Bolela Mabothakga a Jehofa ka Gohle
1. Re tutuetšwa ke’ng go bolela mabothakga a Jehofa ka gohle?
1 “Morêna, boxolo ké bya xaxo, le matla, le letaxô, le dithêtô, le borêna; xobane tšohle kwa lexodimong le mo lefaseng ké tsa xaxo.” (1 Kor. 29:11) Lerato la rena le tebogo ya rena go Jehofa di re kgoma bjang? Di re tutueletša gore re ‘bolele ka gohle mabothakga a yo a re biditšego lefsifsing gomme a re biletša seetšeng sa gagwe se se makatšago.’ (1 Pet. 2:9) Ga re kgone go kgaotša go botša ba bangwe ka Modimo wa rena yo mogolo! Re tla ba le dibaka tše dibotse tša go tsebatša mabothakga a Jehofa dikgweding tša March, April le May.
2. Go rulagantšwe lesolo lefe la go tsebatša Segopotšo, gona ke bomang bao ba ka tšeago karolo?
2 Lesolo le le Kgethegilego la go Tsebatša Segopotšo: Ka Mošupologo, April 2, re tla gatelela mabothakga a Jehofa ka go gopola Selalelo sa Morena. Taletšo e kgethegilego ya tiragalo ye e bohlokwa e tla abja lefaseng ka bophara go tloga ka March 17 go fihla ka April 2. Bohle ba kgothaletšwa go tšea karolo ka botlalo. Se e tla ba sebaka se sebotse sa gore bao ba sa tšwago go thoma go kopanela ba thome go bolela ditaba tše dibotse ge e ba ba swanelega. Ge e ba o e-na le barutwana ba Beibele goba bana bao ba ka swanelegago, gata mogato wa pele o boledišane le bagolo.
3. Re ka re’ng ge re laletša batho Segopotšong?
3 Lesolo le le tla swana le leo le dirilwego ge go be go tsebatšwa Dikopano tša Selete tša “Tlhakodišo e Kgaufsi!” Diphuthego di tla romelwa ditaletšo tše lekanego e le gore mogoeledi yo mongwe le yo mongwe a ka hwetša dikopi tše 30, gomme babulamadibogo ba tla newa dikopi tše oketšegilego. Boloka thero ya gago e le e kopana, mohlomongwe ka gore: “Ye ke taletšo ya gago ya tiragalo e bohlokwa e tlago yeo e bago gona ngwaga le ngwaga. O tla amogelwa ka borutho. Ditaba tša mabapi le tiragalo ye di mo taletšong.” Ge mong wa ntlo a e-na le dipotšišo, iphe nako ya go di araba. Sehlogo sa mametletšo sa mabapi le Selalelo sa Morena seo se lego ka pukung ya Seo Beibele e se Rutago go thoma go letlakala 206 se ka thuša tabeng ye. Mafelo-bekeng, re tla sepediša dimakasine tša gona bjale gotee le taletšo e kgethegilego. Ngwala batho le ge e le bafe bao ba bontšhitšego kgahlego gomme o rulaganyetše go boela go bona.
4. Ditaletšo tše di kgethegilego tša Segopotšo di tla abja bjang?
4 Kae le kae moo go kgonegago, taletšo ye e kgethegilego e swanetše go newa mong wa ntlo yo mongwe le yo mongwe ka seatleng. Ka gona ngwalang dintlo tšeo le sa hwetšego batho go tšona gomme le rulaganye go boela gape ka nako e nngwe. Diphuthego tšeo di nago le ditaletšo tše dintši tšeo di šetšego di ka di tlogela dintlong tšeo go se nago batho bekeng ya mafelelo pele ga Segopotšo, eupša e sego pele ga moo. Kgonthišetšang gore batho bao le dirago maeto a go boela go bona, barutwana ba Beibele, ba leloko, bašomi-gotee, baagišani le batho ba bangwe bao le tlwaelanego le bona ba hwetša taletšo.
5. Ke ka baka la’ng re swanetše go thoma gona bjale go dira dithulaganyo tša go tšea bobulamadibogo bja go thuša?
5 Bobulamadibogo bja go Thuša: Na o ka tsebatša mabothakga a Jehofa ka mo go tletšego ka go tšea bobulamadibogo bja go thuša ka March, April le May? Go dira bjalo go ka nyaka gore o dire diphetogo tše itšego medirong ya gago ya letšatši le letšatši. (Baef. 5:15-17) Kgodišega gore go dira boiteko bja go dira mo go oketšegilego tirelong ya Jehofa go tla go tlišetša lethabo le tšhegofatšo ya Gagwe. (Die. 10:22) Ka ge sehla sa Segopotšo se batamela, ga bjale ke nako ya go thoma go dira dithulaganyo.—Die. 21:5.
6. Re ka ithuta eng phihlelong ya kgaetšedi wa nywaga e 90 yo a ilego a tšea bobulamadibogo bja go thuša ngwageng o fetilego?
