseng ka moka?”—Dan. 2:44; Mat. 6:9, 10.

“O nagana gore maemo e be e tla ba afe ge nkabe Jesu Kriste a be a buša lefase?”—Ps. 72:7, 8.

“Batho ba bantši ba tlaišwa ke kgethollo ka baka la bong bja bona, bodumedi goba morafo. O nagana gore Modimo o ikwa bjang ka kgethollo e bjalo?”—Dit. 10:34, 35.

“Re a tseba gore Jesu Kriste o ile a dira mehlolo e mentši mehleng ya gagwe. Ge e ba o be o ka kgona go mo kgopela gore a dire mohlolo o mongwe, e be e tla ba ofe?”—Ps. 72:12-14, 16.

“Batho ba bantši ba lapišitšwe ke go kwa ka mathata. Ba nyaka go kwa ka ditharollo. Eupša re ka hwetša kae ditharallo tša kgonthe mathateng a rena?”—2 Tim. 3:16, 17.

“Na o ka hlaola Mmušo woo o o rapelelago Thapelong ya Morena (goba, ya Tata Wešo)?”—Kut. 11:15.

Dilo Tšeo di ka Thomago Poledišano

Lelokelelo la dipotšišo tšeo di lego ka mo tlase, le tšerwe dihlogong tše di lego ka pukung ya Go Boledišana, le bontšha nomoro ya letlakala ka gare ga puku moo karabo e nngwe le e nngwe e ka hwetšwago gona:

Ke ka baka la’ng re tšofala gomme re e-hwa? (rs 248)

Boemo bja bahu ke bofe? (rs 249)

Na go na le mabaka ao a kwagalago a go dumela go Modimo? (rs 332)

Na Modimo ruri o hlokomela seo se diregago go rena batho? (rs 333)

Na Modimo ke motho wa kgonthe? (rs 334)

Na batho ba go loka ka moka ba ya legodimong? (rs 241)

Na motho o swanetše go ya legodimong e le gore a tle a be le bokamoso bjo bo thabišago e le ka kgonthe? (rs 242)

Ke ka baka la’ng e le gabohlokwa go tseba le go diriša leina la Modimo? (rs 210)

Na Jesu Kriste ruri ke Modimo? (rs 215)

Mmušo wa Modimo o tla dira’ng? (rs 325)

Morero wa bophelo bja motho ke ofe? (rs 101)

Ke eng yeo e ka thušago go kaonefatša lenyalo? (rs 259)

Na bodumedi ka moka bo amogelwa ke Modimo? (rs 63)

Motho a ka tseba bjang bodumedi bjo bo nepagetšego? (rs 68)

Sathane o na le matla gakaaka’ng lefaseng la lehono? (rs 392)

Ke ka baka la’ng Modimo a dumeletše mahloko? (rs 279)

Ke ka baka la’ng go e-na le bokgopo bjo bontši gakaakaa? (rs 91)

Ke mang yo a bušago lefase le, ruri na ke Modimo goba Sathane? (rs 238)

Ditšhišinyo tša ge go Sepedišwa Poroutšha ya Seo Modimo a se Nyakago

“Ka ntle le pelaelo o tla dumela gore batho ba bantši ba dumela go Modimo. Bohle bao ba dumelago go yena ba a dumela gore Modimo o nyaka se sengwe go bona. Seo batho ba sa dumelelanego ka sona ke gore, Ke eng seo Modimo a se nyakago go rena?” Ke moka bontšha poroutšha ya Seo Modimo a se Nyakago, phetla go thuto 1, gomme o e ahla-ahle.

“Ka baka la mathata a mantši gakaakaa bophelong bja lapa lehono, na o kile wa ipotšiša gore sephiri sa go fihlelela lethabo la lapa ke sefe?” Ka morago ga karabo, hlalosa gore Modimo o utolla sephiri sa kgonthe sa lethabo la lapa ka Beibeleng. Bala Jesaya 48:17. Ke moka, phetla go thuto 8 ka go poroutšha ya Seo Modimo a se Nyakago, gomme o šupe go tše dingwe tša ditemana tša Beibele tšeo di bontšhitšwego tše di neago tlhahlo e botegago bakeng sa setho se sengwe le se sengwe sa lapa. Bala lelokelelo la dipotšišo tšeo di lego mathomong a thuto. Botšiša ge e ba motho a ka rata go bala dikarabo.

