Balebeledi Bao Ba Etelelago Pele—Molebeledi Wa Tirelo

¹ Molebeledi wa tirelo o kgahlegela kudu selo se sengwe le se sengwe seo se lego mabapi le tšwelopele ya modiro wa boebangedi tšhemong yeo e abetšwego phuthego. Ka go rialo o kgatha tema e bohlokwa go re thušeng go phethagatša boikarabelo bja rena bja go bolela ditaba tše di lokilego. Ka ge e le moebangedi yo mafolofolo, o etelela pele go rulaganyeng ditaba ka moka tšeo di lego mabapi le tirelo. Ka ge e le morutiši yo a nago le bokgoni, o thuša bagoeledi ka o tee ka o tee go kaonefatša bokgoni bja bona bodireding.—Ba-Ef. 4:11, 12.

² Mogolo yo o okamela ka go lebanya modiro wa bahlanka ba bodiredi bao ba abetšwego go hlokomela dipuku, dimakasine le mašemo. O ikarabela ka go kgonthišetša gore sesola se lekanego sa dipuku, dimakasine le difomo tša tirelo di a hwetšagala kgwedi e nngwe le e nngwe bakeng sa gore re di diriše. Gatee mo ngwageng o hlahloba faele ya tšhemo bakeng sa diaterese tša magae ao re ilego ra lemošwa gore re se a etele, gomme a abela banababo rena ba ba swanelegago gore ba etele magae a.

³ Molebeledi wa tirelo o ikarabela ka go okamela dibopego tše fapa-fapanego tša boboledi, go akaretša go nea bohlatse lefelong la kgwebo, setarateng le ka mogala. O phafogela go rulaganya dithulaganyo tše di šomago tša go kopana bakeng sa tirelo beke ka moka, go akaretša le matšatši a maikhutšo. O bontšha kgahlego e lerato modirong wa thuto ya Beibele. O nyaka ditsela tša go nea thušo ya moya go bao ba thomago go se tšwe ka mehla goba bao ba sego mafolofolo bodireding. O kgomega kudu ka mošomo wa babulamadibogo, gomme o okamela lenaneo la Babulamadibogo ba Thuša ba Bangwe.

⁴ Ka ge e le setho sa Komiti ya Tirelo ya Phuthego, molebeledi wa tirelo o šišinya diphetogo le ge e le dife tše di nyakegago dihlopheng tša Thuto ya Puku ya Phuthego. Ge a etela sehlopha sa lena, kgonthišega gore o ba gona gomme o kopanela le yena tirelong ya tšhemo.

⁵ Bohle ka phuthegong ba swanetše go ikemišetša go dirišana le tlhahlo yeo e newago ke molebeledi wa tirelo. Se se tla re thuša go oketša bokgoni bja rena modirong wa go dira barutiwa gomme ra hwetša lethabo le legolo kudu bodireding bja rena.