E Boloke

Dithero tše di Šišintšwego tša Tirelo ya Tšhemo

Diriša ditšhišinyo tše di latelago go go thuša go lokišetša dithero tšeo di akaretšago kgatišo yeo e sepedišwago kgweding.

Batamela Kgaufsi le Jehofa

“Batho ba bantši bao ba dumelago go Modimo ba rata go ikwa ba mmatametše. Na o be o tseba gore Modimo o re laletša gore re mmatamele? [Bala Jakobo 4:8.] Kgatišo ye e hlametšwe go thuša batho gore ba diriše Beibele ya bona gore ba batamele Modimo.” Bala serapa 1 go letlakala 16.

“Go hloka toka go aparetše lehono. Go bjalo ka ge go hlalositšwe mo. [Bala Mmoledi 8:9.] Ba bantši ba ipotšiša ge e ba Modimo a e na le taba le batho. [Bala mafoko a mabedi a mathomo a serapa 4 go letlakala 119.] Kgaolo ye e hlalosa lebaka leo ka lona Modimo a dumeletšego gore go hloka toka go tšwele pele ka nako e teletšana.”

Dulang le Phakgame!

“Batho ba bantši ba tshwenyegile ka mathata a magolo le ditiragalo tše di setlago pelo tšeo di tlwaelegilego lehono. [Bolela ka mohlala o tsebjago lefelong la geno.] Na o be o tseba gore dilo tše bjalo ke karolo ya leswao la lefase ka bophara leo le bontšhago gore mmušo wa Modimo o kgaufsi le go laola ditaba tša lefase? [Dumelela karabo. Ke moka bala lengwalo le le swanetšego, le bjalo ka Mateo 24:3, 7, 8; Luka 21:7, 10, 11 goba 2 Timotheo 3:1-5.] Poroutšha ye e ahla-ahla lebaka leo ka lona e lego mo go akgofilego ka mo kgethegilego gore re phafogele seo se bolelwago ke ditiragalo tše gona bjale.”

“Ba bantši lehono ba gateleditšwe ke ditiragalo tše di setlago pelo goba ke go lahlegelwa ga bona ka noši mo go kwešago bohloko. Ba bangwe ba ipotšiša gore ke ka baka la’ng Modimo a sa tsene ditaba gare gore a thibele dilo tše bjalo. Beibele e re kgonthišetša gore go se go ye kae Modimo o tla gata mogato bakeng sa go fediša tlaišego ya batho. [Bala Kutollo 14:6, 7.] Ela hloko gore kahlolo ya Modimo e tla bolela’ng go batho. [Bala 2 Petro 3:10, 13.] Poroutšha ye e na le tsebišo e oketšegilego ka taba ye e bohlokwa.”

Tsebo e Išago Bophelong bjo bo sa Felego

“Ge e ba o be o ka laletšwa go phela tikologong e botse ka tsela ye, na o be o ka amogela taletšo yeo? [Bontšha seswantšho se se lego go matlakala 4-5 gomme o dumelele karabo.] Ela hloko seo Lentšu la Modimo le se bolelago e le senotlelo sa go thabela mohuta wo wa bophelo ka mo go sa felego. [Bala Johane 17:3.] Puku ye e tla go thuša gore o hwetše tsebo e išago bophelong bjo bo sa felego.” Rulaganya gore o ahla-ahle dirapa tše hlano tša mathomo tša kgaolo 1 ketelong ya gago e latelago.

Bula seswantšho se se lego go matlakala 188-9, gomme o diriša mantšu a lego moo, botšiša mong wa ntlo gore: “Na o holofela go phela paradeiseng, ge tsebo ya go tseba Modimo e tla ba e tletše lefase? [Dumelela karabo. Ke moka bala Jesaya 11:9.] Puku ye e tla go thuša go ithuta seo Beibele e se bolelago ka Paradeise le kamoo re ka bago karolo ya yona.” Rulaganya go ahla-ahla dirapa 11-16 tša kgaolo 1 ketelong e latelago.

Ithute go Morutiši yo Mogolo

“Na o nagana gore lefase e be e tla ba lefelo le lekaone ge nkabe batho ba be ba phela ka go dumelelana le mantšu a? [Bala Mateo 7:12a. Ke moka o dumelele karabo.] Puku ye e hupere dithuto tše dintši go tšwa go morutiši yo mogolo kudu yo a kilego a phela.” Gatelela diswantšho le ditlhaloso tša tšona go kgaolo 17.