“Poroutšha ye e na le lenaneo la thuto le le tletšego leo le akaretšago dithuto tša motheo tša Beibele. Letlakaleng le lengwe le le lengwe, o tla hwetša dikarabo tša dipotšišo tšeo di ilego tša tshwenya batho ka nywaga-kgolo e mentši. Ka mohlala, morero wa Modimo ka lefase ke ofe?” Phetla go thuto 5, gomme o bale dipotšišo mathomong a thuto. Botšiša mong wa ntlo gore ke efe yeo e mo kgahlago kudu, gomme o bale (di)serapa seo se sepedišanago le yona, o lebelela mangwalo ao a swanetšego. Hlalosa gore dikarabo tše di kgotsofatšago dipotšišong tše dingwe di ka hwetšwa gabonolo feela go swana le tša potšišo yona ye. Bolela gore o tla boa gape bakeng sa go tla go ahla-ahla potšišo e nngwe.

“O nagana gore ke ka baka la’ng go e-na le bošoro bjo bontši gakaakaa dikolong tša batho bohle? Na bo bakwa ke go hlaelela ga tlwaetšo ya botswadi? Goba ke selo se sengwe se itšego, go swana le tutuetšo ya Diabolo?” Dumelela karabo. Ge e ba motho a bolela gore ke ka baka la tutuetšo ya Diabolo, bala Kutollo 12:9, 12. Bontšha karolo ya Diabolo go tšwetšeng pele khuduego lefaseng. Ke moka, o bule poroutšha ya Seo Modimo a se Nyakago go thuto 4, gomme o botšiše motho ge e ba a se a ka a ipotšiša gore Diabolo o tšwa kae. Tšwela pele go bala le go ahla-ahla dirapa tše pedi tša pele. Ge e ba motho a kgetha “go hlaelela ga tlwaetšo ya botswadi” e le lebaka la bošoro dikolong, bala 2 Timotheo 3:1-3 gomme o bontšhe dika tšeo go bonagalago di tlaleletša bothateng bjo. Ke moka, o bule poroutšha ya Seo Modimo a se Nyakago go thuto 8, o bale serapa 5, gomme o tšwetše poledišano pele.

“Na o nagana gore ke mo go kwagalago go letela gore Mmopi a ka re nea tsebo yeo re e nyakago bakeng sa go aga bophelo bja lapa bjo bo atlegilego?” Ka morago ga karabo, rola poroutšha ya Seo Modimo a se Nyakago. Phetla go thuto 8, gomme o hlalose gore e hupere melao ya motheo e tšwago Beibeleng bakeng sa setho se sengwe le se sengwe sa lapa. Ithapele go bontšha kamoo go ka dirišwago poroutšha gotee le Beibele bakeng sa go hwetša mohola o mogolo kudu go yona.

“Mathateng ka moka ao re lebeletšanago le wona bophelong bja mehleng yeno, na o nagana gore thapelo e ka re thuša e le ka kgonthe? [Dumelela karabo.] Ba bantši ba re thapelo e ba nea matla a ka gare. [Bala Ba-Filipi 4:6, 7.] Lega go le bjalo, motho a ka nagana gore dithapelo tša gagwe ga di arabje. [Phetla poroutšha ya Seo Modimo a se Nyakago go thuto 7.] Poroutšha ye e hlalosa kamoo thapelo e ka bago e holago kudu ka gona go rena.”

“Re be re boledišana le baagišani ba rena ka lebaka leo ka lona go nago le madumedi a mantši gakaakaa a fapanego lefaseng. Lega go le bjalo, go na le Beibele e tee feela. Go ya ka pono ya gago, ke ka baka la’ng go e-na le kgakanego ye ya madumedi? [Dumelela karabo. Phetla poroutšha ya Seo Modimo a se Nyakago go thuto 13, gomme o bale dipotšišo tša mathomo.] O tla hwetša dikarabo tše kgotsofatšago dipotšišong tšeo ka go bala thuto ye.”

