(1) Potšišo, (2) Lengwalo le (3) Kgaolo

Tsela e bonolo ya go sepediša puku ya Ke Eng Seo ge e le Gabotse Beibele e se Rutago? ke (1) go botšiša potšišo e nyakago pono ya mong wa ntlo, (2) go bala lengwalo le le swanetšego le (3) go bontšha mong wa ntlo kgaolo yeo e lego ka pukung, e ahla-ahlago potšišo yeo o e botšišitšego ka go bala dipotšišo tša matseno tšeo di lego ka tlase ga sehlogo sa kgaolo yeo. Ge e ba mong wa ntlo a e-na le kgahlego, o ka kgona go mmontšha kamoo thuto ya Beibele e swarwago ka gona o diriša dirapa tša mathomo tša kgaolo yeo. Mokgwa wo o ka dirišwa ge go thongwa thuto ya Beibele ketelong ya pele goba leetong la go boela.

◼ “Na o nagana gore go a kgonega gore batho ba e sego selo ba tsebe Mmopi wa rena yo matla ohle go etša ge go boletšwe ka Beibeleng?” Bala Ditiro 17:26, 27, gomme o mo dumelele gore a arabe. Ke moka o mmontšhe kgaolo 1.

◼ “Na o nagana gore go a kgonega go hwetša khomotšo le kholofelo tšeo di boletšwego mo gaešita le ge re e-na le mathata ao re lebeletšanago le wona lehono?” Bala Baroma 15:4, gomme o mo dumelele gore a arabe. Ke moka o mmontšhe kgaolo 2.

◼ “Na o be o tla tliša diphetogo tše ge e ba o be o e-na le matla a go dira bjalo?” Bala Kutollo 21:4, gomme o mo dumelele gore a arabe. Ke moka o mmontšhe kgaolo 3.

◼ “Na o nagana gore bana ba rena ba ka tsoga ba kgonne go thabela maemo ao go bolelwago ka wona kopelong ye ya bogologolo?” Bala Psalme 37:10, 11, gomme o mo dumelele gore a arabe. Ke moka o mmontšhe kgaolo 3.

◼ “Na o nagana gore go tla ka gwa ba le letšatši leo mantšu a a tlago go phethagala ka lona?” Bala Jesaya 33:24, gomme o mo dumelele gore a arabe. Ke moka o mmontšhe kgaolo 3.

◼ “Na o kile wa ipotšiša ge e ba bahu ba tseba seo ba ba phelago ba se dirago?” Mo dumelele gore a arabe. Ke moka o bale Mmoledi 9:5, gomme o mmontšhe kgaolo 6.

◼ “Na o nagana gore go ka kgonega gore letšatši le lengwe re bone baratiwa ba rena ba ba hwilego gape go etša ge Jesu a boletše ditemaneng tše?” Bala Johane 5:28, 29, gomme o mo dumelele gore a arabe. Ke moka o mmontšhe kgaolo 7.

◼ “Na o nagana gore go nyakega’ng e le gore thato ya Modimo e dirwe mo lefaseng bjalo ka ge e direga legodimong go etša ge go bontšhitšwe thapelong ye yeo e tsebjago kudu?” Bala Mateo 6:9, 10, gomme o mo dumelele gore a arabe. Ke moka o mmontšhe kgaolo 8.

◼ “Na o nagana gore re phela nakong yeo go bolelwago ka yona boporofeteng bjo?” Bala 2 Timotheo 3:1-4, gomme o mo dumelele gore a arabe. Ke moka o mmontšhe kgaolo 9.

◼ “Batho ba bantši ba ipotšiša gore ke ka baka la eng go bonagala mathata a batho a mpefala le go feta. Na o kile wa nagana ka seo go bolelwago ka sona mo e le lebaka leo le dirago gore go be bjalo?” Bala Kutollo 12:9, gomme o mo dumelele gore a arabe. Ke moka o mmontšhe kgaolo 10.

◼ “Na o kile wa nyaka go tseba karabo ya potšišo e swanago le ye?” Bala Jobo 21:7, gomme o mo dumelele gore a arabe. Ke moka o mmontšhe kgaolo 11.

◼ “Na o nagana gore go diriša keletšo ye ya Beibele go tla thuša batho go thabela bophelo bja lapa?” Bala Baefeso 5:33, gomme o mo dumelele gore a arabe. Ke moka o mmontšhe kgaolo 14.

Thuto ya Beibele e ka begwa ge e swerwe gabedi ka morago ga ge go bontšhitšwe gore e swarwa bjang le ge go e na le lebaka la go dumela gore thuto e tla tšwela pele.