“Batswadi ba bantši lehono ba leka go tsenya ditekanyetšo tše di holago baneng ba bona. Na o nagana gore se se bohlokwa? [Dumelela karabo. Ke moka bala Diema 22:6.] Ela hloko gore batswadi ba kgothaletšwa go thoma go tlwaetša bana ba bona e sa le ba banyenyane. Puku ye e hlametšwe go ba thuša go dira seo.” Gatelela diswantšho le ditlhaloso tša tšona go kgaolo 15 goba 18.

“Gantši batswadi ba makatšwa ke dipotšišo tšeo bana ba di botšišago. Tše dingwe tša dipotšišo tšeo go ka ba thata go di araba, na ga go bjalo? [Dumelela karabo. Ke moka bala Ba-Efeso 6:4.] Puku ye e ka thuša batswadi gore ba arabe dipotšišo tša bana ba bona lehono.” Gatelela tše dingwe tša diswantšho le ditlhaloso tše di lego go dikgaolo 11 le 12 goba 34 go ya go 36.

Go Tsoma ga Batho Modimo

“Ka ge go e-na le madumedi a mantši gakaakaa lehono, na o kile wa ipotšiša gore re ka tseba bjang bjo bo amogelwago ke Modimo?” Ka morago ga karabo, phetla go letlakala 377. Gatelela ntlha ya 7, gomme o botšiše ge e ba mong wa ntlo a dumela gore bodumedi bja therešo bo swanetše go kopanya merafo ka moka ya batho. Lebelela le lengwe la mangwalo ao a bontšhitšwego, gomme ge nako e dumela, ahla-ahla tše dingwe tša dintlha tšeo di lego lelokelelong. Sepediša puku ge e ba go e na le kgahlego e le ka kgonthe. Ge o tloga, o ka botšiša gore, “Bodumedi bja kgonthe bo swanetše go kgoma boitshwaro bja motho bjang?” Rulaganya leeto la go boela bakeng sa go araba potšišo yeo.

Ge e ba motho a ipolela gore ke setho sa sehlopha se segolo sa bodumedi, o ka re: “Ke mo go thabišago go kopana le batho ba madumedi a fapa-fapanego. Batho ba tsomile Modimo ka ditsela tše dintši tše di sa swanego. [Ge e ba e le mo go swanetšego, bala Ditiro 17:26, 27.] Batho gantši ba latela bodumedi bja batswadi ba bona. [Bala serapa 12 go letlakala 8.] Go ithuta ka mo go oketšegilego ka madumedi a mangwe ke mo go hlabišago seetša le mo go rutago. Puku ye e hlalosa mathomo, mekgwa le dithuto tša madumedi a magolo a lefase.” Bontšha mohlala wa seo puku e se huperego mabapi le bodumedi bja motho, go etša ge o hwetšwa matlakaleng a latelago: Bosikh (100-1); Bohindu (116-17); Bobuddha (141); Botao (164-6); Boconfucius (177); Boshinto (190-5); Bojuda (220-1) le Bomoseleme (289).

Seremo se Segolo sa Kutollo se Batametše!

“O ka no ba o kwele ka [bolela sehlogo sa ditaba]. Ge maphelo a kgaotšwa ka pela ka mo go nyamišago, ba bantši ba ipotšiša gore ke khomotšo efe yeo e ka newago malapa a gabo bahlaselwa. O nagana eng?” Dumelela karabo. Ke moka phetla go letlakala 299 gomme o bontšhe ka tiragalo ya tsogo yeo e swantšhitšwego. Tšwela pele ka gore: “Ba bantši ba makatšwa ke go kwa gore batho ba ba lokilego le ba ba sa lokago ba tla bušetšwa bophelong Paradeiseng lefaseng. [Bala Ditiro 24:15 go etša ge e tsopotšwe go serapa 9 go letlakala 297, gomme o nee tlhaloso yeo e hwetšwago go serapa 10.] Puku ye e ahla-ahla ditaba tše dingwe tše dintši tše di kgahlišago mabapi le morero wa Modimo ka bokamoso.”

Beibele—Na ke Lentšu la Modimo Goba la Motho?

