Letlolo La Dipotšišo
◼ Ke ka baka la’ng re swanetše go šetša moaparo wa rena le go itokiša ge re etela meago ya Mokgatlo kua New York le diofising tša makala lefaseng ka moka?
Go letetšwe gore Bakriste ba kgomarele ponagalo e swanetšego. Ka dinako tšohle moaparo wa rena le go itokiša ga rena di swanetše go bonagatša go bontšha tlhompho le seriti tšeo di swanelago bahlanka ba Jehofa Modimo. Se ke sa therešo kudu-kudu ge o etela meago ya Mokgatlo New York le makaleng go dikologa lefase.
Ka 1998, go tla swarwa dikopano tša selete le tša ditšhaba-tšhaba. Banababo rena ba dikete-kete bao ba tšwago dinageng tše dintši ba tla etela ntlo-kgolo ya Mokgatlo New York gotee le makala dinageng tše dingwe. Ga se feela ge re etetše meago ye, eupša gape le ka nako le ge e le efe e nngwe, re swanetše gore ‘dilong ka moka re bonale re le bahlanka ba Modimo’ go akaretša moaparo wa rena le go itokiša ga rena.—2 Ba-Kor. 6:3, 4.
Ge e ahla-ahla bohlokwa bja moaparo o swanetšego le go itokiša, puku ya Go Rulaganyetšwa go Dira Bodiredi bja Rena e bolela ka go nyakega ga bohlweki bja mmele, moaparo wa bothakga le go itokiša ka maswanedi ge re le bodireding bja tšhemo le ge re le dibokeng tša Bokriste. Ke moka go letlakala 131, serapa 2 e re: “Go tla ba bjalo le tabeng ya ge go etelwa legae la Bethele kua Brooklyn goba lekala le ge e le lefe la diofisi tša Mokgatlo. Gopola, leina Bethele le bolela gore ‘Ntlo ya Modimo,’ ka gona go apara ga rena, bothakga le boitshwaro di swanetše go swana le seo se lebeletšwego go rena ge re le dibokeng tša borapedi Holong ya Mmušo.” Tekanyetšo ye e swanago e phagamego e swanetše go latelwa ke bagoeledi ba Mmušo go tšwa tikologong ya lefelong leo gaešita le bao ba tšwago mafelong a kgole bao ba tlago go bona le go thabela bogwera le ditho tša lapa la Bethele gotee le go etela meago ya lekala.
Moaparo wa rena o swanetše go ba le tutuetšo e botse go ba bangwe ge e le kamoo ba lebelelago borapedi bja therešo bja Jehofa ka gona. Lega go le bjalo, go lemogilwe gore banababo rena ba bangwe le dikgaetšedi ba na le tshekamelo ya go ikaparela feela ka mo go feteletšego ge ba etela meago ya Mokgatlo. Moaparo o bjalo ga se wa swanela ge go etelwa magae le ge e le afe a Bethele. Tabeng ye, go etša dibopegong tše dingwe ka moka tša bophelo bja Bokriste, re kganyoga go kgomarela ditekanyetšo tše swanago tše phagamego tšeo di hlaolago batho ba Modimo lefaseng ka go dira ga rena dilo ka moka bakeng sa go tumiša Modimo. (Ba-Roma 12:2; 1 Ba-Kor. 10:31) Gape ke mo go swanetšego go bolela le barutwana ba rena ba Beibele le ba bangwe bao ba ka bago ba etela Bethele ka lekga la mathomo gomme ra ba gopotša bohlokwa bja go šetša go apara le go itokiša ka tsela ya maleba.
Ka gona ge o etela meago ya Mokgatlo, ipotšiše: ‘Na moaparo wa-ka le go itokiša ke tša bothakga?’ (Bapiša le Mika 6:8.) ‘Na di bonagatša gabotse seo Modimo yo ke mo rapelago a lego sona? Na ba bangwe ba ka tshwenywa goba ba kgopišwa ke ponagalo ya-ka? Na ke beela ba bangwe bao ba ka bago e le gona ba etela ka lekga la pele mohlala o swanetšego?’ Eka ka mehla moaparong le go itokišeng ga rena ‘re ka thakga thuto ya Modimo Mophološi wa rena.’—Tito 2:10.