Ka morago ga gore o sepedišetše motho dimakasine tša Morokami le Phafoga! botšiša ge e ba o ka mmalela serapa setee se se kopana. Ge e ba o dumeletšwe go dira bjalo, bula poroutšha ya Seo Modimo a se Nyakago go thuto 5. Bontšha dipotšišo tše di lokeleditšwego mathomong a thuto, gomme o mo kgopele gore a theetše bakeng sa karabo ya potšišo ya pele ge o dutše o bala serapa sa matseno. Ka morago ga go bala serapa, botšiša potšišo gomme o emele karabo ya gagwe. Sepediša poroutšha, gomme ge e amogetšwe, lokišetša go boela bakeng sa go hwetša dikarabelo tša gagwe dipotšišong tše pedi tše di latelago lelokelelong.

Ditšhišinyo Bakeng sa go Sepediša Puku ya Tsebo

O swere Beibele ka seatleng, thoma ka gore: “Re abelana lengwalo le yo mongwe le yo mongwe setarateng sa geno lehono. Le re . . . ” Bala Johane 17:3, gomme o botšiše: “Na o hlokometše gore ke’ng seo se holofetšwago ge e ba re e-na le mohuta o swanetšego wa tsebo? [Dumelela karabo.] Motho a ka e hwetša kae tsebo e bjalo?” Ka morago ga karabo, bontšha puku ya Tsebo, gomme o re: “Puku ye e bolela ka tsebo yeo e išago bophelong bjo bo sa felego. E dira bjalo ka go araba dipotšišo tše tlwaelegilego kudu tšeo batho ba nago le tšona ka Beibele.” Bontšha dikagare, gomme o botšiše motho ge e ba a kile a ipotšiša ka se sengwe sa dihlogo tšeo.

“Na o kile wa ipotšiša ge e ba Modimo ruri a tshwenyegile ka go hloka toka le go tlaišega tšeo re di bonago go re dikologa goba tšeo re lego go tšona ka noši? [Dumelela karabo.] Beibele e re kgonthišetša gore Modimo o a re rata le gore o tla re thuša dinakong tša matshwenyego.” Bala karolo ya Psalme 72:12-17. Phetla puku ya Tsebo go kgaolo 8, gomme o hlalose gore e nea karabo e kgothatšago potšišong yeo dimilione di ilego tša e botšiša, Ke ka baka la’ng Modimo a dumelela tlaišego? Ge go kgonega, ahla-ahla tše dingwe tša dikgopolo tša Mangwalo tšeo di akareditšwego go dirapa 3 go fihla go 5, goba o dire seo nakong ya leeto la go boela.

“Bontši bja rena re lahlegetšwe ke baratiwa ka lehu. Na o kile wa ipotšiša ge e ba re tla ba bona gape? [Dumelela karabo.] Jesu o ile a bontšha gore baratiwa ba rena ba ka hlakodišwa lehung. [Bala Johane 11:11, 25, 44.] Gaešita le ge se se diragetše makgolong a nywaga a fetilego, se bontšha seo Modimo a holofeditšego go re direla sona.” Phetla puku ya Tsebo seswantšhong se se lego go letlakala 85, gomme o bale taba e hlalosago. Ke moka, bontšha seswantšho se se lego go letlakala 86 gomme o se hlalose. Thea motheo bakeng sa ketelo e latelago ka go botšiša gore: “Na o ka rata go tseba gore ke ka baka la’ng batho ba tšofala le go hwa?” Boela bakeng sa go ahla-ahla kgaolo 6.

“Na o kile wa nagana mabapi le lebaka leo ka lona batho ba hlologelago bophelo bjo botelele?” Ka morago ga karabo, bula puku ya Tsebo go kgaolo 6 gomme o bale serapa 3. Bontšha mabaka ka mangwalo ao a bontšhitšwego. O lebišitše dipotšišong tše pedi tšeo di lego mafelelong a serapa, botšiša motho ge e ba a ka rata go iponela dikarabo ka boyena. Ge e ba karabelo e le e botse, ahla-ahla dirapa tše sego kae tše di latelago.

