Na O Tla Tšea Karolo Go Neeng Bohlatse Bjo Bo Sa Rulaganyetšwago?

1 Mokgwa wa rena wa ka mehla wa go phela o akaretša dinako tše dingwe tša go boledišana le batho ka Jehofa. Re beela ka thoko nako ya go nea bohlatse bjo bo rulaganyeditšwego ka ntlo le ntlo, go dira maeto a go boela le go swara dithuto tša Beibele. Lega go le bjalo, go na le mabaka a mantši ao a sego a rulaganyetšwa ka go lebanya, nakong yeo re ka kgonago go boledišana le batho ka therešo. Boboledi bjo re bo bitša go nea bohlatse bjo bo sa rulaganyetšwago.

2 Bagoeledi ba bangwe ba hwetša dibaka tše dintši tša go tsenela sebopego se sa bodiredi. Nagana ka ditsela tša go nea bohlatse go baeng, go ba leloko, go badiri-gotee, go bao re tsenago le bona sekolo, go bao re gahlanago le bona mabenkeleng le go bao re gahlanago le bona magareng ga magae goba mejakong ge re le tirelong ya tšhemo. Na o tla diriša sebaka se ka mo go holago bakeng sa go nea bohlatse bjo bo sa rulaganyetšwago?

3 Rulaganya e sa le Pele: Go itokišetša le go naganišiša e sa pele go tla re thuša go nea bohlatse bjo bo sa rulaganyetšwago ka tsela e atlegago. Tabeng ye re hlamilwe ka dipuku tša mehuta-huta bakeng sa go re thuša gore re phethe se. Ka ntle le Morokami le Phafoga! re na le dipampišana tše mmalwa tšeo di nago le dihlogo tšeo di tanyago mogopolo kudu bakeng sa go tsoša kgahlego. Go na le dipukwana tšeo batho ba ditlogo le madumedi ao a fapa-fapanego ba di thabelago. Le gona, re na le dipuku tše di lekanago potla tša letlalo le thata tšeo di akaretšago ditaba tšeo di kgahlišago tša mo nakong ye. Ke dipuku dife tšeo o ikwago gore o a lokologa ge o di diriša? Naganišišang ka se le le lapa. Ke moka, le itlwaetše seo le tlago go se bolela ge sebaka se swanetšego se bulega.

4 Nakong ya Maikhutšo: Nako e botse kudu ya go nea bohlatse bjo bo sa rulaganyetšwago ke ge o le maikhutšong. Na o nagana ka go tšea leeto ka sefofane, setimela goba pese? Gona, sepela le Beibele le e nngwe ya dipuku tšeo di boletšwego ka mo godimo. Go bala dipuku tše bjalo dinamelweng tša bohle gantši go tsoša poledišano. Ge e ba o sepela ka koloi, nagana ka seo o tlago go se bolela ge o fihla moo go tšhelwago peterole goba lebenkeleng la bojelo goba ge o le hoteleng. Mabaka a bjalo o ka a swarela sesola sa dimpampišana go wena gore o di nee batho bao ba thabelago. Ge e ba o le lebopong goba phakeng e botse, mohlomongwe o ka thoma ka go nea motho o mongwe bohlatse ka go mmotšiša gore: “Na go be go ka se be botse ge lefase ka moka le be le ka ba ka tsela ye?”

5 Go ba Leloko: Gantši ba leloko ba a tseba gore re Dihlatse tša Jehofa. Mo gongwe ba ka ba ba fagahlela go tseba ka ditumelo goba mediro ya rena, fela ba tšhaba go botšiša ka ge ba sa nyake go ‘rerelwa’ goba go swarelelwa poledišanong e telele. Ke ka baka la’ng o sa bolele se sengwe mabapi le therešo gomme ka morago o nee ba leloko sebaka sa go tšwela pele ka poledišano ge e ba ba nyaka? Goba mo gongwe o ka fo bolela moo o ilego wa ya kopanong gona la mafelelo gomme o ba bontšhe e nngwe ya ditokollo tše mpsha. Bafsa gantši ba theetšwa ke ba leloko.

6 Re swanetše go phafogela dibaka tša go nea bohlatse bjo bo sa rulaganyetšwago ka dinako ka moka. Lega go le bjalo, gopola bohlokwa bja go bontšha segwera le kgahlego ya kgonthe go motho o mongwe. (Die. 15:23; 1 Pet. 3:15) Mokgwa wo wa boboledi o enya dienywa, gomme bahlanka ba Jehofa ba swanetše go kopanela go ona. Bjalo ka Jesu, eka lerato la rena go magagabo rena le ka re tutueletša go bolela ka sebete lebakeng le lengwe le le lengwe leo le swanetšego!—Mat. 5:14-16.