Na o na le Otara e sa Fetogego?
1 Na o kile wa ya sebokeng sa tirelo ya tšhemo gomme wa lemoga gore ga o na dimakasine ka mokotleng wa gago? Gopola pampiri ya ka gare ya Tirelo ya Rena ya Mmušo ya September 1995 e nago le sehlogo se se rego, “Diriša Dimakasine tša Rena ka mo go Holago.” E ile ya re botša gore re “[be] le otara e kgonthišeditšwego ya dimakasine,” ya re: “Dira otara e lekanetšego go ngwanabo rena yo a swarago dimakasine bakeng sa palo e lebanego ya dikopi tša tokollo e nngwe le e nngwe. Ka tsela ye, wena le lapa la gago le tla ba le kabo ya ka mehla le e lekanego ya dimakasine.” Na o dirile se?
2 Ke ka baka la’ng o sa dire otara e sa fetogego ya dimakasine? O tla ikwa o ikarabelela kudu gore o abe dimakasine beke le beke, gomme o tla ba le lethabo le oketšegilego ka go dira bjalo. Ge e ba o šetše o e-na le otara e sa fetogego, hlahlobišiša lefsa ge e ba o hwetša palo yeo o e nyakago bakeng sa tekanyo ya kgwedi bodireding. Ee, re nyaka go botega mabapi le go lata otara ya rena beke e nngwe le e nngwe gomme re swanetše go ikwa e le boikarabelo bja rena go dira bjalo. Ge e ba o tla ba o se gona phuthegong ka nako e teletšana, tsebiša mohlanka wa dimakasine ge e ba o nyaka gore a lokolle dimakasine tša gago go motho yo mongwe go fihlela ge o boa.
3 Pampiri yona ye ya ka gare e tsopotšwego ka mo godimo e ile ya bolela gore re swanetše go “rulaganyetša letšatši la ka mehla la dimakasine.” Na o ka thekga Letšatši la Dimakasine la beke le beke? Go etša ge go bontšhitšwe ka go 1999 Calendar of Jehovah’s Witnesses, se se dirwa Mokibelo o mongwe le o mongwe mo ngwageng! O se ke wa nyatša bohlokwa bja go aba Morokami le Phafoga! Ge re dira boiteko bja go ba le karolo ka mo go tletšego modirong wa dimakasine, re ‘tliša ditaba tše di lokilego tša selo se sengwe se sekaone’ go baagišani ba rena.—Jes. 52:7, bapiša le NW.