“Re botšiša batho ge e ba ba dumela se . . . ” Bala Genesi 1:1, gomme o botšiše gore: “Na o dumelelana le taba yeo?” Ge e ba motho a dumela, gona e re: “Le nna ke a dumela. Lega go le bjalo, na o nagana gore ge e ba Modimo a bopile dilo ka moka, ke yena a ikarabelago bakeng sa bokgopo?” Ka morago ga go dumelela karabo ya motho, bala Mmoledi 7:29. Phetla puku ya Tsebo go kgaolo 8 gomme o bale serapa 2. Ge e ba a sa dumelelane le Genesi 1:1, mo kgothaletše gore a hlahlobe bohlatse bja go bontšha gore Mmopi o gona—Bona puku ya Go Boledišana, matlakala 417-419.

“Na o be o tla dumela gore ka baka la go feto-fetoga ga kapejana ga ditekanyetšo tša boitshwaro lehono, re nyaka tlhahlo yeo e ka botwago bophelong? [Dumelela karabo.] Gaešita le ge e le puku ya kgale go di feta ka moka, Beibele e nea keletšo e šomago bakeng sa bophelo bja mehleng yeno le bophelo bja lapa bjo bo thabišago.” Ke moka, phetla go kgaolo 2 ka pukung ya Tsebo, gomme o bale serapa 10 le lefoko la pele go serapa 11, go akaretša le 2 Timotheo 3:16, 17.

“Na o be o ka rata go tseba gore ke’ng seo bokamoso bo se huperego bakeng sa rena le lefase? [Dumelela karabo.] Beibele e akaretša bokamoso ka lentšu le tee—Paradeise! Moo ke mo Modimo a ilego a bea batho ba babedi ba pele ka morago ga ge a ba bopile. Ela hloko tlhaloso ye ya mabapi le kamoo go swanetšego go ba go be go le ka gona.” Phetla puku ya Tsebo go letlakala 8, gomme o bale serapa 9, ka tlase ga sehlogwana se se rego, “Bophelo Paradeiseng.” Ke moka ahla-ahla dintlha tše di lego go serapa 10, gomme o bale lengwalo leo le bontšhitšwego la Jesaya 55:10, 11. Ithapele go tšwetša pele poledišano mabapi le kamoo bophelo Paradeiseng e tsošološitšwego bo tlago go ba ka gona, e le go akaretša dirapa 11-16.

Ge o dira maeto a go boela go bao o sepedišitšego dimakasine tša Morokami le Phafoga! go bona, o ka bolela se:

“Nakong e fetilego ge ke be ke etetše, ke ile ka thabela go go tlogelela kopi ya makasine wa Morokami. Mohlomongwe o lemogile gore sehlogo sa makasine ka botlalo ke Morokami o Tsebatša Mmušo wa Jehofa. Lehono ke tla rata go go hlalosetša seo Mmušo wo e lego sona le seo o tlago go se bolela go wena le go lapa la gago.” Ke moka o phetle poroutšha ya Seo Modimo a se Nyakago go thuto 6, gomme o bale le go ahla-ahla mo gontši ka mo go ka kgonegago ka gona go ya ka nako yeo motho a nago le yona.

“Ke ile ka go etela nakong e sa tšwago go feta gomme ka go tlogelela dikopi tša dimakasine tša Morokami le Phafoga! Dimakasine tše di godiša tlhompho ya go hlompha Beibele le tlhahlo ya yona ya mabapi le boitshwaro. Ka ge ke nagana gore ke ga bohlokwa gore motho yo mongwe le yo mongwe a kwešiše Lentšu la Modimo, ke boile gore ke tle ke go bontšhe selo se sengwe seo se tlago go go thuša go dira seo.” Rola poroutšha ya Seo Modimo a se Nyakago goba puku ya Tsebo, gomme o ithapele go swara thuto ya Beibele.

Ge o sepediša e nngwe ya dipuku tša kgale tša matlakala a 192, o ka leka thero ye:

“Go gatelelwa kudu go nyakega ga thuto ya maemo. Go ya ka pono ya gago, ke thuto ya mohuta mang yeo motho a swanetšego go e phegelela bakeng sa go kgonthišetša lethabo le legolo kudu le katlego bophelong? [Dumelela karabo. Ke moka o bale Diema 9:10, 11.] Puku ye ya dikgakollo [bolela sehlogo sa ka ntle sa puku yeo o e sepedišago] e theilwe Beibeleng. E šupa mothopong o nnoši wa tsebo yeo e ka lebišago bophelong bjo bo sa felego.” Bontšha mohlala o swanetšego ka pukung, gomme o kgothaletše motho go e bala.

