Thulaganyo e Mpsha Bakeng sa go Boeletša Mananeo a Kopano

Ka ge lefase la Sathane le tšwela pele le mpefala, Jehofa o re matlafaletša “xo lahla xo nyatša Modimo, xo lahla dikxanyoxô tša lefase; xore mehleng yeno re phelê rè eletšexile, rè loka, rè na le borapedi.” (Tito 2:12) Gare ga ditokišetšo tšeo a di dirago ka “molaki e a bôtêxaxo yo bohlale” go na le mananeo a kopano ya tikologo le ya letšatši le le kgethegilego ao a bago gona ngwaga le ngwaga. (Mat. 24:45) Dipokano tše tša moya di re matlafatša kudu gakaakang!

Go tla dirišwa thulaganyo e mpsha bakeng sa go boeletša mananeo a a kopano ngwageng wa tirelo wa 2005 e le go re thuša go gopola le go diriša tlhahlo yeo re e hweditšego. Matlakala 5-6 a pampiri ye ya ka gare a hupere dihlogo tšeo di re bontšhago e sa le pele seo se tlago go newa kopanong gaešita le dipotšišo tša poeletšo bakeng sa lenaneo le lengwe le le lengwe la kopano. Diphuthego di tla ahla-ahla tsebišo ye Sebokeng sa Tirelo pejana ga ge di ka ya kopanong le ka moragonyana ga ge di boile. Se se tla rulaganywa bjang?

Beke e tee goba tše pedi pele ga ge phuthego e e-ya kopanong ya tikologo, go tla ba le polelo ya metsotso e lesome Sebokeng sa Tirelo yeo e theilwego sehlogong se se rego, “Lenaneo le Lefsa la Kopano ya Tikologo” e le bakeng sa go dira gore phuthego e fagahlele lenaneo. Seboledi gape se tla lebiša tlhokomelo dipotšišong tša poeletšo gomme sa kgothaletša bohle go ngwala dintlha e le go lokišeletša poeletšo yeo e tlago go latela dibeke tše sego kae ka morago ga kopano.

Dibeke tše sego kae ka morago ga kopano, go tla ba le poeletšo ya metsotso e 15 ya lenaneo la letšatši la pele la kopano Sebokeng sa Tirelo. Bekeng ye e latelago, metsotso e 15 e tla dirišetšwa go boeletša lenaneo la letšatši la bobedi. Dipotšišo tša poeletšo tšeo di lego pampiring ye ya ka gare di tla šoma e le motheo wa dipoledišano tšeo. Poeletšo e swanetše go lebiša tlhokomelo moholeng o šomago wa tsebišo. Bagolo ba ka rulaganya go khutsofatša, go tlogela goba go beakanya lefsa dikarolo tše dingwe tša Seboka sa Tirelo e le go dira gore dikarolo tše tša poeletšo di ahla-ahlwe.

Go tla latelwa thulaganyo e swanago ge e le mabapi le lenaneo la kopano ya letšatši le le kgethegilego, eupša go tla ba le karolo e tee ya metsotso e 15 bakeng sa go boeletša lenaneo ka moka. Eka ka moka ga rena re ka boloka pampiri ye ya ka gare gomme re e diriše bakeng sa go holwa ka mo go tletšego ke tlhahlo e botse yeo Jehofa a e neago.—Jes. 48:17, 18.