E-ba Mafolofolo ge o ‘Nea Bohlatse ka Botlalo’
1, 2. Ke’ng seo se go kgahlago tabeng ya kamoo Paulo a bego a lebelela go bolela ditaba tše dibotse ka gona, gomme re ka ekiša bjang mohlala wa gagwe wa go ‘nea bohlatse ka botlalo’?
1 Go swana le Jesu le bahlanka ba bangwe ba bantši ba botegago ba bogologolo, moapostola Paulo e be e le mmoledi yo a fišegago wa ditaba tše dibotse, a ‘nea bohlatse ka botlalo’ go sa šetšwe maemo. Gaešita le ge a be a golegilwe ka ngwakong, o ile “a amoxêla bohle ba ba tlaxo xo yêna. A kwatša tša mmušô wa Modimo, a ruta tša Morêna Jesu Kriste ka mafolofolo a maxolo.”—Dit. 28:16-31.
2 Le rena re ka ba mafolofolo ka dinako tšohle ge re ‘nea bohlatse ka botlalo.’ Go ba mafolofolo go akaretša go nea bohlatse bathong bao re gahlanago le bona ge re le mabenkeleng, mošomong, sekolong le ge re le maetong a go ya le go boa dikopanong tše dinyenyane le tše dikgolo.—Dit. 28:23; Ps. 145:10-13.
3. Ke bjang re ka phemago go dira modiro wa rena wa go nea bohlatse bjo bo sa rulaganyetšwago ka sewelo?
3 Bohlatse bjo bo sa Rulaganyetšwago ke Eng? Bohlatse bjo bo sa rulaganyetšwago ga se selo sa go fo itlela se sa letelwa goba ntle le morero, bjalo ka ge eka se be se sa rulaganywa goba e se sa bohlokwa. Ruri se ga se hlalose bodiredi bja rena le gatee. Go nea Modimo letago ka bodiredi bja rena go bohlokwa go rena go etša ge go bile bjalo go Paulo, gomme re swanetše go ikemišetša go nea bohlatse kae le kae moo go swanetšego. Lega go le bjalo, mokgwa woo re batamelago batho ba bangwe ka wona o ka hlaloswa gabotse e le wo o sa rulaganyetšwago—e lego mokgwa wa go iketla, wa bogwera le wa tlhago. Mokgwa wo o ka ba le mafelelo a mabotse.
4. Ke’ng seo se ilego sa dira gore Paulo a kgone go nea bohlatse lefelong leo a bego a dula go lona?
4 Lokišeletša go Nea Bohlatse: Paulo o ile a swanelwa ke go bula dibaka tša go nea bohlatse ge a be a golegilwe ka ntlong kua Roma. A le lefelong la gagwe la bodulo, o ile a gata mogato wa pele wa go laletša baetapele ba ba-Juda ba tikologong yeo ntlong ya gagwe. (Dit. 28:17) Gaešita le ge phuthego ya Bokriste e be e le gona kua Roma, Paulo o ile a lemoga gore setšhaba sa ba-Juda seo se bego se le motseng woo se be se sa tsebe mo gontši gakaalo ka tumelo ya Bokriste. (Dit. 28:22; Ba-Roma 1:7) Ga se a ka a gogela morago ge a be a ‘nea bohlatse ka botlalo’ ka Jesu Kriste le ka Mmušo wa Modimo.
5, 6. Ke dibaka dife tša go nea bohlatse bjo bo sa rulaganyetšwago tšeo re ka bago le tšona, gomme re ka dira ditokišetšo dife bakeng sa go dira bjalo ka katlego?
5 Nagana ka batho ka moka bao o ka gahlanago le bona ge o le leetong bao ba sa tsebego mo gontši gakaalo ka Dihlatse tša Jehofa. Ba ka no ba ba sa tsebe gore re swara dithuto tša legae tša Beibele tše sa lefelelwego. E-ba komana madula-a-bapile bakeng sa go nea bohlatse go bao o gahlanago le bona ge o dutše o tšea leeto, o eme mafelong a go ikhutša, o tšhela makhura, o le mabenkeleng, o le dihoteleng, o e-ja mabenkeleng a go jela, o sepela ka dinamelwa tša batho bohle le ge o dira tše dingwe. Lokišetša e sa le pele seo o ka se bolelago bakeng sa go thoma poledišano le go nea bohlatse bjo bokopana. Mohlomongwe o ka itlwaetša matšatšing a latelago ka go nea bohlatse bjo bo sa rulaganyetšwago go baagišani ba gago, ba leloko, bašomi-gotee le ba bangwe bao o tlwaelanego le bona.
