Naganela Lentšu la Jehofa Letšatši le Lengwe le le Lengwe!
1 Letšatši le lengwe le le lengwe le tliša ditlhohlo tše difsa tumelong ya gago. Mohlomongwe motho yo o mo tlwaetšego wa lefase o tšwela pele a go gateletša gore o beane mabaka le yena. Morutiši wa gago o nyaka gore o phegelele modiro wa boiphedišo wa bophelo ka moka, goba mothwadi wa gago o nyaka gore o šome diiri tše teletšana. Bophelo bja gago bja mmele bo ka ba bo fokola. Gaešita le ge diteko tše bjalo di ka lebana le wena ka nako le ge e le efe, ga o noši. Jehofa o ikemišeditše go go nea bohlale bjo bo nyakegago gore o lebeletšane le tšona. Go nagana ka temana ya Beibele le ditlhaloso go Go Hlahloba Mangwalo ke tsela e nngwe yeo ka yona o ka monyago Lentšu la Jehofa ka mehla. Na o diriša tokišetšo ye e kgahlišago ka mo go holago?
2 Thušo e a Hwetšagala: Jesaya 30:20 (NW) e hlalosa Jehofa e le “Mohlahli yo Mogolo” yo batho ba Modimo ba ka lebelelago go yena bakeng sa thušo. O go nea seo o tlogago o se nyaka gore o lebeletšane le ditlhohlo tša tumelo ya gago. Bjang? Temana e latelago e hlalosa gore Jes 30:21: “Gomme ditsebe tša lena ka noši di tla kwa lentšu ka morago ga lena le re: “Tsela še. Sepelang ka yona.’” Lehono, Jehofa o romela “lentšu” la gagwe ka Mangwalo le ka dikgatišo tša “molaki e a bôtêxaxo yo bohlale.” (Mat. 24:45) Go na le lehumo la bohlale dihlogong tše fetilego tša Morokami di nnoši, tšeo di bolelago ka mo e nyakilego e le sebopego se sengwe le se sengwe sa bophelo bja Bokriste. Go boeletša tšeo di tsopotšwego ka go Go Hlahloba Mangwalo go go thuša gore o age polokelo ya tsebo yeo e lego bohlokwa kudu ge go lebeletšanwe le diteko tša mehuta ka moka.—Jes. 48:17.
3 Itirele Nako ya Gona: Gaešita le ge dinako tša mesong e be e le tša leema-ema, mma yo mongwe o ile a kgonthiša gore o a bala le go ahla-ahla temana le ditlhaloso le morwa wa gagwe ge morwa a dutše a e-ja sefihlolo. Mantšu a gotee le thapelo e be e le mantšu a mafelelo ao a bego a a kwa mesong e mengwe le e mengwe pele a e-ya sekolong. A ile a mo matlafatša gore a ganetše ditšhišinyong tša mabapi le kopano ya botona le botshadi, gore a tšee boemo bja go se kwanantšhe ge a lebeletšane le botšhaba le go nea bohlatse ka sebete go barutwana le barutiši ka mo go swanago. Gaešita le ge e be e le yena Hlatse a nnoši sekolong, le ka mohla ga se a ka a ikwa a nnoši.
4 Retologela go Jehofa le Lentšung la gagwe bakeng sa tayo le tlhahlo. Ge e ba o dira bjalo, Jehofa e tla ba motho wa kgonthe go wena, bjalo ka mogwera yo a botwago. Retologela go yena letšatši le lengwe le le lengwe! Gotee le ba bangwe ba dimilione lefaseng ka moka bao ba hlahlobago Lentšu la Modimo letšatši le letšatši, eka o ka hwetša gore mahlo a gago e ba ‘mahlo ao a bonago Mohlahli wa gago yo Mogolo.’