Go Tšea Karolo Ka Katlego Bodireding Bja Rena Bja Go Phološa Bophelo

1 Moapostola Paulo o be a dumelelanya thero ya gagwe ya ditaba tše di lokilego le maemo gore a “ruê ba bantši.” (1 Ba-Kor. 9:19-23) Ka mo go swanago, re tla atlega kudu bodireding bja rena ge e ba re phafogela go lemoga dikgahlego tša mong wa ntlo gomme re itokišeditše go dumelelanya poledišano ya rena le dinyakwa tša gagwe. Se ga se sa swanela go ba thata ge e ba re sepediša Morokami le Phafoga! goba e nngwe ya dipukwana (brochures) tša rena.

2 Ka morago ga ge o itsebišitše, mo gongwe o ka thoma ka go bolela ka mantšu a gago selo se se swanago le se:

◼“Batho ba bantši ba nolega moko ka baka la seo se bonalago e le go palelwa ga mebušo ya lefase ke go nea ditharollo tše di holago tša mathata a mehleng ya rena. Ba bangwe ba bile ba bea mebušo molato wa mathata a bona. Na o nagana gore go ka ba le mmušo wo o kgonago go hlokomela dinyakwa tša rena ka moka ka mo go kgotsofatšago? [Dumelela karabo.] Na o a tseba gore re na le kholofetšo e ka botwago ya mmušo wo o tlago go fediša mathata ka moka ao re lebeletšanego le ona ka mo go kgonthišeditšwego?” Theetša karabo ya mong wa ntlo ka kelohloko. Go ithekgile ka seo a se bolelago, itokišetše go fapogela go e nngwe ya dithero tše mmalwa tše di fapa-fapanego.

3 Ge e ba ditlhaloso tša mong wa ntlo di bontšha gore o ipolela e le Mokriste, gona re ka botšiša ge e ba a rapela “Tata-wešo” goba Thapelo ya Morena. Ge e ba a araba ka go dumela, re ka boeletša ka hlogo thapelo ya mohlala go fihla moo e bolelago gore, “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mat. 6:9, 10) Se se bontšha gore ka letšatši le lengwe thato ya Jehofa e tla dirwa mo lefaseng. Ka gona go ka šupja sehlogong se se swanetšego ka go Morokami goba Phafoga! goba pukwaneng seo se hlalosago kgopolo ye, bjalo ka letlakala 3 la Mmušo Woo o Tlago go Tliša Paradeise.

4 Ge e ba mong wa ntlo a sa bontšhe go dumela go Modimo, o ka šupa go Ba-Hebere 3:4 ke moka o phetle go letlakala 4 la pukwana ya Na Modimo Ruri o na le Taba le Rena? Bala dirapa 1 le 2 gomme o botšiše potšišo yeo e lokeleditšwego botlaseng bja letlakala. Goba o ka kgokaganya taba e swanetšego yeo e tšwago makasineng wa gona bjale.

5 Ge e ba mong wa ntlo a bonagala a kgotsofetše ka boemo bja gagwe bophelong, o ka rotoša potšišo:

◼“Ke ka baka la’ng re swanetše go naganišiša kudu ka seo Beibele e se bolelago ka bokamoso bja mmušo?” Ka gona re ka diriša tsebišo yeo e hwetšwago ka pukung ya Go Boledišana go matlakala 374 le 381, ra bolela lebaka le tee goba go feta moo a a seswai ao a neilwego moo. Ge e ba mong wa ntlo a bontšha kgahlego, diriša pampišana ya Na Lefase le le tla Phologa?, o thoma ka serapa sa mathomo go letlakala 2 bakeng sa go tšwetša poledišano pele.

6 Ketelo ya gago ya mathomo e ka se be e atlegago ka mo go feletšego ge e ba o sa tsoše kgahlego ya mong wa ntlo bakeng sa ketelo e nngwe. Ka gona, kgonthišega gore o botšiša potšišo e tsošago kgahlego gomme o holofetše go e araba ge o boa.

7 Kgethang seo le naganago gore le tla ikwa le lokologile go se bolela tabeng e lego ka mo godimo. Beakanyang ditšhišinyo tše gore di swanele tšhemo ya lena. Tlwaelang dipukwana, dipampišana le dihlogo tša dimakasine tšeo le tlago go di diriša e le gore le dumelelanye poledišano ya lena kapejana le dinyakwa tša mong wa ntlo. Eka ka moka ga rena re ka lokišetša dithero tša rena ka mafolofolo “ka ’baka la Ebangedi,” ka go rialo re tšee karolo ka katlego bodireding bjo bja go phološa bophelo.—1 Ba-Kor. 9:23.