Lenaneo la Kopano ya Letšatši le le Kgethegilego ya 2010
1. (a) Ke dihlogo dife tše di theilwego Mangwalong tša dikopano tša letšatši le le kgethegilego tšeo di ilego tša godišwa nywageng ya morago bjale? (b) Na go na le dintlha tše itšego tše dikgolo go tšwa dikopanong tša letšatši le le kgethegilego tšeo di go thušitšego bodireding bja gago?
1 “Le Kgonthišetše Dilo tše Bohlokwa Kudu,” “Le Eme le Tiile Bjalo ka Mohlape o Tee,” “Le Dule le Hlatsela Therešo” le “Rena re Letsopa—Jehofa ke Mmopi wa Rena.” (Bafil. 1:9, 10, 27; Joh. 18:37; Jes. 64:8) Tše ke tše dingwe tša dihlogo tše dintši tšeo di ilego tša ahla-ahlwa dikopanong tše di fetilego tša letšatši le le kgethegilego. Na o fagahletše go ba gona kopanong ya letšatši le le kgethegilego ya ngwaga wa tirelo wa 2010? E tla godiša sehlogo se se rego: “Nako e Šetšego ke e Nyenyane” se se tšwago go 1 Bakorinthe 7:29.
2. Re ka dira bjang gore re fagahlele kopano ye?
2 Thoma go bolela ka phagahlo ka lenaneo la kopano ya letšatši le le kgethegilego gatee-tee feela ge phuthego ya lena e tsebišitšwe letšatši-kgwedi. Batswadi ba bangwe ba thuša bana ba bona gore ba fagahlele kopano ka go swaya letšatši-kgwedi almanakeng ya lapa, gotee le lelokelelo la dilo tše ba di hlokago le go thoma go bala matšatši ao a šetšego. Mantšiboeng a Borapedi bja Lapa, le ka boeletša dintlha tša dikopano tše di fetilego tša letšatši le le kgethegilego. O ka lokiša le pelo ya gago bakeng sa tiragalo ye ka go hlahloba puku ya Holwa ke Thuto ya Sekolo sa Bodiredi sa Pušo ya Modimo, matlakala 13-16, go thuša wena le lapa la gago gore le ‘eleng hloko kamoo le theetšago ka gona.’—Luka 8:18.
3. Re ka holega bjang ka botlalo go seo re tlago go se newa?
3 Diriša Seo o Ithutago Sona: Polelwana e tlwaelegilego yeo e kwewago ka morago ga kopano ke e rego, “Le e bile lenaneo le lebotse kudu!” Se ke sa therešo ka mehla, ka ge ye e le e nngwe ya ditokišetšo tše di humilego tše di tšwago go Jehofa. (Die. 10:22) E le gore tsebišo ye e enywe dienywa, o swanetše go naganišiša ka yona le go e boloka. (Luka 8:15) Ka morago ga kopano ge le le tseleng le e-ya gae, ipheng nako ya go boledišana ka lenaneo bjalo ka lapa goba bao le sepelago le bona ka koloi. Boledišanang ka dipakane le dintlha tša yo mongwe le yo mongwe tšeo di tlago go le thuša bodireding. Go dira bjalo go tla le thuša gore le holwe ke tsebišo gaešita le nako e telele ka morago ga kopano.—Jak. 1:25.
4. Ke ka baka la’ng kopano ye e tla ba bohlokwa go rena?
4 Gantši re ikwa re le ba bohlokwa ge re amogela mpho yeo re e hlokago yeo re tlago go e šomiša. Na re letetše ka phagahlo seo Jehofa a re beetšego sona kopanong ya rena e latelago ya letšatši le le kgethegilego? Re ka kgonthišega gore e tla re hola ka ditsela tšohle. Re ka letela gore Tatago rena wa legodimong e lego Jehofa, a re nee mpho e swanetšego ka kgothatšo le tlwaetšo gore re tšwele pele ka modiro wo a re abetšego gore re o dire.—2 Tim. 4:2; Jak. 1:17.