6 Kgaetšedi yo mongwe wa nywaga e 90 o thabetše tokelo ya go tšea bobulamadibogo bja go thuša ngwageng o fetilego. O itše: “Gaešita le ge ke rata go lema ka serapaneng gomme ke be ke nyaka go thoma go bjala, ke ile ka lemoga gore ke swanetše go beakanya dilo tšeo di tlago pele bophelong bja-ka. Ke e-na le kganyogo ya go bea mediro ya Mmušo pele, ke ile ka dira phetho ya go tšea bobulamadibogo bja go thuša ka March.” Na o ile a šegofatšwa ka baka la maiteko a gagwe? O re, “Ke tloga ke ikwa ke le karolo ya phuthego gomme se se dirile gore ke batamelane kgaufsi kudu le Jehofa.” Na re ka beakanya dilo tšeo di tlago pele maphelong a rena gomme ra dira diphetogo tše di swanago ge go nyakega?
7. Na go thata go hlankela bjalo ka mmulamadibogo wa go thuša?
7 Go fihlelela diiri tše di nyakegago tše 50 tša bobulamadibogo bja go thuša go ka no se be thata kamoo o naganago. Naganišiša ka mediro ya gago ya letšatši le letšatši ka thapelo, ngwala lenaneo gomme o ngwale mediro yeo almanakeng ya pušo ya Modimo. Ke wena o tsebago maemo a gago gakaone kudu. Ge e ba o babja goba o se na matla, mohlomongwe o ka tšea karolo bodireding ka diiri tše sego kae letšatši le lengwe le le lengwe. Ge e ba o šoma goba o tsena sekolo, o ka kgona go tšea bobulamadibogo bja go thuša ka go tšea karolo bodireding mantšiboa goba mafelo-bekeng.
8. Banyalani ba bangwe ba thušitšwe ke’ng go tšea bobulamadibogo bja go thuša?
8 Ba bantši ba kgonne go tšea bobulamadibogo bja go thuša bjalo ka lapa. Nywageng e fetilego banyalani ba bangwe ba ile ba dika-dika go tsenya kgopelo ka gobane ba nagana gore maemo a bona a be a sa ba dumelele go tšea bobulamadibogo bja go thuša. Ba ile ba dira’ng ka taba ye? “Re ile ra rapela Jehofa gore a re thuše go fihlelela seo re bego re nyaka go se dira gotee ka nako e telele.” Ka go rulaganya dilo gabotse ba ile ba kgona go fihlelela pakane ya bona. Ba okeditše ka gore: “Go be go thabiša. Re ile ra šegofatšwa kudu. Tšhišinyo ya rena ke gore, bo leke. Ge e ba rena re ile ra kgona, le wena o ka kgona.”
9. Ke’ng seo le ka se dirago nakong e tlago thutong ya lena ya lapa go lokišeletša dikgwedi tše tlago tša modiro o kgethegilego?
9 Ke ka baka la’ng le sa beele nako ka thoko nakong e tlago thutong ya lena ya lapa go boledišana kamoo ka moka le ka oketšago modiro wa lena dikgweding tše tlago? Gaešita le ge lapa la lena le ka se kgone go tšea bobulamadibogo bja go thuša, mohlomongwe setho se tee sa lapa se ka kgona go dira bjalo ka thušo le thekgo ya ditho tše dingwe tša lapa. Ge e ba go sa kgonege, mohlomongwe lapa la lena le ka ipeela dipakane tša go fetša nako e oketšegilego bodireding dikgweding tše tša modiro o kgethegilego.
10. Ke ka baka la’ng re swanetše go boledišana le ba bangwe ka kganyogo ya rena ya go tšea bobulamadibogo bja go thuša sehleng sa lenyaga sa Segopotšo?
10 Thušanang: Phišego e a fetela. Bolela ka kganyogo ya gago ya go tšea bobulamadibogo bja go thuša. Se se ka kgothaletša ba bangwe go dira bjalo. Go tlaleletša moo, bao ba kgonnego go tšea bobulamadibogo nakong e fetilego ba ka kgona go go nea ditšhišinyo tšeo di tlago go go thuša go beakanya mediro ya gago e le gore o kgone go fihlelela pakane ya gago. (Die. 15:22) Ge e ba o ka kgona go tšea bobulamadibogo bja go thuša, ke ka baka la’ng o sa laletše mogoeledi yo mongwe, mohlomongwe yo a nago le maemo a swanago le a gago, gore a šome le wena modirong wo o thabišago?
11. Bagolo ba ka dira bjang gore bohle ba fišegele go tšea bobulamadibogo bja go thuša dikgweding tše tlago?
11 Bagolo ba bantši ba dira ditokišetšo tše di nyakegago e le gore ba tšee karolo sebopegong se seo se kgethegilego sa tirelo. (Baheb. 13:7) Ruri se se kgothatša phuthego! Le gona bagolo ba dira gore ba bangwe ba be le phišego ka tsela yeo ba bolelago le bona ka yona. Mantšu a sego kae a botho ao a kgothatšago goba ditšhišinyo tše šomago e ka ba seo se nyakegago go kgothaletša ba bangwe go tšea bobulamadibogo bja go thuša. Mohlomongwe molebeledi wa tirelo o tla rulaganya diboka tše oketšegilego tša tirelo ya tšhemo e le gore bohle ba ka tšea karolo go neeng bohlatse bjalo ka sehlopha, gaešita le nakong ya ge ba boa mošomong goba sekolong. Dithulaganyo tše di swanetše go tsebišwa ka mehla. Le gona o tla kgonthišetša gore bohle ba na le tšhemo e lekanego yeo ba tlago go e šoma le dikgatišo tše di lekanego.
