‘Hlatsela Ditaba tše Dibotse ka Botlalo’
1. Ke ditaba dife tše dibotse tšeo re swanetšego go di botša ba bangwe?
1 Lefaseng leo go lona ditaba tše dibotse di hwetšagalago ka sewelo, re na le tokelo ya gore re “hlatsele ka botlalo ditaba tše dibotse tša botho bjo bo sa swanelago bja Modimo.” (Dit. 20:24) Se se akaretša go tsebiša batho gore ‘mehla ya bofelo’ kgaufsinyana e tla tšeelwa sebaka ke lefase le lefsa la go loka la Jehofa, moo ‘dilo tša pele di tlago go ba di fetile.’ (2 Tim. 3:1-5; Kut. 21:4) Nakong yeo, go ka se sa ba le bolwetši. (Jes. 33:24) Baratiwa ba ba hwilego ba tla tšwa mabitleng a kgopotšo gomme ba kopanywa gape le ba malapa a bona le bagwera. (Joh. 5:28, 29) Lefase ka moka le tla dirwa paradeise e botse. (Jes. 65:21-23) Ye e fo ba mehlala e sego kae ya ditaba tše dibotse tšeo re swanetšego go di botša ba bangwe!
2. Ke ka baka la’ng sehla sa Segopotšo se nea dibaka tše dibotse kudu tša go hlatsela ditaba tše dibotse?
2 Dikgwedi tša March, April le May di tla re nea dibaka tše dibotse kudu tša go tsebatša ditaba tšeo tše dibotse. Go ka dirišwa nako e ntši bodireding dinageng tše dintši tša lefase dikgweding tšona tše, ka baka la boemo bjo bobotse bja leratadima le diiri tše ditelele tša mosegare. Go oketša moo, tiragalo e bohlokwa kudu ya ngwaga e lego Segopotšo, e tla swarwa lefaseng ka bophara ka morago ga ge letšatši le sobetše ka Mokibelo, March 22. Ga bjale ke nako ya go thoma go dira ditokišetšo tša go oketša modiro wa rena.
3. Ke’ng seo se tla re thušago go oketša modiro wa rena re le malapa?
3 Mmulamadibogo wa go Thuša: Na o ka kgona go rulaganya lenaneo la gago gore o tšee bobulamadibogo bja go thuša kgwedi e tee, tše pedi goba dikgwedi ka moka tše tharo? Ke ka baka la’ng le sa diriše nako e itšego nakong ya thuto ya lapa e latelago bakeng sa go ahla-ahla taba ye? Ka go dirišana gabotse, setho se tee goba tše fetago moo tša lapa di ka kgona go tšea bobulamadibogo bja go thuša. (Die. 15:22) Rapelang ka taba ye gomme le bone kamoo Jehofa a šegofatšago maiteko a lena. (Die. 16:3) Gaešita le ge go ka se be le o tee ka lapeng yoo a tšeago bobulamadibogo bja go thuša, ditho ka moka tša lapa di ka ipeela dipakane tša go oketša nako ya tšona bodireding di dutše di šoma le bao ba kgonago go bula madibogo.
4. Re ka rulaganya bjang maemo a rena gore re tšee bobulamadibogo bja go thuša ge e ba re šoma mošomo wa boiphedišo ka nako e tletšego?
4 Ge e ba o šoma mošomo wa boiphedišo ka nako e tletšego, go ba le lenaneo le lebotse go ka go thuša go tšea bobulamadibogo bja go thuša. Mohlomongwe o ka diriša karolo e itšego ya nako ya matena bakeng sa go dira boboledi. Goba o ka ikhweletša tšhemo ya motho ka noši kgaufsi le mo o dulago gona goba kgaufsi le lefelo la gago la mošomo gomme o tšee karolo bodireding iri e tee goba go feta moo pele goba ka morago ga mošomo. O ka kgona go dira gore go be le nako e oketšegilego lenaneong la gago, ka go šuthišetša mediro e sego bohlokwa kgweding e nngwe le ka go diriša nako ka moka ya matšatši a mafelo-beke bodireding. Ba bangwe ba ile ba kgona go tšea letšatši goba a mabedi a nako ya bona ya maikhutšo bakeng sa go a diriša tirelong ya tšhemo.
