Bidio Yeo e Gatelelago Mokgwa o Bohlokwa wa tša Kalafo

Ditsebi tša tša molao gotee le tša tlhokomelo ya tša maphelo di lebiša tlhokomelo ka mo go oketšegilego diponong tša seo motho a se amogelago le ditshwanelong tša kalafo tša balwetši. Se se tšweleditše ditlhahlobo le mekgwa e mefsa ya tša kalafo yeo Dihlatse tša Jehofa di ka holwago ke yona. (Dit. 15:28, 29) Seo ke se bidio ya Transfusion-Alternative Health Care—Meeting Patient Needs and Rights e lebišitšego tlhokomelo go sona. E bogele gomme o boeletše seo o ithutilego sona.—Tlhokomedišo: Ka ge bidio ye e akaretša diswantšho tše dikopana tša go buiwa, batswadi ba swanetše go diriša bohlale ge ba bogela bidio ye le bana ba banyenyane.

(1) Ke ka baka la’ng ba bangwe sehlopheng sa bašomi ba tša kalafo ba lekodišiša lefsa tirišo ya tšhelo ya madi? (2) Nea mehlala e meraro ya go buiwa mo go raraganego moo go dirwago ka ntle le tšhelo ya madi. (3) Ke dingaka le babui ba bakae lefaseng ka bophara bao ba ilego ba bontšha go rata ga bona go alafa balwetši ka ntle le go diriša tšhelo ya madi? Ke ka baka la’ng ba rata go dira bjalo? (4) Ke’ng seo dinyakišišo tša morago-rago bjale tša sepetlele di se utolotšego mabapi le taba ya go diriša madi? (5) Ke dikotsi dife tša tša kalafo tšeo di tswalanywago le tšhelo ya madi? (6) Ke diphetho dife tšeo ditsebi tše dintši di di fihleletšego mabapi le mehola ya mekgwa e mengwe ya kalafo ntle le tšhelo ya madi? (7) Ke’ng se se bakago tlhaelelo e kgolo ya madi mmeleng (anemia)? Batho ba ka kgona go ba le boemo bjo go fihla bokgoleng bofe? Boemo bjo bo ka lokišwa bjang? (8) Go tšweletšwa ga disele tše khwibidu go ka hlohleletšwa bjang mmeleng wa molwetši? (9) Ke mekgwa efe e dirišwago bakeng sa go fokotša go lahlega ga madi nakong ya go buiwa? (10) Na ditsela tše dingwe ntle le tšhelo ya madi di ka šoma baneng ba banyenyane le maemong a tšhoganetšo ao go ona bophelo bo lego kotsing? (11) O mongwe wa melao ya motheo e megolo ya tshwaro ya maleba ya tša tlhokomelo go tša kalafo ke ofe? (12) Ke ka baka la’ng go le bohlokwa gore Bakriste ba dire dikgetho e sa le pele tša kalafo yeo e sa akaretšego tirišo ya madi? Re ka dira bjang se?

Go amogelwa ga mehuta e mengwe ya tša kalafo yeo e bontšhitšwego bidiong ke taba yeo motho a swanetšego go itirela phetho ka yona ka go dumelelana le letswalo la gagwe leo le tlwaeditšwego ka Beibele. Na o šetše o dirile phetho mabapi le gore ke mehuta efe e mengwe ya tša kalafo ntle le tšhelo ya madi yeo wena le bana ba gago le ka e amogelago? Ditho tša malapa tšeo e sego Dihlatse di swanetše go tsebišwa ka botlalo ka diphetho tša gago le mabaka a tšona.—Bona “Dipotšišo tše Tšwago go Babadi” ka ditokollong tša Morokami wa June 15, 2004 le wa October 15, 2000.