6 O tla swanelwa ke go ba le sesola sa dikgatišo tšeo o tlago go di diriša ge o nea bohlatse bjo bo sa rulaganyetšwago. Ke dife? O ka no diriša pampišana ya Na o tla Rata go Tseba mo go Oketšegilego ka Beibele? Lebiša tlhokomelo dirapeng tše hlano tše di thomago tšeo go tšona go newago mabaka a fapa-fapanego a go bala Beibele. Bontšha setlankana seo se lego ka morago bakeng sa go kgopela thuto ya legae ya Beibele e sa lefelelwego. Ge o hwetša motho yo a arabelago gabotse, mo sepedišetše poroutšha ya Seo Modimo a se Nyakago. Ka ge go ka direga gore o gahlane le batho bao ba bolelago leleme lešele, e-ba le pukwana ya Good News for All Nations. Letlakaleng la bobedi e hlalosa kamoo o ka e dirišago ka gona bakeng sa go nea bohlatse. Ge e ba o sepela ka koloi, o ka kgona go tšea dikgatišo tše dingwe tše mmalwa tša motheo bakeng sa bao ba bontšhago kgahlego ya kgonthe molaetšeng wa Mmušo.
7, 8. Ke’ng seo re swanetšego go se šetša mabapi le ponagalo ya rena gotee le boitshwaro ge re tšea leeto le nakong ya boitapološo?
7 Ela Hloko Ponagalo ya Gago Gotee le Boitshwaro: Re swanetše go kgonthišetša gore boitshwaro bja rena gotee le moaparo wa rena di ka se dire gore batho ba re lebelele ka tsela e fošagetšego goba tša ba dira gore ba ‘bolele gampe’ ka mokgatlo wa Jehofa. (Dit. 28:22, bapiša le NW.) Se ga se šome feela ge re e-ya dibokeng, dikopanong tše dikgolo goba tše dinyenyane, eupša le ge re tšea leeto le nakong ya boitapološo. Morokami wa August 1, 2002 go letlakala 18, serapa 14, o ile wa lemoša ka gore: “Ponagalo ya rena ga se ya swanela go ba ya bomponeng, ya mohuta o sa tlwaelegago, yeo e tsošago dikganyogo tša botona le botshadi, yeo e bonatšago tša ka gare goba yeo e lego fešeneng. Go oketša moo, re swanetše go apara ka tsela yeo e bontšhago ‘borapedi.’ Se se re nea selo se re ka naganišišago ka sona, na ga go bjalo? Ga se feela taba ya go apara ka tsela e swanetšego ge re e-ya dibokeng tša phuthego [goba lenaneong la kopano] ke moka re sa bontšhe go tshwenyega ka moaparo wa rena ka dinako tše dingwe. Ponagalo ya rena ya motho ka noši ka mehla e swanetše go bontšha boemo bja kgopolo bja borapedi le bjo bo hlomphegago ka gobane re Bakriste le badiredi diiri tše 24 ka letšatši.”—1 Tim. 2:9, 10.
8 Re swanetše go apara ka bothakga le ka tsela ya seriti. Ge e ba ka mehla ponagalo ya rena le boitshwaro di bonagatša tumelo ya rena go Modimo, le ka mohla re ka se ke ra lewa ke dihlong tša go nea bohlatse bjo bo sa rulaganyetšwago ka gobane ponagalo ya rena ka noši e sa amogelege bakeng sa modiredi.—1 Pet. 3:15.