5. O ka thuša bjang batšofadi le dikoka go tšea bobulamadibogo bja go thuša?
5 Ge e ba o le motšofadi goba o le sekoka goba o sa kgone go dira modiro o thata, o ka kgona go tšea bobulamadibogo bja go thuša ka go diriša nako e nyenyane letšatši le letšatši bodireding. Kgopela Jehofa gore a go nee “matla a fetago a tlwaelegilego.” (2 Bakor. 4:7) Kgaetšedi yo mongwe o ile a kgona go tšea bobulamadibogo bja go thuša a e-na le nywaga e 106! Ka thušo ya ba leloko bao e lego Bakriste le ba bangwe ka phuthegong, o ile a nea bohlatse ka ntlo le ntlo, a dira maeto a go boela, a ya dithutong tša Beibele le go tšea karolo dibopegong tše dingwe tša bodiredi. O ile a tsenya letsogo go thomeng dithuto tša Beibele le batho ba lesome. O re: “Ge ke dutše ke nagana ka tokelo e kgahlišago yeo ke bilego le yona ya go hlankela ke le mmulamadibogo wa go thuša, pelo ya-ka e phophoma ka lerato le ditebogo tše di yago go Jehofa, Morwa wa gagwe le mokgatlo wa Gagwe o lerato. Ruri ke tloga ke nyaka gore, ‘ke a leboga, Jehofa!’”
6. Bafsa ba kolobeditšwego ba sa lego sekolong ba ka kgona bjang go tšea bobulamadibogo bja go thuša?
6 Ge e ba o le mofsa yo a kolobeditšwego yo a sa lego sekolong, le wena o ka kgona go tšea bobulamadibogo bja go thuša. Ka go swana le bao ba šomago ka nako e tletšego, mohlomongwe o tla diriša kudu mafelo-beke bakeng sa go ya bodireding. Mohlomongwe matšatšing a mangwe o ka diriša le iri e tee goba go feta moo ka morago ga sekolo. Na go na le letšatši la sekolo la maikhutšo leo o ka le dirišago bakeng sa go tšea karolo bodireding? Ge e ba o rata go tšea bobulamadibogo bja go thuša, bolela le batswadi ba gago ka taba ye.
7. Ke’ng seo bagolo ba ka se dirago go oketša phišego bakeng sa bodiredi sehleng sa Segopotšo?
7 Oketša Phišego: Bagolo ba ka dira mo gontši bakeng sa go oketša phišego ya phuthego ka mohlala wa bona. (1 Pet. 5:2, 3) Ba ka nagana ka go rulaganya diboka tše di oketšegilego tša tirelo ya tšhemo bakeng sa bao ba tlago go ba ba tšea karolo bodireding e sa le mesong kudu, ka morago ga sekolo goba ka morago ga mošomo. Molebeledi wa tirelo o swanetše go kgonthišetša gore bagoeledi ba ba swanelegago ba abelwa go etelela pele le gore go na le tšhemo e lekanego gotee le dimakasine le dipuku bakeng sa dikgwedi tše tša modiro o kgethegilego.
8. Re ithuta’ng phihlelong ya phuthego e nngwe?
8 Phuthegong e nngwe, bagolo ba ile ba thoma go kgothaletša bana babo rena dikgwedi tše mmalwa e sa le pele gore ba tšee bobulamadibogo bja go thuša. Ba ile ba dula ba tsebiša phuthego beke le beke gore ke bagoeledi ba bakae bao ba dumeletšwego go tšea bobulamadibogo bja go thuša. Se se ile sa kgodiša bao ba kganyogago go oketša go tšea ga bona karolo bodireding gore ba tla thekgwa ka tsela e botse. Go ile gwa rulaganywa diboka tše oketšegilego tša tirelo ya tšhemo gore go tšwiwe e sa le mesong kudu le mantšiboa. Mafelelo e bile a gore bagoeledi ba 53, ba e ka bago seripa-gare sa phuthego, ba ile ba tšea bobulamadibogo bja go thuša ka April!
9. Ke ka baka la’ng sehla sa Segopotšo e le nako e botse, go bao ba swanelegago, ya go thoma go bolela ditaba tše dibotse?