“Re phela nakong yeo ka yona mo e nyakilego go ba motho yo mongwe le yo mongwe a lebanego le mathata a magolo. Ba bantši ba retologela go baeletši ba mehuta ka moka bakeng sa tlhahlo. Ba bangwe ba lebelela go didupe bakeng sa thušo. O nagana gore re ka hwetša kae keletšo e kwagalago yeo e tlago go re hola e le ka kgonthe? [Dumelela karabo.] Beibele e bolela therešo e bohlokwa yeo ka moka ga rena re swanetšego go e kwešiša. [Bala 2 Timotheo 3:16. Ke moka phetla go letlakala 187 gomme o bale serapa 9.] Puku ye e tla go thuša go kwešiša kamoo go latela seo Beibele e se bolelago ka mehla go nago le mafelelo a mabotse.”

Motho yo a Phagamego Kudu yo a Kilego a Phela

“Sehleng se batho ba bantši ba nagana ka Jesu. Lega go le bjalo, ka ge go direga dilo tše dintši gakaakaa tše mpe lefaseng ka moka, ba bangwe ba ka ipotšiša ge e ba Jesu a tloga a tshwenyega ka rena. O ikwa bjang ka seo?” Dumelela karabo. Phetla go kgaolo 24 gomme o hlalose ka boripana lebaka leo ka lona Jesu a ilego a tla lefaseng. Ke moka bala Johane 15:13, o gatelela go rata ga Jesu batho ba bangwe go tšwa pelong.

“Ge motho yo mongwe a bolela ka Jesu Kriste, batho ba bantši ba nagana ka yena e le lesea goba e le monna yo a tlaišegago yo a lego kgaufsi le go hwa. Kgopolo ya bona ka Jesu e akaretša feela matswalo a gagwe le lehu la gagwe. Dilo tše dibotse tšeo a di boletšego le tšeo a di dirilego nakong ya bophelo bja gagwe gantši ga di lemogwe. Seo a se phethilego se kgoma motho yo mongwe le yo mongwe yo a kilego a phela lefaseng le. Ke ka lebaka leo go lego bohlokwa gore re ithute mo gontši ka mo re ka kgonago ka gona ka dilo tše di kgahlišago tšeo a re diretšego tšona.” Bala Johane 17:3. Phetla letlakaleng la pele la matseno gomme o bale serapa sa bone.

Ke Eng Seo Modimo a se Nyakago go Rena?

“Na o nagana gore Modimo o be a rerile gore re phele re dikologilwe ke mathata a go swana le ao re lebeletšanego le ona lehono? [Dumelela karabo. Ke moka bala Mateo 6:10.] Na o kile wa naganišiša ka seo ge e le gabotse Mmušo wa Modimo e lego sona?” Phetla go thuto 6 gomme o bale dipotšišo tšeo di lego mathomong a thuto. Thoma go ahla-ahla thuto yeo, goba rulaganya gore o dire bjalo ketelong e latelago.

“Go sa šetšwe tlhabologo ya lekoko la lehono, bolwetši le lehu di tšwela pele go baka tlaišego e kgolo le manyami bathong. Na o tseba seo Jesu a tlago go se direla balwetši, batšofadi gaešita le bahu?” Dumelela karabo. Ge e ba motho yoo a nyaka go tseba karabo, phetla go thuto 5 gomme o bale dipotšišo tša dirapa 5-6. Ahla-ahla dirapa tšeo goba o rulaganye go dira bjalo ketelong e latelago.

Rapela Modimo a Nnoši wa Therešo

“O nagana gore re ka retologela kae bakeng sa thušo ya go lebeletšana ka katlego le dikgateletšo tša bophelo? [Dumelela karabo. Ke moka bala Ba-Roma 15:4.] Ela hloko gore Mangwalo a buduletšwego a re nea tlhahlo, khomotšo le kholofelo tšeo di ka re matlafaletšago go kgotlelela mathata. Puku ye e na le ditšhišinyo tše di thušago tša kamoo re ka holwago kudu ke go bala Beibele.” Gatelela dintlha tše nne tše di akareditšwego go letlakala 30.

“Ga e sa le go tloga matšatšing ao Jesu a ilego a ba mo lefaseng, batho ba bantši ba be ba dutše ba rapelela Mmušo wa Modimo gore o tle. Na o kile wa ipotšiša seo go tla ga Mmušo woo go tlago go se bolela bathong? [Dumelela karabo. Ke moka bala Daniele 2:44.] Puku ye e hlalosa seo Mmušo wa Modimo e lego sona, seo o tlago go se phethagatša le kamoo re ka holwago ke pušo ya wona ya go loka.” Bontšha seswantšho se se lego go matlakala 92-3.