Na o Itokišeditše Boemo bja Tšhoganetšo bja tša Kalafo?
Boemo bja tšhoganetšo bja tša kalafo bo ka tšwelela go sa letelwa. (Jak. 4:14) Ka gona, motho yo a lego bohlale o tla dira sohle seo a ka se kgonago go itokišetša bjona. (Die. 22:3) Na o šetše o dirile phetho ya gore ke dikalafo dife le mekgwa efe ya go alafša yeo o tlago go e amogela, gomme na o šetše o bontšhitše phetho ya gago ka go e ngwala fase? Go go thuša gore o dire seo, go tšweleditšwe bidio ya Transfusion-Alternative Health Care—Meeting Patient Needs and Rights, gomme karolo ya bobedi ya DVD yeo e na le sehlogo se se rego Transfusion-Alternatives—Documentary Series. Ge o dutše o e bogetše, bona ge e ba o ka araba dipotšišo tše latelago. Ka ge bidio ye e akaretša diswantšho tše dikopana tša go buiwa, batswadi ba swanetše go diriša temogo ge ba e bogela le bana ba banyenyane.
(1) Ke ka baka la’ng dingaka tše dingwe le bašomi ba tša kalafo ba lekodišiša lefsa tirišo ya tšhelo ya madi? (2) Nea mehlala e meraro ya go buiwa mo go raraganego moo go dirilwego ka ntle le tšhelo ya madi. (3) Ke ka baka la’ng dingaka le babui lefaseng ka bophara ba rata go alafa balwetši ka ntle le go ba tšhela madi? (4) Ke’ng seo dinyakišišo tša morago bjale tša sepetlele di se utolotšego mabapi le tirišo ya madi? (5) Ke dikotsi dife tša kalafo tšeo di tswalanywago le ditšhelo tša madi? (6) Ke phetho efe yeo ditsebi tše dintši di e fihleletšego mabapi le mehola ya mekgwa e mengwe ya kalafo yeo e ka dirišwago ntle le tšhelo ya madi? (7) Ke’ng seo se bakago tlhaelelo e kgolo ya madi mmeleng (anemia), gomme go ka dirwa eng go lokiša boemo bjo? (8) Mmele wa molwetši o ka thušwa bjang gore o tšweletše disele tše khwibidu ka bontši? (9) Ke mekgwa efe e dirišwago bakeng sa go fokotša go lahlega ga madi nakong ya go buiwa? (10) Na mekgwa ya go alafa ntle le tšhelo ya madi e ka šoma baneng ba banyenyane goba bathong bao ba lego maemong a tšhoganetšo moo bophelo bo lego kotsing? (11) O mongwe wa melao ya motheo e megolo ya tshwaro ya maleba go tša kalafo ke ofe?
Dipego di bontšha gore bagoeledi ba bantši ga se ba tlatša karata ya bona ya Advance Medical Directive, goba gore ga ba phele ba e swere ka dinako tšohle. Balebeledi ba dihlopha ba swanetše go kgonthišetša gore bohle bao ba lego sehlopheng sa bona ba latela senyakwa se se bohlokwa. Ka ge mekgwa e mengwe ya go alafša yeo e bontšhitšwego bidiong ye e ithekgile ka letswalo la motho, o se ke wa emela mohlang go tšweletše boemo bja tšhoganetšo gore e be gona o hlahloba seo o tlago go se amogela goba go se se amogele. Kgaolo 7 ya puku ya ‘Lerato la Modimo’ le ditšhupetšo tše dingwe tše di bontšhitšwego moo gotee le letlakala la ka gare la tokollo ya Tirelo ya Rena ya Mmušo ya November 2006 di tla go thuša gore o dire phetho ya maleba. Ke moka, ge e ba o ba o kolobeditšwe, ngwala seo o se kgethago karateng ya DPA gomme o phele o swere karata yeo gohle moo o yago gona.
[Seswantšho go letlakala 3]
Na o šetše o dirile phetho ya gore ke mekgwa efe le megato efe ya tša kalafo yeo o tlago go e amogela gomme na o šetše o e ngwadile?