Na Seo ga se ra se kwa Pele?
1 Ee re se kwele! Jehofa o boeletša dilo tše dintši ka Lentšung la gagwe bakeng sa go hola batho ba gagwe. Jesu gantši o ile a boeletša dithuto tša gagwe mabapi le dibopego tše di fapa-fapanego tša Mmušo. Baapostola ba gagwe ba ile ba boeletša ka mo go tšwelago pele ditaba tša moya le bao ba bego ba tsemile ka go tia therešong.—Ba-Roma 15:15; 2 Pet. 1:12, 13; 3:1, 2.
2 Mehleng ya rena mokgatlo wa Jehofa o rulaganyeditše dihlogo tša bohlokwa tšeo di swanetšwego go boeletšwa leboelela dibokeng tša phuthego. Dikgatišo tše dingwe di ile tša ithutwa leboelela. Ee, ke gabohlokwa go kwa dilo tšeo re ilego ra di kwa pele!
3 Poeletšo e Kgatha Tema ya Bohlokwa: Dikgopotšo tša Jehofa di nweletša kwešišo ya rena, di katološa pono ya rena le go matlafatša boikemišetšo bja rena bja go dula tseleng ya moya. (Ps. 119:129, bapiša le NW.) Go boeletša ditekanyetšo le melao ya motheo ya Modimo go swana le go lebelela seiponeng. Go re thuša go itlhahloba le go lwantšha tshekamelo ya go ba “mokwi e a xakwaxo.”—Jak. 1:22-25.
4 Ge e ba re sa tšwele pele re ikgopotša therešo, dilo tše dingwe di tla tutuetša dipelo tša rena. Dikgopotšo tša Modimo di re matlafaletša go lwantšha ditutuetšo tše gobogago tša lefase la Sathane. (Ps. 119:2, 3, 99, 133, bapiša le NW; Ba-Fil. 3:1.) Dikgopotšo tša ka mehla tšeo re di amogelago mabapi le go phethagala ga merero ya Modimo di re tutueletša go ‘phakgama.’ (Mar. 13:32-37) Poeletšo ya ditherešo tša Mangwalo e re thuša go dula re le tseleng yeo e yago bophelong bjo bo sa felego.—Ps. 119:144, bapiša le NW.
5 Kamoo re ka Holegago ka Gona Motho ka Noši: Re swanetše go ‘sekamišetša dipelo tša rena dikgopotšong tša Modimo.’ (Ps. 119:36, bapiša le NW.) Ge go tlo ahla-ahlwa taba e tlwaelegilego sebokeng sa phuthego, re swanetše go lokišetša e sa le pele, re lebelele mangwalo ao a bontšhitšwego gomme re bontšhe kamoo re ka dirišago tsebišo ka gona. Anke re se ke ra fošwa ke go lokišetša tlhahlobo e ngwalwago Sekolong sa Bodiredi sa Pušo ya Modimo, re nagana gore ga go nyakege. (Luka 8:18) Le ka mohla ga re nyake go ba bao ba sa elego hloko gobane ditherešo tša motheo di boeletšwa gantši dibokeng tša rena.—Ba-Heb. 5:11.
6 Eka re ka ba le boemo bja kgopolo bjo mopsalme a bilego le bjona: “Ke thabetše tsela ya dikgopotšo tša gago kudu, Go fo swana le ge ke thabetše dilo tše dingwe ka moka tše bohlokwa.” (Ps. 119:14, NW) Ee, re kwele dilo tše tša bohlokwa pele, gomme e bile re tla di kwa gape. Ka baka la’ng? Ka gobane Jehofa o tseba gore re swanetše go di kwa!