Na ke Lepheko Boboleding?

¹ Batho ba bantši ba phela maphelo a leema-ema. Dihlatse tša Jehofa di gare ga bao ba swaregilego kudu—di ithuta Lentšu la Modimo, di ba gona dibokeng tša phuthego le go ba le karolo tirelong ya tšhemo. Go oketša moo, re swaregile ka go hlokomela mošomo wa boiphedišo, mošomo wa ka ntlong goba mošomo wa sekolo le maikarabelo a mangwe a mantši ao ka moka a nyakago nako. Se ke tlhohlo kudu-kudu go dihlogo tša malapa.

² Ka baka la maemo a sa kgahlišego a tša boiphedišo mafelong a fapa-fapanego, dihlogo tša malapa di ka swanelwa ke go šoma diiri tše telele le go šoma ka thata bakeng sa go iphediša. Ge mešomo e nyakago mo gontši ya tša boiphedišo e tšea nako ya tšona le matla, di na le nako e nyenyane e šetšego bakeng sa modiro wa boboledi. Ka ge di e-na le boikarabelo bja go hlokomela malapa a tšona ka dilo tše di bonagalago, tše dingwe di ka ikwa gore di ka ba feela le karolo e lekanyeditšwego bodireding. (1 Tim. 5:8) Ka ntle le pelaelo, lehono go na le dikgateletšo tše dintši tšeo di tswalanago le go hwetša dinyakwa tša bophelo. Eupša mošomo wa motho wa boiphedišo ga se wa swanela go fetoga lepheko go boleleng ditaba tše dibotse. (Mar. 13:10) Lega go le bjalo, re swanetše go hlahloba boemo bja rena bja kgonthe.

³ Ka ge boemo bja lefase ka mehla bo a fetoga, hlogo ya lapa e ka sekamela go fetšeng nako e ntši kudu mošomong, ka tebelelo ya go oketša tšhelete e beelwago ka thoko bakeng sa mathata a sa letelwago. (1 Ba-Kor. 7:31) Gaešita le ge mošomo wa boiphedišo o oketšegilego o ka bonagala o nea dilo tše di oketšegilego tša boiphedišo goba dibaka tše di oketšegilego tša boitšhidullo le boithabišo, na se se tla dira gore lapa le thabe kudu le go kgotsofala kudu ge e ba se se dirwa ka go gafa nako bakeng sa mediro ya moya le go ba gona ka mehla dibokeng? Ka ntle le pelaelo re tla nyaka go phema selo le ge e le sefe seo se tla beago boemo bja rena bja moya kotsing. Go kwa keletšo ya Jesu ya ‘go ikgobelela mahumo legodimong’ le go ‘ruela Modimong’ ke tsela e bohlale.—Mat. 6:19-21; Luka 12:15-21.

⁴ Tsoma Dikgahlego tša Mmušo Pele: Jesu o rutile balatedi ba gagwe go etiša ditaba tša moya pele ga selo se sengwe le se sengwe. O ile a ba kgothatša ka gore: “Ké xôna lesang xo belaêla la re: Re tlo ja’ng? Re tlo nwa’ng? Re tlo apara’ng?” Ke ka baka la’ng a be a ka bolela seo? O hlalositše gore: “Xe e le Tataweno wa maxodimong ó tseba xobane le lena tšeo ka moka Le phela ka tšôna.” Ge e ba re kgodišegile e le ka kgonthe ka seo, go ka se be le lepheko leo le tla re thibelago go dira seo Jesu a se boletšego ka morago ga moo gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.” Modimo o tla kgonthišega gore re na le dilo tše bohlokwa! (Mat. 6:31-33) Ye ka ntle le pelaelo ga se nako ya go šitišwa ke dipelaelo tše di sa swanelago ka go iphediša goba ka kganyogo ya go dula ka boiketlo tshepedišong ya dilo yeo kgaufsinyana e tlago feta.—1 Pet. 5:7; 1 Joh. 2:15-17.

⁵ Morero o mogolo wa mošomo wa boiphedišo ke go hlokomela dinyakwa tša motho tša dilo tše di bonagalago. Eupša re nyaka mo go kaaka’ng? Moapostola Paulo o ngwadile gore: “Xe re na le dijô le diaparô, a re kxolweng ke tšôna.” Na re leka go hwetša mo gontši go feta moo? Ge e ba go le bjalo re ka buna mafelelo ao Paulo a lemošitšego ka ona gore: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.” (1 Tim. 6:8, 9; Mat. 6:24; Luka 14:33) Re ka tseba bjang ge e ba re šitišwa ke dikganyogo tše di feteletšego?

⁶ Ge e ba ka lebaka la mešomo ya rena ya boiphedišo re e-ba le tekanyo e lekanyeditšwego feela tirelong ya tšhemo goba re palelwa ke go bona go nyakega ga go ikgafa bakeng sa ditaba tše dibotse gona go nyakega gore re kaonefatše dilo tšeo di tlago pele. (Ba-Heb. 13:15, 16) Mokgwa o bonolo wa bophelo e tla ba o thušago kudu bakeng sa go fokotša lepheko le boboleding bja rena. Dikgahlego tša mmušo ka mehla di swanetše go tla pele ge go tliwa tabeng ya go dirišwa ga nako ya rena le matla.

⁷ Go Itapiša mo e Sego ga Lefela: Mantšu a Paulo a re kgothaletša gore ka mehla re be le “go gontši mo re swanetšego go go dira modirong wa Morena, re tseba gore go itapiša ga rena ga se ga lefela Moreneng.” (1 Ba-Kor. 15:58, NW) ‘Modiro wa Morena’ o mogolo ke go bolela ka Mmušo le go dira barutiwa. (Mat. 24:14; 28:19, 20) Bakeng sa go ba le karolo e tletšego ka mo go kgonegago, re swanetše go rulaganya nako bakeng sa tirelo ya tšhemo beke e nngwe le e nngwe le go katanela go se dirišetše nako yeo bakeng sa mošomo o mongwe. (Ba-Ef. 5:15-17) Ka gona, ga go mošomo wa boiphedišo goba selo le ge e le sefe se sengwe seo e tlago go ba lepheko bodireding bja rena.

⁸ Ge re ineela go tšeeng karolo go abelaneng ditherešo tša Beibele le ba bangwe, re hwetša lethabo le legolo le le tlišwago ke go nea. (Dit. 20:35) Ka go phegelela modiro wa go bolela ka Mmušo, re ka lebelela bokamosong ka kgodišego, “xobane Modimo xa a bebe motho, xa a lebale medirô ya [rena], le leratô le [re] itapišitšexo ka lôna ’ineng la xaxwe.”—Ba-Heb. 6:10.