Diriša Nako ya Gago ka mo go Holago
1 Yo mongwe le yo mongwe o na le tekanyo e swanago ya nako e lego ya gagwe bekeng e nngwe le e nngwe. Karolo yeo re e gafago go abeng ditaba tše di lokilego ke ya bohlokwa ka mo go kgethegilego ka gobane ke nako yeo e dirišwago modirong wo o phološago bophelo. (Ba-Roma 1:16) Re bontšha tebogo ya rena ya go leboga se ka go lokišetša gabotse tirelo e rulagantšwego, go fihla dibokeng tša tirelo ka nako le ka go tloga ka pela go ya tšhemong. Re ka upša ra bolela go e na le gore re lete. Ka ge Jehofa a re rutile gore “tšohle di na le mohla wa tšôna,” re swanetše go diriša nako yeo re e beetšego ka thoko bakeng sa bodiredi ka mo go holago e le ka kgonthe.—Mmo. 3:1.
2 Laola Nako ya Gago ka Bohlale: Re tlelwa ke ditšhegofatšo tše dintši ge re kgomarela ka go tia thulaganyo yeo e dumelelago go ba le karolo ka mehla bodireding bja tšhemo. Ka tlhago, mafelelo a mabotse ao re bago le ona bodireding a swanetše go ba a leka-lekanago le tekanyo ya nako yeo re e dirišago tirelong. Ka ditokišo tše nyenyane mokgweng wa rena wa ka mehla, na re ka se gafe nako e oketšegilego tirelong ya tšhemo? Ka mohlala, ka morago ga modiro wa dimakasine ka Mokibelo, na re ka diriša nako e oketšegilego go dira maeto a go boela a sego kae? Ge e ba re bile bodireding bja tšhemo ka nakwana ka Sontaga, na re ka ba ra diriša nako e itšego go dira maeto a go boela goba go swara thuto ya Beibele? Na go ka kgonega gore re tlaleletše modiro wa rena wa ntlo le ntlo ka go nea bohlatse setarateng? Ka tsela ye goba tše dingwe, re ka kgona go kaonefatša tirelo ya rena.
3 Ge re le bodireding, re ka lahlegelwa ke nako ya bohlokwa ge e ba re sa hlokomele. Go ba gona, ge e ba maemo a tša leratadima a le šoro, go khutša ganyenyane go tla re lapološa le go re thuša gore re tšwele pele. Lega go le bjalo e-ba yo a leka-lekanego, ka ge dinako tšeo tša go khutša ka mehla e ka se be tšeo e lego tša bohlokwa.
4 Nywageng ya morago bjale go thomile go ba thata kudu go hwetša batho gae. Go lebeletšana le boemo bjo, bagoeledi ba bantši ba dira go nea ga bona bohlatse ka ntlo le ntlo ka dinako tše fapa-fapanego tša letšatši. Ke ka baka la’ng o sa leke go nea bohlatse thapama goba e sa le ka pela mesong?
5 Go kaone ge re sa etelane ge re le modirong wa setarateng. Go e na le moo, le emele kgole le kgole gomme le ye bathong e le gore le thome dipoledišano le bona. Ka go rialo nako e tla laolwa ka katlego e oketšegilego gomme go tla hwetšwa lethabo le legolo modirong.
6 Diriša Dibaka tša go Nea Bohlatse: Ge mong wa ntlo a be a bolela gore o be a sa thabele, Hlatse e ile ya botšiša ge e ba go e na le yo mongwe ka ntlong yo e ka bolelago le yena. Se se ile sa lebiša poledišanong le monna wa ntlo yeo, yo a bego a babja ka nywaga e mentši gomme nako e ntši a le malaong. Kholofelo yeo e lego ka Lentšung la Modimo e ile ya tsošološa kgahlego ya gagwe ya go kgahlegela bophelo. Go se go ye kae o ile a tsoga malaong, a e-ba gona dibokeng Holong ya Mmušo le go abelana le ba bangwe kholofelo ya gagwe yeo a sa tšwago go e hwetša!
7 Kgaetšedi yo a lego mahlalagading o ile a diriša tšhišinyo ya go ba le karolo tirelong ya tšhemo iri pele ga Seboka sa Puku ya Phuthego. Ntlong ya pele, o ile a kopana le ngwanenyana wa nywaga e 13 yo a ilego a theetša ka kelohloko gomme a tšea puku. Letšatšing le le latelago sekolong, kgaetšedi yo mofsa o ile a bona mosetsana yena yola. Gatee-tee ka morago ga moo, kgaetšedi o ile a ithapela go ithuta Beibele le yena gomme ngwanenyana a e amogela.
8 Go Diriše ka Nako e Lekanego: Go ba le karolo ka mehla tirelong ya tšhemo go re thuša go godiša bokgoni bja rena bja go bolela ditaba tše di lokilego. Na o ka kaonefatša bokgoni bja gago bja go thoma poledišano mojakong ka go diriša matseno a atlegago kudu? Na o ka ba morutiši yo a nago le bokgoni ka mo go oketšegilego ge o swara thuto ya legae ya Beibele? Ka go dira bjalo, ka kgonthe o ka dira gore nako ya gago tirelong e be e holago gomme wa dira bodiredi bja gago gore e be bjo bo enywago dienywa.—1 Tim. 4:16.
9 Ka ge “lebaka [e le] la pitlaxanô,” maphelo a rena a swanetše go tlatšwa ka mediro ya Bokriste. (1 Ba-Kor. 7:29) Go beela nako ka thoko bakeng sa modiro wa boboledi go swanetše go ba ka godimo lelokelelong la rena la dilo tšeo di tlago pele. Anke re beng le karolo e phetšego ya mafolofolo bodireding. Nako ke selo sa bohlokwa seo Jehofa a re neilego sona. Ka mehla e diriše ka bohlale gomme o dire gore e hole.
[Lepokisi go letlakala 4]
Ela Hloko Ditšhišinyo tše:
◼ Fihla dibokeng bakeng sa tirelo ka nako.
◼ Dira sohle seo o ka se kgonago go boloka dihlopha tša go nea bohlatse e le tše nyenyane.
◼ Phema go senya nako ge go iwa tšhemong.
◼ Šoma tšhemo ge batho ba bantši ba le gae.
◼ Šoma o nnoši ka dinako tše dingwe ge e ba go bolokegile go dira bjalo.
◼ Dira maeto a go boela kgaufsi le tšhemo ya ntlo le ntlo.
◼ Swarega tirelong ge ba bangwe sehlopheng ba diegile ka ntlong.
◼ Ge e ba go kgonega, go ithekgile ka maemo e-ba tšhemong lebaka la go feta iri.