9. Paulo o bile le katlego efe ge a be a nea bohlatse kua Roma?
9 Bohlatse bjo bo sa Rulaganyetšwago bo Tšweletša Dienywa: Nywageng e mebedi yeo Paulo a bego a golegilwe ka ntlong kua Roma, o ile a ba le mafelelo a mabotse maitekong a gagwe a go nea bohlatse. Luka o begile gore “ba bangwê ba bôná ba [ile ba] dumêla tše a di boletšexo; ba bangwê ba se dumele.” (Dit. 28:24) Paulo ka boyena o ile a bona katlego ya gagwe ya go nea ‘bohlatse ka botlalo’ ge a be a ngwala gore: “Tše di ntirexetšexo di thušitše xaxolo-xolo xo tšweletša Ebangedi pele. Mo ngwakong ka moka wa kahlolô, le xo ba bangwê, xwa bá xwa bônala xe ditlêmô tša-ka è le tša xa Kriste. Ba bantši ba bana ba bô-rena Moreneng ba tšea kholofêlô ka ditlêmô tša-ka, ba napa ba tlêma pelo ba tiišetša xo bolêla Lentšu bà sa boife.”—Ba-Fil. 1:12-14.
10. Banyalani ba bangwe ba bile le katlego efe ngwagola ge ba be ba nea bohlatse?
10 Ngwagola ka morago ga gore banyalani ba bangwe ba fetše letšatši ka moka kopanong ya selete, ba ile ba ba le phihlelo e thabišago ya go nea bohlatse bjo bo sa rulaganyetšwago go mosadi yo a tlišago dijo yo a ilego a ba botšiša potšišo mabapi le dipetšhe tša bona tša kopano. Ba ile ba mmotša ka kopano le ka kholofelo yeo Beibele e e neago ka bokamoso bja batho. Ba ile ba mo nea pampišana ya Na o tla Rata go Tseba mo go Oketšegilego ka Beibele? gomme ba mo hlalosetša ka thulaganyo ya thuto ya legae ya Beibele e sa lefelelwego. Mosadi yo o ile a ba botša gore o be a nyaka motho yo a ka mo etelago, a ngwala leina la gagwe le aterese ka morago ga pampišana gomme a kgopela banyalani bao gore ba dire dithulaganyo. Ke katlego efe yeo o ka e thabelago ge o ‘nea bohlatse ka botlalo’ ka mafolofolo?
11. Ke dika dife tšeo re swanetšego go di hlagolela bakeng sa go tšwetša pele ditaba tše dibotse ka go ‘nea bohlatse ka botlalo’?
11 Tšwetša Pele Ditaba tše Dibotse ka Botlalo: Nagana kamoo Paulo a bego a thabile ka gona ge a e-kwa gore Bakriste-gotee le yena ba be ba ekiša phišego ya gagwe! Eka re ka dira sohle seo re ka se kgonago go tšwetša pele ditaba tše dibotse ka go nea bohlatse bjo bo sa rulaganyetšwago ka ditumelo tša rena tšeo di theilwego Beibeleng.
[Lepokisi go letlakala 3]
Dikgatišo tše di Nyakegago Bakeng sa go Nea Bohlatse bjo bo sa Rulaganyetšwago
■ Na o Tla Rata go Tseba mo go Oketšegilego ka Beibele? (pampišana)
■ Ke Eng Seo Modimo a se Nyakago go Rena? (poroutšha)
■ Good News for All Nations (pukwana)
■ Dikgatišo tše dingwe tša motheo
[Lepokisi go letlakala 4]
O se ke wa ba Lebala!
O se ke wa lebala batho ka moka bao ba bego ba le gona Segopotšong sa lehu la Kriste goba polelong e kgethegilego. Na re ba laleditše gore ba be gona dibokeng Holong ya Mmušo? Mohlomongwe ba bantši ba bona ba ka ba gona ge e ba ba kgothaletšwa ka tsela e lerato. Ge ba dutše ba thabela bogwera bjo bo agago dibokeng le lenaneo leo le kgothatšago la moya, ba tla gogelwa kgaufsi le Jehofa le mokgatlo wa gagwe. Ke ka baka la’ng o sa ba laletše gomme o bone ge e ba ba ka ba gona? Ba nee dintlha ka botlalo tšeo ba di nyakago, go akaretša dinako tša diboka le kamoo diboka tše di fapa-fapanego di swarwago ka gona.