Bidio ya Jehovah’s Witnesses—Organized to Share the Good News
Ka nywaga ya ka godimo ga e 100, Dihlatse tša Jehofa di be di dutše di rulaganyeditšwe go bolela ditaba tše dibotse. Ka lesolo le legolo leo le sa kago la bonwa lefaseng ka moka, re bolela molaetša wo ka maleme a makgolokgolo le dinageng tše fetago tše 230. (Mat. 24:14) Ke ka baka la’ng modiro wo o swanetše go dirwa? O phethwa bjang lefaseng ka bophara? Bidio ya Jehovah’s Witnesses—Organized to Share the Good News e araba dipotšišo tšeo ka go nea tsebišo e oketšegilego ka dibopego tše di fapafapanego tša modiro wa rena lefaseng ka bophara. Ka morago ga go bogela bidio ye, araba dipotšišo tše di latelago.
Bidio ye e go thušitše bjang go kwešiša le go leboga (1) megato yeo mokgatlo wa Jehofa o e gatago bakeng sa go botša batho ditaba tše dibotse? (2 Tim. 4:2) (2) malapa a Bethele go dikologa lefase? (3) tlhahlo yeo e newago baromiwa le balebeledi? (2 Tim. 2:2) (4) bohlokwa bja go thoma letšatši le lengwe le le lengwe ka go hlahloba temana ya Beibele le go lokišetša diboka tša phuthego beke le beke? (Dit. 17:11) (5) mehola ya go ba gona dibokeng tša rena tša Bokriste? (Baheb. 10:24, 25) (6) ditšhegofatšo tšeo o tla di hwetšago ge lefase le dirilwe Paradeise? (Jes. 11:9) (7) tokelo yeo o nago le yona ya go tšea karolo modirong wa go buna?—Joh. 4:35.
Bidio ye e hlatsetše gore ke sedirišwa se sebotse sa go tlwaelanya batho bao ba kgahlegago le modiro woo o dirwago ke Dihlatse tša Jehofa lefaseng ka bophara. (8) Ke neng mo go loketšego go bontšha barutwana ba rena ba Beibele, ba leloko, le ba bangwe bidio ye? (9) Ke tsela efe e botse yeo batho ba arabetšego ka yona ge o ba bontšha bidio ye?
Ge re naganišiša ka seo Jehofa a se phethilego, re tutueletšega go dumelelana le mantšu a mopsalme, a rego: “Wena Jehofa Modimo wa ka, o dirile dilo tše dintši, o re diretše dilo tše dintši tše di makatšago, gomme tšeo o re naganetšego tšona ke tše dintši; ga go yo a ka bapišwago le wena.” (Ps. 40:5) Anke re dirišeng bidio ye gabotse go thuša batho ba bangwe gore ba leboge le go kwešiša Jehofa le mokgatlo wa gagwe!