Dikgatišo tše Dingwe

Dithero tše dingwe tšeo di šišintšwego bakeng sa dipuku tše oketšegilego le diporoutšha, di ka hwetšwa ka go Watch Tower Publications Index tlase ga:

Presentations (Dithero)

List by Publication (Lelokelelo go ya ka Kgatišo)

Matseno a Lebanyago

Bakeng sa go thoma thuto ya Beibele, leka go diriša a mangwe a matseno a ao a lebanyago:

“Na o be o tseba gore ka metsotso e mmalwa fela, o ka hwetša karabo ya potšišo e bohlokwa ya Beibele? Ka mohlala, . . . ” Ke moka, rotoša potšišo yeo e tšwelelago mathomong a e nngwe ya dithuto poroutšheng ya Seo Modimo a se Nyakago le yeo o naganago gore e ka tanya kgahlego ya motho.

“Ke etetše bakeng sa go tla go go bontšha lenaneo la rena la thuto ya Beibele e sa lefelelwego. Go tšea feela metsotso e ka bago e mehlano go go bontšha kamoo thuto e swarwago ka gona. Na o na le metsotso e mehlano?” Ge e ba karabo e le ee, diriša thuto 1 ka poroutšheng ya Seo Modimo a se Nyakago bakeng sa go bontšha kamoo thuto e swarwago ka gona, o bale lengwalo le tee goba a mabedi ao a kgethilwego. Ka morago ga moo, botšiša: “O tla ba le metsotso e 15 neng bakeng sa gore re tle re ahla-ahle thuto e latelago?”

“Batho ba bantši ba na le Beibele, eupša ga ba lemoge gore e na le dikarabo tša dipotšišo tše bohlokwa tšeo ka moka ga rena re nago le tšona ka bokamoso. O diriša thušo ye ya go ithuta [poroutšha ya Seo Modimo a se Nyakago goba puku ya Tsebo] ka iri goba go feta moo ka beke, o ka hwetša kwešišo ya motheo ya Beibele ka dikgwedi tše sego kae feela. Nka thabela go go bontšha kamoo lenaneo le le šomago ka gona.”

“Ke etetše go tla go go nea thuto ya legae ya Beibele yeo e sa lefelelwego. Ge e ba go ka kgonega, ke tla rata go diriša metsotso e sego kae feela go bontšha kamoo batho mafaseng a 200 ba boledišanago ka Beibele ka magaeng e le dihlopha tša malapa. Re ka diriša sehlogo le ge e le sefe sa dihlogo tše e le motheo wa poledišano. [Bontšha dikagare tša puku ya Tsebo.] Ke sefe seo se go kgahlišago kudu?” Letela motho gore a kgethe. Phetla kgaolong yeo e kgethilwego, gomme o thome thuto serapeng sa pele.

“Ke nea dithuto tša Beibele ka ntle le tefo gomme ke na le nako thulaganyong ya-ka bakeng sa barutwana ba oketšegilego. Thušo ye ya go ithuta Beibele ke yona ye re e dirišago. [Bontšha puku ya Tsebo.] Thuto e tšea dikgwedi tše sego kae feela gomme e nea dikarabo dipotšišong tše bjalo ka: Ke ka baka la’ng Modimo a dumelela tlaišego? Ke ka baka la’ng re tšofala le go hwa? Go direga’ng go baratiwa ba rena ba ba hwilego? Le gore re ka batamela bjang kgaufsi le Modimo? Na nka go bontšha kamoo thuto e swarwago ka gona?”

Ge e ba o hweditše thero yeo e atlegago le e nago le mafelelo a mabotse go hlagoleleng kgahlego, tšwela pele o e diriša ka mo o ka kgonago ka gona! E dumelelanye le mpho ya dipuku ya kgwedi yeo le lego go yona.