Na Dikgopotšo Tša Jehofa di Re Tsoša Moyeng?
1 Mopsalme o retile Jehofa a re: “Dikgopotšo tša gago ke tše ke naganišišago ka tšona.” (Ps. 119:99, NW) Lentšu la Sehebere bakeng sa “dikgopotšo” le na le kgopolo ya gore Jehofa o re gopotša seo se boletšwego melaong le ditaelong tša gagwe. Ge e ba re arabela, di tla re tsoša moyeng gomme tša re dira gore re thabe.—Ps. 119:2.
2 Bjalo ka batho ba Jehofa, ka mehla re hwetša temošo le keletšo. Bontši bja tšona ke bjo re ilego ra bo kwa pele. Le ge re leboga kgothatšo ye, re sekametše go lebaleng. (Jak. 1:25) Jehofa ka go se fele pelo o nea dikgopotšo tše lerato. Moapostola Petro o ngwadile tše dingwe tša dikgopotšo tše e le gore a ‘tsoše kgopolo-tshekegi gore re gopole taelo ya Morena.’—2 Pet. 3:1, 2.
3 Re gopotšwa leboelela ka bohlokwa bja thuto ya motho ka noši le ka go ba gona dibokeng. Se se a dirwa ka gobane mediro ye e bohlokwa kudu katlegong ya rena ya moya.—1 Tim. 4:15; Ba-Heb. 10:24, 25.
4 Tlhohlo e kgolo kudu go ba bangwe ke ya go phethagatša thomo ya Bokriste ya go bolela. Go nyaka boiteko, boikemišetšo le kgotlelelo. Gaešita le ge go nyaka go gontši go rena, re thušwa go ‘ema [re tiile, NW] dinaong tša rena re itlemeletše ebangedi.’—Ba-Ef. 6:14, 15.
5 Tirelo ya rena e swanetše go tutuetšwa ke se se fetago go fo gopola melao ya Jehofa. Moapostola Paulo o re gopotša gore pelo e nea tutuetšo yeo re e nyakago bakeng sa go “ipolela ka molomo [ra] tseb’o phološwa.” (Ba-Roma 10:10) Ge e ba re e-na le tumelo e tiilego le ge e ba pelo ya rena e sekametše dikgopotšong tša Jehofa, re tla ikwa re gapeletšega go bolela gore re iše tumišo leineng la gagwe.—Ps. 119:36; Mat. 12:34.
6 Ge re šoma ka thata bakeng sa go dira mediro e mebotse, re lebelela ka tshwanelo gore se se tla re tlišetša lethabo. (Mmo. 2:10) Paulo o hlaola lethabo e le seenywa sa moya wa Jehofa, gomme re swanetše go tsoma go se bontšha ka tekanyo e kgolo. (Ba-Gal. 5:22) Petro o okeditše ka gore go ‘phegelela’ go tla putswa ka bodiredi bjo bo enywago, bjo bo tšweletšago lethabo.—2 Pet. 1:5-8.
7 Ge re lebeletšane le tlhohlo, re swanetše go gopola go ema ga baapostola ba tiile ge ba be ba re: “Xe e le rena xa re kxône xo lesa xo bolêla tše re di bonexo le tše re di kwilexo.” (Dit. 4:20) Re matlafaletšwa gore re tšwele pele ge re gopola gore ‘ka go dira bjalo, re tla iphološa ra phološa le bao ba re kwago.’—1 Tim. 4:16.
8 Ga re galefe goba go ikwa re kgopišegile ka baka la go hwetša dikgopotšo ka mehla. Go e na le moo, re leboga ka mo go tseneletšego mohola wa tšona o mogolo. (Ps. 119:129) Mehleng ye e hlobaetšago, re leboga gore Jehofa o tšwela pele a re romela dikgopotšo bakeng sa go re tsoša moyeng le go re tutuetša gore re be mafolofolo medirong e mebotse!—2 Pet. 1:12, 13.