9 Thušang ba Bangwe go Dira Boboledi: Ge bafsa gotee le batho ba sa tšwago go thoma go kopanela ba swanelegela go ba bagoeledi, ba ka laletšwa gore ba šome le bagoeledi ba nago le phihlelo tirelong ya tšhemo. Sebaka se bjalo se ka ba gona sehleng sa Segopotšo moo ba bantši ka phuthegong ba tlago go oketša modiro wa bona. Na o na le morutwana wa Beibele yo a tšwelago pele yoo a phelago ka go dumelelana le ditekanyetšo tša Jehofa tša go loka? Na o na le bana bao ba itshwerego gabotse bao ba dirago tšwelopele e botse eupša e se ya hlwa e e-ba bagoeledi? Ge e ba bona bao ba bontšhitše kganyogo ya go ba bagoeledi ba sa kolobetšwago gomme o nagana gore ba a swanelega, gona tsebiša yo mongwe wa bagolo. Molebeledi yo a okamelago o tla rulaganya gore bagolo ba babedi ba ahla-ahle taba ye le wena gotee le ngwana wa gago goba morutwana.
10. Bagolo ba ka dira’ng go thuša batho bao ba tapilego?
10 Dikgwedi tše di tlago e tla ba nako e botse kudu bakeng sa bao ba tapilego gore ba thomološe modiro wa bona le phuthego. Balebeledi ba Thuto ya Puku ya Phuthego le bagolo ba bangwe ba swanetše go dira maiteko a tseneletšego a go etela ba bjalo gomme ba ba laletše ka borutho gore ba tle ba šome le bona bodireding. Ge e ba ba be ba tapile ka nako e telele, bagolo ba babedi ba swanetše go bolela le bona go bona ge e-ba ba swanelega.—km-SE 11/00 letl. 3.
11. Pontšho e kgolo kudu ya “botho bjo bo sa swanelago bja Modimo” ke efe?
11 Itokišeletšeng Segopotšo: Topollo ke pontšho e kgolo kudu ya “botho bjo bo sa swanelago bja Modimo.” (Dit. 20:24) Dimilione tša batho bao ba nago le tebogo lefaseng ka bophara di tla kgobokana ka Mokibelo wa March 22, ka morago ga ge letšatši le sobetše, gore ba be gona Segopotšong sa lehu la Kriste. Re nyaka go laletša le go thuša batho ba dipelo tše di botegago go ba gona tiragalong ye e bohlokwa yeo e hlatselago botho bjo bo sa swanelago bjoo Jehofa a bo bontšhago batho.
12. Ke bomang bao re swanetšego go ba laleletša Segopotšong?
12 Ngwala lelokelelo la batho bao o nyakago go ba laletša. Ga go pelaelo gore lelokelelo la gago le tla akaretša ba leloko, baagišani, bao o tlwaelanego le bona mošomong goba sekolong, barutwana ba Beibele ba nakong e fetilego le ba gona bjale le bohle bao o ba etelago ka mehla. Ge e ba bao o ba laletšago ba e-na le dipotšišo mabapi le Segopotšo, o ka hwetša e le mo go thušago go diriša sehlogo sa mametletšo seo se bolelago ka Selalelo sa Morena sa Mantšiboa go matlakala 206-208 a puku ya Seo Beibele e se Rutago. Se se ka ba sa bula tsela ya gore o thome thuto ya Beibele, ka ge e tla go nea sebaka sa go diriša kgatišo yeo re e dirišago go swara dithuto tša Beibele.
13. Jehofa o ile a šegofatša bjang maiteko a bagoeledi ba babedi bao ba ilego ba dira phetho ya go laleletša ba bangwe Segopotšong?
13 Kgaetšedi yo mongwe o ngwadile lelokelelo la malapa a 48 ao a tlago go a laletša. Ge a dutše a ba laletša, o be a swaya maina a bona gomme a ngwala letšatši-kgwedi leo a ba laleditšego ka lona. O ile a thaba kudu ge batho ba 26 bao a ba laleditšego ba e-tla Segopotšong! Ngwanabo rena yo a nago le lebenkele o ile a laletša mothwalwa yo e kilego ya ba moruti. Monna yo o ile a ba gona gomme ka morago a re: “Ke ithutile mo gontši ka Beibele ka iri e tee go feta seo ke ithutilego sona ka nywaga e 30 ge ke be ke le setho sa Kereke ya Khatholika.” Kapejana ka morago ga Segopotšo, o ile a dumela go swarelwa thuto ka puku ya Seo Beibele e se Rutago.
