Balebeledi Bao Ba Etelelago Pele —Mongwaledi
1 Mongwaledi wa phuthego o phetha karolo e bohlokwa go kgonthišetšeng gore “tšohle di [ya] ka bothakxa le ka molaô.” (1 Ba-Kor. 14:40) Bjalo ka setho sa Komiti ya Tirelo ya Phuthego, o hlokomela dipoledišano tša phuthego le dipego tša bohlokwa. Gaešita le ge dikabelo tša gagwe di sa bonagale go yo mongwe le yo mongwe go swana le tša bagolo ba bangwe, ditirelo tša gagwe di nyakega kudu e bile di a lebogwa.
2 Ge mangwalo a amogelwa go tšwa go Mokgatlo goba go gongwe, mongwaledi o a nea tlhokomelo le go kgonthišetša gore go newa karabo ge e nyakega. O kgonthiša gore mangwalo ao a amogetšwego a fetišetšanwa magareng ga bagolo gomme ka morago a a boloke faeleng bakeng sa tšhupetšo. O hlahloba difomo tša diotara tša dimakasine le tša dipuku gomme a di romela go Mokgatlo. O okamela ka go lebanya bao ba swarago diakhaonto le dipeeletšo gaešita le ditaba ka moka tšeo di lego mabapi le kopano.
3 Ka ge mongwaledi a swanetše go romela pego ya phuthego ya kgwedi le kgwedi ya tirelo ya tšhemo go Mokgatlo ka la botshelela la kgwedi, ke mo go tlogago go nyakega gore ka moka ga rena re bege modiro wa rena wa tšhemo ka pela-pela mafelelong a kgwedi e nngwe le e nngwe. Ke moka o tsenya dipego tša tirelo dikarateng tša Peho ea Mohoeletsi ea Phutheho. Mogoeledi le ge e le ofe a ka kgopela go bona pego ya gagwe ya motho ka noši ya modiro.
4 Ge mogoeledi a e-tla goba a tloga phuthegong, mongwaledi o kgopela lengwalo la go rola mogoeledi gotee le dikarata tša Peho ea Mohoeletsi ea Phutheho tša motho yoo go tšwa go bagolo ba phuthego e nngwe, goba o ba romela tšona.—Bodiredi bja Rena, matl. 104-5.
5 Mongwaledi o hlahloba modiro wa babulamadibogo gomme a tsebiša bagolo, kudu-kudu molebeledi wa tirelo, ka mathata le ge e le afe ao babulamadibogo ba ka bago ba e-na le ona. O tsebiša baswari ba Thuto ya Puku ya Phuthego ka bagoeledi bao ba sa tšwego ka mehla tirelong ya tšhemo. Bobedi mongwaledi le molebeledi wa tirelo ba etelela pele go lomaganyeng maiteko a go hlokomela bao ba tapilego.—Tirelo ya Rena ya Mmušo, November 1987, letl. 1.
6 Ka go kwešiša gakaone dikabelo tša mongwaledi, eka re ka dira seo re ka se kgonago go dira gore bolaki bja gagwe bo be bonolo go bo phethagatša.—1 Ba-Kor. 4:2.