“Rwalang Joko Ya-ka”
1 Lefaseng le le tletšego dikgateletšo le dipelaelo, re ile ra imologa e le ruri ka go arabela taletšong e borutho ya Jesu ya gore re hwetše tapologo jokong ya gagwe. (Mat. 11:29, 30) Go amogela joko ya go ba barutiwa go akaretša go dira modiro wo o nago le ditlhohlo eupša gape e le woo o lapološago. Go akaretša go bolela ditaba tše dibotse tša Mmušo le go thuša ba bangwe go hwetša tapologo le rena jokong e botho ya Jesu.—Mat. 24:14; 28:19, 20.
2 Tapologo Yeo e Hwetšwago Bodireding: Jesu ga se a ka a kgopela balatedi ba gagwe go oketša boima bja gagwe go seo ba bego ba šetše ba se rwele. O ile a ba laletša gore ba rwale morwalo wa gagwe o bohwefo gomme ba mo nee wa bona woo o imelago. Ga re sa imelwa ke dipelaelo le go hloka kholofelo ga tshepedišo ye ya dilo, e bile ga re sa šoma ka thata bakeng sa mahumo a sa kgonthišegago. (Luka 21:34; 1 Tim. 6:17) Gaešita le ge re swaregile e bile re swanetše go šoma gore re hwetše dilo tšeo re di hlokago letšatši le letšatši, re tsepamiša maphelo a rena borapeding bja Modimo. (Mat. 6:33) Re tla dula re hwetša bodiredi e le bjo bo lapološago, e sego bjo bo imelago, ge e ba re kgomarela pono e botse mabapi le seo se lego bohlokwa kudu.—Bafil. 1:10.
3 Ka tlhago, re thabela go bolela ka dilo tšeo dipelo tša rena di di ratago. (Luka 6:45) Bakriste ka moka ba rata Jehofa ka mo go tseneletšego le ditšhegofatšo tša Mmušo tšeo a di holofeditšego. Ka baka leo, ke mo go lapološago gakaakang go bolela ka “ditaba tše dibotse tša dilo tše dibotse” le gore ge re le bodireding re lebale dilo tšeo re tshwenyegago ka tšona letšatši le letšatši! (Baroma 10:15) Ke therešo gore ge re tšwela pele re dira selo se itšego, ke moo re tla tšwelago pele re e-ba le bokgoni le go ba le lethabo le le oketšegilego. Ka baka leo, ge e ba re kgona go fetša nako e oketšegilego bodireding, seo se tla dira gore re be le tapologo e oketšegilego. Le gona ke mo go lapološago gakaakang ge batho ba amogela boboledi bja rena! (Dit. 15:3) Gaešita le ge re kopana le batho bao ba re hlokomologago goba ba re ganetšago, bodiredi bo tla re tlišetša tapologo ya moya ge e ba re dula re gopola gore maiteko a rena a thabiša Jehofa le gore mafelelo le ge e le afe a mabotse a tla be a tlišwa ke tšhegofatšo ya gagwe.—Dit. 5:41; 1 Bakor. 3:9.
4 Ka go amogela taletšo ya Jesu, re thabela tokelo ya go hlankela re bapelane le yena bjalo ka Dihlatse tša Jehofa. (Jes. 43:10; Kut. 1:5) Ga go na selo seo e ka bago se se lapološago go feta seo!