Aganang Ka Go Nea Ditlhaloso Dibokeng

¹ Go Ba-Hebere 10:24 (PK) re kgothaletšwa gore re “gokelane leratong le medirong e mebotse.” Se se akaretša go agana ka go nea ditlhaloso tše di kwagalago dibokeng tša phuthego. Ke ka baka la’ng re swanetše go nea ditlhaloso? Re ka dira se bjang? Ke mang yo a tlago go holega?

² Nagana ka dinako tše dintši tšeo ka tšona o holwago ke go kwa ba bangwe ba nea ditlhaloso tše bonolo le tše di kwagalago tšeo di oketšago kwešišo ya gago le go go matlafatša moyeng. O na le tokelo ya go dira se swanago go bona. Ge o tšea karolo, o bontšha kganyogo ya gago ya go ‘hlallela neo ya Moya’ bakeng sa go kgothatša bohle bao ba lego gona.—Ba-Roma 1:11, 12.

³ Kamoo go ka Newago Ditlhaloso tše Dibotse ka Gona: O se ke wa nea ditlhaloso tše ditelele, tšeo di akaretšago kgopolo e nngwe le e nngwe serapeng. Gantši ditlhaloso tše ditelele ga di kgone go lebanya karabo e itšego gomme di ka nyemiša ba bangwe moko gore ba se be le karolo. Tlhaloso ya pele serapeng e swanetše go ba karabo e kopana le e lebanyago go tšwa potšišong e gatišitšwego. Ke moka bao ba neago ditlhaloso tše oketšegilego ba ka bontšha kamoo taba e šomago ka tsela ya kgonthe ka gona goba ba bontšha kamoo mangwalo šomago ka gona. Bona Puku ya Tlhahlo ya Sekolo, matlakala 90-2.

⁴ Ge e ba go nagana ka go nea tlhaloso go go bakela pelaelo e itšego, lokišetša tlhaloso e kopana e sa le pele, gomme o kgopele moswari wa thuto gore a go šupe gore o arabe serapa seo. Ka morago ga go dira se dibokeng tše sego kae, go tšea karolo go tla ba bonolo. Gopola gore Moše le Jeremia ba ile ba bontšha go se holofele bokgoni bja bona bja go bolela phatlalatša. (Ek. 4:10; Jer. 1:6) Eupša Jehofa o ile a ba thuša gore ba bolele legatong la gagwe, le wena o tla go thuša.

⁵ Ke Mang yo a Tlago go Holwa ke Ditlhaloso tša Gago? Wena ka noši o a holega ka gobane ditlhaloso tša gago di gatelela therešo ka mo go tiilego kudu kgopolong le pelong ya gago, e lego seo se dirago gore go be bonolo gore o gopole taba ka morago. Le gona, ba bangwe ba holwa ke go kwa ditlhaloso tša gago tše di agago. Re a kgothatšwa ge bohle ba dira boiteko bja go bolela tumelo ya bona dibokeng tša phuthego, go sa šetšwe ge e ba e le ba nago le phihlelo, ba banyenyane, ba ba nago le dihlong goba ba ba sa tšwago go kopanela.

⁶ Ka ntle le pelaelo re tla hwetša gore ‘mantšu a go tla lebakeng la gona, ke ona a mabotse’ ge a dirišetšwa go agana dibokeng!—Die. 15:23.