Thuša Ba Bangwe Go Hwetša Khomotšo

¹ Batho ba bantši ba lapišitšwe ke go kwa ka dikotsi, dintwa, bosenyi le tlaišego. Le ge ka mo go lego molaleng khomotšo e sa hwetšagale dipegong tša ditaba tša lehono, fela ke selo seo batho ba se nyakago e le ka kgonthe. Go homotša go bolela “go nea matla le kholofelo go” le “go kokobetša manyami goba matshwenyego a” motho yo mongwe. Bjalo ka Dihlatse tša Jehofa, re hlametšwe go thuša batho ka tsela ye. (2 Ba-Kor. 1:3, 4) Diporoutšha tša rena tšeo di theilwego Beibeleng tšeo re tlago go ba re di sepediša ka July le August di na le melaetša e homotšago ya therešo. (Ba-Roma 15:4) Tše dingwe tša ditšhišinyo tša go di sepediša tlase ga maemo a fapa-fapanego šidi:

2 Ditaba tše di nyamišago di ka baka sebaka sa go nea bohlatse gomme tša tliša khomotšo go ba bangwe, mohlomongwe ka go bolela ga gago selo se swanago le se:

◼“Ge dilo tša go swana le tše di direga, ba bangwe ba ipotšiša ge e ba Modimo a le gona, ge e ba a le gona ba ipotšiša ge e ba a e-na le taba le rena. O nagana’ng? [Dumelela karabo.] Tsela e nngwe ya go kgonthišetša ge e ba Modimo a le gona ke go diriša molao wa motheo wo o hlamilwego gabotse.” Bala Ba-Hebere 3:4. Šupa dilo tše dingwe tšeo di re dikologilego tšeo go lego molaleng gore di swanetše go ba le modiri. Ke moka o tšwele pele ka gore: “Ke na le poroutšha yeo ke tsebago gore o tla hwetša e le e homotšago. E na le sehlogo se se rego, Na Modimo Ruri o na le Taba le Rena? [Bala dipotšišo tšeo di lego letlakaleng la ka ntle.] E na le bohlatse bjo bo kgodišago bja gore ga se feela gore Modimo o gona eupša kgaufsinyane o tla fediša maemo ka moka a go hloka toka ao re lebeletšanago le ona lehono. Na o tla rata go e bala?” Rulaganyetša go boa.

3 Leetong la go boela, mohlomongwe o ka re:

◼“Re be re boledišana ka bohlatse bja go ba gona ga Modimo ge ke be ke go tlogelela poroutšha ya Na Modimo Ruri o na le Taba le Rena? Mohlomongwe o ile wa hlokomela ntlha ye yeo e lego go letlakala 7. [Bontšha seswantšho gomme o akaretše serapa 15.] Wo ke mohlala o tee feela wa go bontšha gore Modimo yo a hlokomelago o gona e le ka kgonthe. [Bala serapa 27 go letlakala 9.] Thuto ya motho ka noši ya Beibele e nthušitše gore ke lebeletšane ka katlego le mathata a bophelo a letšatši le letšatši ka gobane Beibele e nea pono ya Modimo ka ditaba.” Ithapele go bontšha kamoo thuto e swarwago ka gona.

4 Go nea bohlatse ka mogala go ka dirwa o diriša poroutšha ya “Morero wa Bophelo ke Ofe—O ka o Hwetša Bjang?” O ka itsebiša gomme wa re:

◼“Ke go leletša mabapi le molaetša wa bohlokwa ka gobane nka se kgone go tla go go bona ka nama.” Bala serapa sa pele go letlakala 4 sa poroutšha, o dira se ka mokgwa wa tlhago, go le bjalo ka ge eka o boledišana le motho ka go lebanya. Mmotšiše seo a se naganago, gomme o dumelele karabo. “Ke butše Beibele ya-ka go Jesaya 45:18. Temana ye e bontšha gore lefase le bopilwe go nagannwe ka rena. Na nka go balela yona?” Ka morago ga moo, hlalosa morero wa poroutšha, gomme o botšiše kamoo o ka išago kopi ka gona.

5 Leetong la go boela, mohlomongwe o ka leka matseno a a go thoma thuto:

◼“Ke rata go tšwetša pele poledišano ya rena ya nakong e fetilego ka go bontšha gore ke mang yo a ka re botšago morero wa bophelo. [Bolelela dirapa 1 le 2 go letlakala 6 ka poroutšheng ya Morero wa Bophelo.] Kutollo 4:11 e hlalosa gore Jehofa Modimo ke Mmopi wa rena. [Bala.] Ka kgonthe o swanetše go ba a bile le lebaka la gore a re bope. Batho bao ba ilego ba nyaka go hwetša seo lebaka e lego lona ba ile ba ithuta Lentšu le le ngwadilwego la Modimo, e lego Beibele. Ke tla rata go go nea sebaka seo.” Hlalosa kamoo lenaneo la thuto ya legae ya Beibele le sa lefelelwego le swarwago ka gona gomme o dire dithulaganyo tša go thoma thuto.

6 Matseno a a mabotse mo gongwe a ka homotša bao ba ilego ba hlagelwa ke lehu la yo ba mo ratago:

◼“Ke dira tirelo ya phatlalatša legatong la bohle bao ba lahlegetšwego ke yo ba mo ratago lehung. Ka ge se e ka ba se sengwe sa dilo tše thata kudu seo motho le ge e le ofe wa rena a ka lebeletšanago le sona, go lokišeditšwe poroutšha ye ya Ge Motho yo o mo Ratago a E-hwa. E thušitše batho ba dimilione. Ke tla rata go go bontšha seo e se bolelago ka kholofetšo e thabišago yeo e ilego ya dirwa ke Jesu Kriste. [Bala serapa sa bohlano go letlakala 26, go akaretša le Johane 5:21, 28, 29.] Bona seswantšho se se se lego go letlakala 29 seo se bontšhago pego ya Ebangedi ya ge Jesu a be a tsoša Latsaro bahung e le ka kgonthe. Ge e ba o tla rata go bala poroutšha ye e homotšago, ke tla thabela go go tlogelela yona, ka moneelo wa R1,20.”

7 Ge o boela, o ka šupa gape go seswantšho seo se lego go letlakala 29 la poroutšha ya “Ge Motho yo o mo Ratago a E-hwa” gomme wa re:

◼“Gopola poledišano ya rena ya mabapi le go tsoša ga Kriste Latsaro. [Bala mantšu ao a hlalosago seswantšho go letlakala 28, gomme o hlahlobe taba e lego ka tlase ga sehlogwana se se rego, “Na e Diregile e le ka Kgonthe?”] Ge e ba pelo ya gago e fagahlela go dumela gore o ka bona moratiwa yo a hwilego gape, e re ke go thuše go dira gore kholofelo ya tsogo e be ya gago ka noši.” Ithapele go swara thuto ya legae ya Beibele.

⁸ Eka re ka dira sohle seo se lego matleng a rena dikgweding tšeo di lego ka pele go ekiša Jesu ka ‘go homotša bohle ba ba nyamilego.’—Jes. 61:2.