14. Ke lesolo lefe la lefase ka bophara leo le tlago go thoma ka March 1?
14 Lesolo: Go thoma ka Mokibelo wa March 1, go tšwela pele go ba go fihla ka March 22, go tla phatlalatšwa taletšo e kgethegilego ya Segopotšo lefaseng ka bophara. Bagoeledi ka moka ba swanetše go tšea karolo ka mo go tletšego lesong le le bohlokwa. Go kaone go nea mong wa ntlo taletšo ka letsogong go e na le go e šia mojako. Lega go le bjalo, ge e ba le e-na le tšhemo e kgolo, bagolo ba ka phetha ka gore ditaletšo di tlogelwe ka bohlale dintlong tšeo go se nago batho. Mafelo-bekeng re tla ba re sepediša dimakasine tša morago-rago.
15. Re ka sepediša bjang taletšo ya Segopotšo?
15 Ka ge re e-na le nako e nyenyane ya go phatlalatša ditaletšo, go kaone kudu go dira gore thero e be e kopana. E ba le segwera e bile o be le mafolofolo. O ka bolela selo sa go swana le se: “Re nyaka go kgonthišetša gore wena, ditho tša lapa la gago gotee le bagwera ba gago le laletšwa go tla tiragalong e bohlokwa yeo e tlago go swara ka March 22. Taletšo ya gago ke ye. Ditaba ka botlalo di gatišitšwe mo taletšong.” Mong wa ntlo a ka ba le dipotšišo. Goba a ka amogela taletšo a ba a bolela gore o tla ba gona. Ngwala maina a bao ba bontšhitšego kgahlego gomme o rulaganyetše go boela.
16. Ke phihlelo efe yeo e bontšhago bohlokwa bja lesolo la go laletša batho tšhemong gore ba tle Segopotšong?
16 Ngwageng o fetilego lešole le ile la hwetša taletšo ya Segopotšo mojakong wa lona. Le ile la phetha ka gore le tla ba gona eupša le be le swanetše go hwetša tumelelo go molaodi wa lona yo mogolo. Ge le bontšha molaodi wa lona taletšo ye, molaodi yoo o ile a re tuu ke moka a bolela gore batswadi ba gagwe ke Dihlatse le gore o be a fela a e-ya dibokeng le bona. Ga se a fo nea lešole tumelelo ya gore le ye eupša molaodi yoo o ile a ya le lona Segopotšong!
17. Re bontšha bjang gore ga se ra lahlegelwa ke morero wa botho bjo bo sa swanelago bja Modimo?
17 Bontšha Tebogo: Ge sehla sa Segopotšo sa 2008 se dutše se batamela, anke yo mongwe le yo mongwe wa rena a naganišiše ka botho bjo bo sa swanelago bja Jehofa bjoo a re bontšhitšego bjona. Moapostola Paulo o ngwadile gore: “Gape re le lopa gore le se ke la amogela botho bjo bo sa swanelago bja Modimo, gomme la lahlegelwa ke morero wa bjona.” (2 Bakor. 6:1) Re bontšha bjang gore ga se ra lahlegelwa ke morero wa botho bjo bo sa swanelago bja Modimo? Paulo o ngwadile gore: “Eupša re ipolelela ka ditsela tšohle re le badiredi ba Modimo.” (2 Bakor. 6:4) Ka gona, re bontšha gore re leboga mpho ya Jehofa ka boitshwaro bja rena bjo bobotse le go bolela ditaba tše dibotse ka phišego. Sehleng se sa Segopotšo re tla ba le sebaka se sebotse sa go oketša modiro wa rena, ra hlatsela ka botlalo ditaba tše dibotse.
[Lepokisi go letlakala 3]
Ke Bomang Bao ba ka Akaretšwago go Bao ba ka Kgonago go Tšea Bobulamadibogo bja go Thuša?
◼ Malapa
◼ Bao ba šomago mošomo wa nako e tletšego
◼ Dikoka le batšofadi
◼ Bao ba tsenago sekolo
[Lepokisi go letlakala 4]
Ge o Phatlalatša Ditaletšo tša Segopotšo:
◼ Bolela ka bokopana; bolela ka phišego
◼ Ngwala batho ba nago le kgahlego gomme o boele
◼ Sepediša dimakasine mafelo-bekeng