Go Rapela Jehofa Bjalo ka Lapa
1 Mehleng ya Beibele, ditho tša lapa di be di dira dilo tše dintši gotee. Di be di dira mešomo ya ka lapeng ya letšatši le letšatši gomme sa bohlokwa kudu di rapela Jehofa e le lapa. (Lef. 10:12-14; Doit. 31:12) Mafelong a mantši lehono, ditho tša lapa di dira mediro e sego kae di le gotee. Lega go le bjalo, Bakriste ba lemoga bohlokwa bja go dira mediro bjalo ka lapa, kudu-kudu ge go tliwa tabeng ya borapedi. Go swanetše go ba go thabiša Mothomi wa lapa gakaakang go bona malapa a mo rapela a le gotee!
2 Dirang Boboledi le le Gotee: Go šoma gotee go direng boboledi bja ditaba tše dibotse go matlafatša tswalano ya lapa. Ka gona, mogolo yo a sepelago le ba bangwe ka phuthegong go ya boboleding o tla šoma gape le mosadi wa gagwe le bana ka mehla. (1 Tim. 3:4, 5) Gaešita le ge ba e-na le dilo tše dintši tše ba swanetšego go di dira, balebeledi ba basepedi le bona ba rulaganya nako ya go šoma le basadi ba bona bodireding.
3 Batswadi bao ba dirago boboledi le bana ba bona ba kgona go ba thuša go dira tšwelopele bjalo ka baboledi. Bana ba ka se bone feela ge batswadi ba bona ba thaba le go kgotsofatšwa ke bodiredi eupša ba tla bona batswadi ba bona ba bontšha lerato la bona go Jehofa le go batho ba bangwe. (Doit. 6:5-7) Go sa dutše go le bohlokwa gore batswadi ba dire boboledi le bana gaešita le ge bana ba gola. Banyalani ba bangwe bao ba nago le barwa ba bararo ba nywaga ya magareng ga 15 le 21 ba sa dutše ba sepela le bona ka mehla go ya bodireding. Tate o re: “Re ba ruta selo se itšego ka dinako tšohle. Re kgonthišetša gore e ba nako e thabišago le ye e kgothatšago.”
4 Go Lokišetša Gotee: Malapa a hweditše e le mo go holago go lokišetša bodiredi gotee. Bana gantši ba thabela dinako tša go itlwaetša le ditho tša lapa ge ba šiedišana go boleleng goba go ba mong wa ntlo. Ba bangwe ba diriša metsotso e mmalwa mafelelong a thuto ya lapa gore ba dire se.
5 Lethabo la rena le a oketšega ge re dira mešomo ya bohlokwa le yeo e kgotsofatšago le bao re ba ratago. Ke mo go thabišago gakaakang ge ditho tša lapa di šoma gotee tirelong ya tšhemo ka ntlo le ntlo gotee le go dira maeto a go boela le go swara dithuto tša Beibele! Ge o dutše o rapela Jehofa gotee le lapa la gago, o ka bolela ka lethabo gore: “Xe e le nna le ba lapa la-ka, rena re dirêla Morêna.”—Još. 24:15.