12. O ka kgona go dira’ng ge e ba o sa kgone go tšea bobulamadibogo bja go thuša?
12 Gaešita le ge maemo a go palediša go tšea bobulamadibogo bja go thuša, o ka kgothatša bao ba bo tšeago gomme wa ba rapelela. (Die. 25:11; Bakol. 4:12) Mohlomongwe o ka kgona go dira ditokišetšo tša go tšea karolo le bona bodireding ka letšatši le lengwe gape gare ga beke goba go fetša nako e oketšegilego tšhemong go feta kamoo o hlwago o dira.
13. Ke pakane efe yeo e beetšwego dinaga tšeo di lego ka tlase ga lekala la Afrika Borwa, gona phuthego ya gabo lena e ka thuša bjang gore re e fihlelele?
13 Pakane ya Babulamadibogo ba go Thuša ba 14 000 ka April: Palo e kgolo e kilego ya ba gona ya babulamadibogo ba go thuša dinageng tše di lego ka tlase ga lekala la Afrika Borwa e be e le 11 214. (Botswana ba 270, Lesotho ba 326, Namibia ba 183, Afrika Borwa ba 10 126, St. Helena ba 18 gomme Swaziland ba 291) Ka gona, pakane yeo re ka e fihlelelago kgweding e tlago ya April ke ya babulamadibogo ba go thuša ba 14 000. (Botswana ba 275, Lesotho ba 550, Namibia ba 250, Afrika Borwa ba 12 480, St. Helena ba 20 gomme Swaziland ba 425) Re ka e fihlelela ge e ba ka kakaretšo mogoeledi o tee go bagoeledi ba bangwe le ba bangwe ba 6 phuthegong e nngwe le e nngwe a tšea karolo modirong wa bobulamadibogo bja go thuša. Ke therešo gore diphuthego tše dingwe di tla ba le bagoeledi ba oketšegilego bao maemo a bona a tlago go ba dumelela go tšea bobulamadibogo bja go thuša. Diphuthego tše dintši di ka kgona go fihlelela pakane yeo e beetšwego phuthego e nngwe le e nngwe. Nagana ka lethabo leo phuthego ya gabo lena e tlago go ba le lona le mafelelo a kgothatšago ao se se tlago go ba le wona modirong wa boboledi tšhemong ya gabo lena!
14. Ke ka baka la’ng April e le kgwedi e botse ya go tšea bobulamadibogo bja go thuša?
14 Ke ka baka la’ng April e le kgwedi e botse kudu ya go tšea bobulamadibogo bja go thuša? Segopotšo se tlo ba mathomong a kgwedi gomme se se tla re nea sebaka se sebotse sa go boela go bao ba tlago go ba gona. Re tla be re sepediša dimakasine ka morero wa go sepediša puku ya Seo Beibele e se Rutago ge re dira maeto a go boela le go thoma dithuto tša Beibele. Ka April 14 re tla ba le Letšatši le kgethegilego la Dimakasine bakeng sa Afrika Borwa le dinaga tša baagišani. Ka gona, go tšea bobulamadibogo bja go thuša ka April go tla re nea dibaka tše dintši tša go thoma dithuto tša Beibele. Gantši ka April ga go fiše kudu. Go tlaleletša moo, kgwedi ya April e na le Disontaga tše hlano le letšatši la maikhutšo, e lego seo se dirago gore go be bonolo go bao ba šomago le bao ba tsenago sekolo gore ba tšee bobulamadibogo.
15. Ke ka baka la’ng re swanetše go ba le maikwelo a go akgofa ge sehla sa lenyaga sa Segopotšo se batamela?
15 Sehla se sengwe le se sengwe sa Segopotšo seo se fetago se re batametša kgaufsi kudu le bofelo bja tshepedišo ye ya dilo. Nako e šetšego ya go botša ba bangwe ka Modimo wa rena yo mogolo ke e nyenyane. (1 Bakor. 7:29) Gatee-tee ge sehla sa lenyaga sa Segopotšo se fetile, dibaka tše dibotse tšeo se re neilego tšona tša go tumiša Tatago rena wa legodimong di tla be di etše sa ruri. Eka re ka dira dithulaganyo gona bjale tša gore re dire sohle seo se lego matleng a rena ka March, April le May go bolela mabothakga a Jehofa ka gohle!
[Lepokisi go letlakala 4]
Na re ka ba le Babulamadibogo ba go Thuša ba 14 000 ka April?
◼ Lekodišiša dilo tše di tlago pele bophelong bja gago
◼ Boledišanang ka dipakane bjalo ka lapa
◼ Botša ba bangwe dithulaganyo tša gago