Balebeledi Bao Ba Etelelago Pele —Moswari Wa Thuto Ya Morokami
1 Morokami o Tsebatša Mmušo wa Jehofa ke tokišetšo e kgolo ya “molaki e a bôtexaxo yo bohlale” bakeng sa go re abela dijo tša moya “ka lebaka la xôna.” (Mat. 24:45) Mogolo yo a swarago Thuto ya Morokami o na le boikarabelo bjo bohlokwa e le morutiši yo a nago le bokgoni yo a neago mohlala o mobotse bophelong bja Bokriste.—Ba-Roma 12:7; Jak. 3:1.
2 E le gore a rute ka katlego, moswari wa Thuto ya Morokami o swanetše go dira boiteko bja kgonthe ge a lokišetša beke e nngwe le e nngwe. O dira se ka thapelo le ka kelohloko. Kgahlego ya gagwe e kgolo ka phuthego e bonagala go kataneleng ga kgonthe go fihlelela dipelo tša rena ka taba yeo e ithutwago. O lebiša tlhokomelo dintlheng tše dikgolo tša thuto gomme o re thuša go bona kamoo di tswalanago ka gona le sehlogo.
3 Go lokišetša gabotse go yena go akaretša go lebelela mangwalo e sa le pele e le gore a tsebe kamoo a šomago ka gona. O etiša Lentšu la Modimo pele ka go kgothaletša phuthego gore e diriše Beibele gabotse nakong ya thuto. Ge ntlha e bohlokwa e se ya akaretšwa ditlhalosong tše di tšwago go phuthego goba ge tirišo ya lengwalo la motheo e hlokomologwa, o botšiša potšišo e nngwe e kgethegilego bakeng sa go fatolla tsebišo. Ka tsela ye, o re thuša go fihla diphethong tše nepagetšego le go tseba kamoo re ka dirišago seo re ithutilego sona maphelong a rena.
4 Moswari wa Thuto ya Morokami o katana ka mo go tšwelago pele gore a kaonefatše bokgoni bja gagwe ka noši bja go ruta. Ga a nee tlhaloso ka mo go feteletšego eupša o re kgothaletša go nea tlhaloso—ka mantšu a rena ka noši, ka boripana le ka go opa kgomo lenaka. Nako le nako a ka re gopotša gore wa pele yo a neago tlhaloso serapeng o swanetše go nea karabo e kopana le e lebanyago ya potšišo e gatišitšwego. Ditlhaloso tše oketšegilego tšeo di tšwago go batheetši di ka lebiša tlhokomelo tirišong e šomago ya lengwalo, go thekgeng mabaka goba tirišong e šomago ya taba. Ka go godiša go lokišetša ga motho ka noši le ga lapa, moswari wa Thuto ya Morokami o katanela go tutueletša kganyogo ya yo mongwe le yo mongwe ya go tšea karolo.
5 Bjalo ka “batho ba rutwago ke Jehofa,” re leboga “dimpho tšeo e lego banna,” ba go etša baswari ba Thuto ya Morokami, bao “ba xo itapiša . . . ka xo ruta.”—Jes. 54:13, NW; Ba-Ef. 4:8, 11, NW; 1 Tim. 5:17.