Lebaka Leo ka Lona re Nyakago Thuto ya Puku ya Phuthego
1. Thulaganyo ya Thuto ya Puku ya Phuthego e ile ya thongwa bjang?
1 Ka 1895, dihlopha tša thuto tša Barutwana ba Beibele, ka ge Dihlatse tša Jehofa di be di bitšwa bjalo ka nako yeo, di be di tsebja e le Dawn Circles for Bible Study. Dibolumo tša Millennial Dawn di be di dirišwa e le motheo wa thuto. Ka morago, dihlopha tše tša thuto di ile tša bitšwa Berean Circles for Bible Study. (Dit. 17:11) Gantši sehlopha se senyenyane se be se kopana legaeng la motho mantšiboeng ao sehlopha se ka kgonago go ba gona. Diboka tše e be e le diketapele tša Thuto ya Puku ya Phuthego.
2. Re ka tsenya bjang letsogo go ‘kgothatšaneng’ thutong ya puku?
2 Kgothatšo le Thušo: Ka ge dihlopha tša thuto ya puku di dirwa gore e be tše dinyenyane ka morero, go na le sebaka se segolo bakeng sa bao ba bago gona gore ba bolele ka tumelo ya bona phatlalatša. Se se feleletša ka gore “go be le go kgothatšana . . . , yo mongwe le yo mongwe ka tumelo ya yo mongwe.”—Ba-Roma 1:12, NW.
3, 4. Thulaganyo ya thuto ya puku e re thuša bjang go phethagatša bodiredi bja rena?
3 Go ela hloko tsela yeo molebeledi wa thuto ya puku a rutago ka yona go ka re thuša gore re ‘rathe Lentšu la therešo re sa kgopamiše.’ (2 Tim. 2:15) Ela hloko tsela yeo a gatelelago kamoo taba e theilwego Mangwalong ka gona. A ka gatelela dintlha tše dikgolo ka go diriša poeletšo ya go phetha, a diriša Beibele feela, ge e ba seo se swanetše kgatišong yeo e ithutwago. Mohlala wa gagwe o mobotse o ka re thuša gore re kaonefatše mokgwa wa rena wa go ruta bodireding bja Bokriste.—1 Ba-Kor. 11:1.
4 Go oketša tabeng ya go swara thuto ya beke le beke, molebeledi wa thuto ya puku o etelela pele modirong wa boebangedi. Ka go dirišana le molebeledi wa tirelo, molebeledi wa thuto ya puku o dira dithulaganyo tše di šomago bakeng sa tirelo ya tšhemo. O tsoma go thuša bohle bao ba lego sehlopheng go phethagatša boikarabelo bja bona bja Bokriste bja go bolela ditaba tše dibotse le go dira barutiwa.—Mat. 28:19, 20; 1 Ba-Kor. 9:16.
5. Ke thušo efe ya motho ka noši yeo e hwetšagalago thutong ya puku?
5 Molebeledi wa thuto ya puku o kgahlegela katlego ya moya ya yo mongwe le yo mongwe sehlopheng. O bontšha kgahlego ye dibokeng tša phuthego le ge a šoma le ba bangwe tirelong ya tšhemo. Gape o diriša dibaka tša ge a etetše bana babo rena magaeng a bona go abelana le bona mpho ya moya. Ka moka ba swanetše go ikwa ba amogelega gore ba batamele molebeledi wa thuto ya puku bakeng sa thušo ya moya le ge e le neng ge ba e nyaka.—Jes. 32:1, 2.
6. (a) Bana babo rena dinageng tše dingwe ba ile ba matlafatšwa bjang ke go bokana ka dihlopha tše dinyenyane? (b) Na wena ka noši o holegile bjang thulaganyong ya thuto ya puku?
6 Matlafatšanang: Dinageng tšeo go tšona modiro wa batho ba Modimo o thibetšwego, bana babo rena gantši ba bokana ka dihlopha tše dinyenyane. Ngwanabo rena yo mongwe o ile a gopola ka gore: “Gaešita le ge mediro ya rena ya Bokriste e be e thibetšwe, re be re swara diboka tša rena tša beke le beke ka dihlopha tša magareng ga ba 10 le 15 nako le nako ge go kgonega. Re be re hwetša matla a moya dibokeng, thutong ya rena ya Beibele gotee le dipokanong tša rena tša bogwera ka morago ga thuto. Re be re bapiša diphihlelo tša rena, gomme se se re thušitše go lemoga gore yo mongwe le yo mongwe wa rena o be a e-na le bothata bjo bo swanago.” (1 Pet. 5:9) Eka le rena ka mo go swanago, re ka matlafatšana ka go thekga ka botlalo thulaganyo ya Thuto ya Puku ya Phuthego.—Ba-Ef. 4:16.