Kamoo o ka Holwago ke Sehlopha sa Gago sa Tirelo ya Tšhemo
1. Ke mehola efe ya Thuto ya Puku ya Phuthego yeo e sa dutšego e hwetšagala sehlopheng sa rena sa tirelo ya tšhemo?
1 Na o hlologela dibopego tše itšego tša Thuto ya Puku ya Phuthego? Dihlopha e be e le tše dinyenyane gomme boemo e le bjo iketlilego kutšwanyana. Se se ile sa dira gore go be bonolo go hlagolela bogwera bjoo bo re thušitšego go dula re matlafetše tumelong. (Die. 18:24) Molebeledi wa thuto ya puku o be a tseba maemo a rena a moswananoši gomme o be a ka re kgothatša ka go lebanya. (Die. 27:23; 1 Pet. 5:2, 3) Mehola ye e sa dutše e hwetšagala sehlopheng sa rena sa tirelo ya tšhemo.
2. Re ka gata mogato bjang gore re hlagolele segwera se se matlafatšago tumelo sehlopheng seo re lego go sona sa tirelo ya tšhemo?
2 Gata Mogato wa Pele: Gantši bogolo bja dihlopha tša tirelo ya tšhemo bo lekana le ka moo dihlopha tša thuto ya puku di bego di le ka gona. Ge o šoma le ba bangwe ka go ‘bapelana’ bodireding, o ka feleletša ka go ba le segwera sa kgauswi le bona. (Bafil. 1:27) Ke batho ba bakae bao ba lego sehlopheng sa gago bao o kilego wa šoma le bona? Na o ka ‘katološa lerato la gago’ tabeng ye? (2 Bakor. 6:13) Go oketša moo, nako le nako re ka laletša motho yo mongwe yo re nago le yena sehlopheng gore a be le rena mantšiboeng a Borapedi bja Lapa goba gore re thabele dijo le yena. Diphuthegong tše dingwe, dihlopha tša tirelo ya tšhemo di šiedišana ka go amogela seboledi sa moeng. Bekeng yeo se abetšwego ka yona, sehlopha seo se a bokana gore se thabele dijo le go kgothatšana go sa šetšwe gore seboledi sa moeng se tla kgona go ba gona goba go se bjalo.
3. Re na le dibaka dife tša gore re hwetše maeto a bodiši dihlopheng tša rena tša tirelo ya tšhemo?
3 Gaešita le ge phuthego ga bjale e bokana gabedi feela ka beke, se ga se bolele gore maeto a bodiši a swanetše go fokotšwa. Sehlopheng se sengwe le se sengwe go kgethilwe balebeledi ba dihlopha gore ba kgothatše bagoeledi le go ba tlwaetša bodireding. Ge e ba molebeledi wa sehlopha seo o lego go sona a se a hlwa a šoma le wena bodireding, o re’ng o sa kgopele go šoma le yena? Go oketša moo, gatee ka kgwedi molebeledi wa tirelo o tšea karolo bodireding mafelobekeng a šoma le dihlopha tše di fapafapanego ka phuthegong. Diphuthegong tše dinyenyane tše di nago le dihlopha tše sego kae tša tirelo ya tšhemo, a ka rulaganya go etela sehlopha se sengwe le se sengwe gabedi ka ngwaga. Na o rulaganya gore o tšee karolo bodireding ge a etetše sehlopheng seo o lego go sona?
4. (a) Diboka tša tirelo ya tšhemo di rulaganywa bjang? (b) Ke ka baka la’ng re swanetše go naganela go bula magae a rena bakeng sa diboka tša tirelo ya tšhemo?
4 Gantši go a hola gore sehlopha se sengwe le se sengwe se kopane se nnoši bakeng sa tirelo ya tšhemo mafelobekeng. Ge go na le mafelo a mmalwa ao go kopanwago go ona bakeng sa tirelo ya tšhemo mo e ka bago ka nako e swanago, go ka ba bonolo gore bagoeledi ba tle sebokeng seo gomme ba ye tšhemong. Bagoeledi ba ka rulaganywa kapejana gomme ba thoma go ya tšhemong ka ntle le go dikadika. Le gona seo se dira gore go be bonolo go molebeledi wa sehlopha go šetša bao ba lego sehlopheng sa gagwe. Lega go le bjalo, maemo a ka dira gore dihlopha tše pedi goba go feta moo di kopane gotee. Ge e ba phuthego ka moka e bokana gotee ka Mokibelo wa pele wa kgwedi goba ka morago ga Thuto ya Morokami, gantši go a hola gore sehlopha se sengwe le se sengwe se dule gotee gomme molebeledi wa sehlopha a newe metsotso e sego kae gore a rulaganye sehlopha sa gagwe pele ga ge seboka sa tirelo ya tšhemo se phethwa ka thapelo.—Bona lepokisi leo le rego: “Na o ka Bula Legae la Gago?”
5. Gaešita le ge seboka sa Thuto ya Puku ya Phuthego se fedišitšwe, ke eng seo re ka kgodišegago ka sona?
5 Gaešita le ge seboka sa Thuto ya Puku ya Phuthego se fedišitšwe, Jehofa o tšwela pele go re nea sohle seo re se nyakago gore re dire thato ya gagwe. (Baheb. 13:20, 21) Ka ge re hlokomelwa ke Jehofa, re ka se hloke selo. (Ps. 23:1) Re hwetša ditšhegofatšo tše dintši ka go ba ga rena sehlopheng sa tirelo ya tšhemo. Ge e ba re gata mogato wa pele gomme re ‘bjala ka bontši,’ re tla “buna ka bontši.”—2 Bakor. 9:6.
[Lepokisi go letlakala 6]
Na o ka Bula Legae la Gago?
Diphuthego tše dingwe di kopanya dihlopha tša tirelo ya tšhemo mafelobekeng ka baka la go hlaela ga magae ao go ka kopanwago go ona. Diboka tša tirelo ya tšhemo ke tokišetšo ya phuthego, ka gona go ba le diboka tše ka magaeng a rena e tloga e le tokelo. Na o ka bula legae la gago? O se ke wa tšhaba go bula legae la gago ka baka la gore le nyatšega. Bagolo ba tla naganela moo legae la gago le lego gona le dilo tše dingwe tšeo di swanago le tšeo di bego di naganelwa ge go be go kgethwa lefelo la thuto ya puku. Ge e ba o nyaka go bula legae la gago, tsebiša molebeledi wa sehlopha sa gago.