A re “Tsene Tabeng!”
1 Na mong wa ntlo o kile a šitiša thero ya gago yeo e lokišeditšwego ka kelohloko ka mantšu a rego: “O nyaka’ng? Tsena tabeng!” Ke eng seo re ka ithutago sona phihlelong e bjalo?
2 Batho ba bantši lehono ba fela pelo. Ba nyaka go re tseba le lebaka leo re lego go bona ka lona. Ge ba hwetša gore morero wa ketelo ya rena ke go bolela ka Beibele, ba ka ithiba ditsebe. Go bala Beibele le go bolela ka dilo tša moya ga se dilo tša bohlokwa maphelong a batho ba bantši. Re ka kgodiša bjang beng ba dintlo ba bjalo gore ba swanetše go tšea metsotso e sego kae ba bolela le rena ka taba ya Beibele?
3 Seo se Šomago Kaone: Senotlelo ke go bontšha mong wa ntlo gore Beibele e nea ditharollo tše šomago tša mathata ao a mo tshwenyago gomme e dira se ka mantšu a sego kae ka mo go kgonegago. Dithero tše di atlegago kudu di ba le potšišo e lebanyago e reretšwego go dira gore mong wa ntlo a nagane, e latela lengwalo leo le arabago potšišo yeo. Mohlomongwe o ka thabela go leka tše dingwe tša ditšhišinyo tše di latelago. Di reretšwe go re thuša go “tsena tabeng” ka pela ge re dutše re tsoša kgahlego ya mong wa ntlo.
4 Tšhemong yeo batho gantši ba bolelago gore ga ba thabele, rotoša potšišo yeo e ba akaretšago bona ka noši:
◼ “Ge re dutše re batamela nywaga e sekete e latelago, na o ikwa o e-na le kholofelo goba o belaela? [Dumelela karabo.] Beibele e boletše e sa le pele ka ditiragalo tše bakago tlalelo tšeo re di bonago lehono gaešita le mafelelo a tšona.” Bala 2 Timotheo 3:1, 2, 5 le Diema 2:21, 22.
◼ “Mo nageng ye go tshwenyegilwe kudu ka tlhokomelo ya bophelo. Na o be o tseba gore Modimo o holofetša gore o tla rarollela mathata ka moka a tša maphelo sa ruri?” Bala Kutollo 21:3, 4.
◼ “O nagana gore setšhaba sa gabo rena se ka holega bjang ge nkabe yo mongwe le yo mongwe yo a dulago mo a be a diriša melao ya motheo ya Beibele?” Bala Mateo 22:37-39.
5 Ka ge thomo ya rena e le go bolela ditaba tše di lokilego tša Mmušo, kae le kae mo go kgonegago re swanetše go lebiša tlhokomelo go seo Mmušo o se phethagatšago. Mo gongwe o ka re:
◼ “Na o tseba gore puku ya kgale kudu ya lefase, e lego Beibele, e boletše e sa le pele gore go tlo ba le mmušo o tee bakeng sa lefase ka moka?” Bala Daniele 2:44.
◼ “O nagana gore maemo e be e tla ba afe ge nkabe Jesu Kriste a be a buša lefase?” Bala Psalme 72:7, 8.
6 Tšhemong yeo batho ba gona e lego ba bodumedi, mo gongwe o ka leka a mangwe a matseno a:
◼ “Batho ba bantši ba tlaišwa ke kgethollo ka baka la bong bja bona, bodumedi goba mmala wa letlalo. O nagana gore Modimo o ikwa bjang ka kgethollo e bjalo?” Bala Ditiro 10:34, 25.
◼ “Re a tseba gore Jesu Kriste o ile a dira mehlolo e mentši mehleng ya gagwe. Ge e ba o be o tla mo kgopela gore a dire mohlolo o mongwe, e be e tla ba ofe?” Bala Psalme 72:12-14, 16.
7 Ge e ba mong wa ntlo a sa nyake go bula mojako, o ka thoma poledišano ka gore:
◼ “Batho ba bantši lehono ba lapišitšwe ke go kwa ka mathata. Ba nyaka go kwa ka ditharollo. Ga go pelaelo gore se ke sa therešo ka wena. Eupša re ka hwetšago kae ditharollo tša kgonthe mathateng a rena?” Dumelela karabo. Bala 2 Timotheo 3:16, 17.
8 Ke ka Baka La’ng o sa e Leke? Gantši sohle se se nyakegago ke potšišo e bonolo le e kopana bakeng sa go tsoša kgahlego ya mong wa ntlo. Mosadi yo mongwe yo pele a bego a ganetša o ile a laletša dikgaetšedi tše pedi legaeng la gagwe ka morago ga ge yo mongwe wa bona a ile a botšiša potšišo e rego: “Na o ka hlaola Mmušo woo o rapelelago Thapelong ya Morena?” Mosadi o ile a kgahlwa ke potšišo, gomme a amogela thuto ya Beibele. Ga bjale ke mohlanka yo a ineetšego wa Jehofa!
9 Ge o bolela le mong wa ntlo, ala taba ya gago gabotse. Bolela ka go tšwa pelong. Gantši batho ba arabela gabotse ge ba kgodišegile gore re na le kgahlego ya kgonthe ka bona.—Dit. 2:46, 47.
10 Modiro wa go bolela ditaba tše di lokilego ke tlhohlo lehono. Beng ba bangwe ba dintlo ba gononela batho bao ba sa ba tsebego. Ba bangwe ba phela maphelo a leema-ema gomme ga ba na nako. Lega go le bjalo, re ka kgodišega gore go sa dutše go e-na le ba bantši bao ba swanelwago ke go hwetšwa. (Mat. 10:11) Maiteko a rena a go ba tsoma go bonagala a tla atlega kudu ge e ba re boloka dithero tša rena e le tše kopana gomme re “tsena tabeng!”