Letlolo la Dipotšišo

◼ Ke moaparo wa mohuta mang wo o swanetšego ge go etelwa mafelo ao a dirišetšwago tirelo ya Jehofa?

Lefaseng ka bophara, Diholo tša Mmušo, Diholo tša Kopano, magae a Bethele le meago ya makala ke mafelo a kgethegilego ao a dirišetšwago tirelo ya Jehofa. Ga se mafelo a mabaibai, a hlwekile e bile a rulagantšwe gabotse, gomme ke mafelo ao a bonagatšago seriti. A fapana kudu le seo se bonwago gantši tshepedišong ya dilo ya Sathane. Bao ba etelago mafelo ao a dirišetšwago tirelo ya Jehofa le bona ba swanetše go lemogwa e le batho ba Jehofa, bao ba dirago thato ya gagwe.

Bjalo ka Bakriste, re “ipolelela ka ditsela tšohle re le badiredi ba Modimo,” go akaretša le ka moaparo gotee le ka go itokiša ga rena ka tsela e rulagantšwego gabotse. (2 Bakor. 6:3, 4) E bile go letetšwe gore re itshware gabotse. Ka mehla go apara le go itokiša ga rena go swanetše go bonagatša tlhompho le seriti tšeo di swanelago bahlanka ba Jehofa Modimo. Se se tloga se le bohlokwa ge go etelwa meago ya ntlo-kgolo kua New York gotee le makala go dikologa lefase.

Ge e hlalosa bohlokwa bja go apara gabotse le go itokiša, Go Rulaganyetšwa go Dira Thato ya Jehofa e bolela ka go nyakega ga go hlweka mmeleng, go apara gabotse le go itokiša gabotse ge re e-ya bodireding bja tšhemo le ge re e-ya dibokeng tša Bokriste. Ke moka, go letlakala 138, serapa 3, e re: “Gopola gore leina Bethele le bolela gore ‘Ngwako wa Modimo.’ Ka gona moaparo wa rena, go itokiša le boitshwaro di swanetše go swana le seo se letetšwego go rena ge re le dibokeng tša borapedi Holong ya Mmušo.” Tekanyetšo ye yeo e phagamego e swanetše go latelwa ke bagoeledi ba Mmušo bao ba dulago kgaufsi le Bethele bao ba e etelago gotee le bao ba tšwago mafelong a kgole. Ka tsela ye, moeng o bontšha tebogo e swanetšego le tlhompho.—Ps. 29:2.

Moaparo wa rena o swanetše go re hlaola re le “bao ba ipolelago gore ba hlompha Modimo.” (1 Tim. 2:10) Go apara le go itokiša gabotse go na le tutuetšo e botse tseleng yeo ba bangwe ba lebelelago borapedi bja therešo bjo re bo išago go Jehofa. Lega go le bjalo, go lemogilwe gore ge go etelwa mafelo ao a dirišetšwago tirelo ya Jehofa, bana babo rena ba sego kae le dikgaetšedi ba ikaparela feela ka mo go feteletšego, ba apara dinkašu-kašu goba diaparo tše di bonatšago. Diaparo tše bjalo ga se tša swanela Bakriste ka nako le ge e le efe. Tabeng ye, go swana le dikarolong tše dingwe ka moka tša bophelo bja rena bja Bokriste, re rata go kgomarela ditekanyetšo tše di phagamego tšeo di dirago gore batho ba Modimo ba fapane le lefase, ba dira dilo ka moka bakeng sa go nea Modimo letago.—Baroma 12:2; 1 Bakor. 10:31.

Ka gona ge go etelwa ntlo-kgolo le makala a kua Motseng wa New York goba mafelo a mangwe a makala, e ka ba ketelong e rulagantšwego goba ge go etetšwe mafelo a basepedi nakong ya maikhutšo, ipotšiše gore: ‘Na moaparo wa-ka le go itokiša di bonagatša boipoetšo, bohlweki le seriti sa lefelo leo ke tla bago ke le etetše? Na o emela Modimo yo ke mo rapelago gabotse? Na ba bangwe ba tla šitišwa goba ba kgopišwa ke ponagalo ya-ka?’ Ka moaparo wa rena le go itokiša, anke ka mehla re “kgabiše thuto ya Mophološi wa rena, Modimo, dilong ka moka”!—Tito 2:10.