Letlolo La Dipotšišo

◼ Molebeleledi wa tirelo a ka okamela bjang modiro wa bahlanka ba bodiredi bao ba hlokomelago mahlokore a dipuku le dimakasine?

Kgahlego ya molebeledi wa tirelo ga e felele feela tabeng ya go etela dihlopha tša thuto ya puku kgwedi le kgwedi le go rulaganya diboka tša ka mehla tša tirelo ya tšhemo. Mogolo yo yo a fišegago o hlokometše selo se sengwe le se sengwe seo se ka kgomago tšwelopele ya modiro wa go bolela ditaba tše di lokilego tšhemong yeo e abetšwego phuthego.

O tla kgonthiša gore kgwedi e nngwe le e nngwe disola tše lekanego tša dipuku le dimakasine tša lesolo di hwetšwa ke mang le mang le gore di boemong bjo bobotse kudu. Gore a fihlelele se o okamela boikarabelo bjo bontši bja bahlanka ba bodiredi bao ba abetšwego go hlokomela mahlakore a dipuku le dimakasine.

Molebeledi wa tirelo o ela hloko ka mo go kgethegilego ditsebišo tše di lego mabapi le masolo a tlago a dipuku ge di tšwelela ka go Tirelo ya Mmušo. Yena gotee le ngwanabo rena yo a hlokomelago dipuku ba dirišana kgaufsi bakeng sa go kgonthiša gore dipuku tše lekanego di tla hwetšagala bakeng sa go dirišwa, eupja ba swanetše go ela hloko gore ba se ke ba otara tše dintši kudu go feta tekano. Ge e ba puku e tla dirišwa tšhemong ka lekga la mathomo goba ge e ba e tla ithutwa kgaufsinyana ka phuthegong mabaka a a swanetše go naganelwa ge otara e romelwa go Mokgatlo. Ge e ba puku e ile ya neelwa pele, pego ya tirelo ya tšhemo ya phuthego ya lesolo la nakong e fetilego e tla bontšha ge e ba disola tšeo di lego gona e tla ba tše di lekanego. Ke therešo gore go swanetše go naganelwa le palo ya bagoeledi bao ba tlago go dira e le babulamadibogo ba go thuša bakeng sa kgwedi yeo gotee le koketšego ya palo ya bagoeledi le babulamadibogo ba ka mehla ga e sa le go tloga nakong ya mafelelo ge puku yeo e be e neelwa. Dipuku di swanetše go hwetšagala pele le ka morago ga diboka tša phuthego. Mapokisi a dipuku a swanetše go bolokwa ka tshwanelo lefelong le le hlwekilego le le le omilego, gomme a hlophiwe ka tsela yeo e lego gore go ka se be le tshenyo.

Molebeledi wa tšhemo o tla dirišana gape le ngwanabo rena yo a hlokomelago lehlakore la dimakasine. Nako le nako molebeledi wa tirelo le ngwanabo rena yo a swarago dimakasine ba swanetše go bapiša palo ya dimakasine tšeo di kgopelwago kgwedi e nngwe le e nngwe le palo ya dimakasine tšeo di tlogago di sepedišwa bodireding. Mo gongwe go ka hwetšwa e le gore bagoeledi ba bangwe ba swanelwa ke go fokotša diotara tša bona ka noši tša dimakasine ge e ba di kgobelana magaeng a bona. Dimakasine ga se tša swanela go senywa.

Re sa dutše re nagana ka molao wa motheo o swanago, molebeledi wa tirelo ka noši o swanetše go hlahloba palo ya dipuku tša lesolo tšeo phuthego e di otarago fomong ya Literature Order (S-AB-14). Ke moka o tla nea mongwaledi wa phuthego fomo yeo, gomme yena o tla e hlahloba ka moka ka kelohloko, a ela hloko ka mo go kgethegilego palo ya dilo tšeo di rekwago go ya ka bao di ba swanetšego tšeo di lokeleditšwego.

Go ba gona, go nyakega modiro o itšego wa go ngwala bakeng sa go hlokomela mahlakore a dipuku le dimakasine ka tshwanelo. Ge e ba banababo rena ba ba abetšwego ba e-na le dipotšišo mabapi le go diriša ga bona difomo le go boloka dipego, mongwaledi o tla thabela go ba thuša karolong ye ya modiro wa bona.