Bidio e Mpsha ya go Thoma Dithuto tša Beibele

Bidio e kopana yeo e nago le sehlogo se se rego, Ke ka Baka la Eng o Swanetše go Ithuta Beibele? e bogelwa ke batho ba bantši go jw.org/nso. Bidio ye e hlametšwe go šušumetša batho bao ba nago le kgahlego gore ba amogele thuto ya rena ya Beibele ya mahala. O ka e hwetša ka go kgotla linki ya “Kgopela Thuto ya Beibele” botlaseng bja letlakala la mathomo goba ka go skena khouto ya QR (quick response) yeo e lego ka morago ga ditokollo tša rena tša dipampišana tše difsa. Tše dingwe tša ditsela tšeo re ka dirišago bidio ye gabotse ka tšona ke tše.

• Ge o dira leeto la go boela, botšiša mong wa ntlo gore: “Na nka go bontšha bidio e kopana yeo e hlalosago kamoo o ka hwetšago dikarabo tša dipotšišo tša gago tša Beibele?” Ge e ba a dumela, mmontšhe bidio ka sedirišweng sa gago sa thekinolotši goba khomphutheng ya gagwe.

• Ge o nea bohlatse bjo bo sa rulaganyetšwago goba o le bodireding bja phatlalatša gomme o sepediša e nngwe ya dipampišana tše mpsha, bontšha motho khouto ya QR ke moka o mo hlalosetše gore a e skene ka sedirišwa sa gagwe sa thekinolotši. Ka ge malemeng a mantši dikhouto tša QR di go iša thwii bidiong yeo e lego Wepesaeteng ya rena, go ka kgonega go e bapala ka sedirišwa sa gago sa thekinolotši ka yona nako yeo o hlalosetšago motho ka yona.

• Botša bašomi-ka-wena, barutwanagotee le wena, ba leloko le batho ba bangwe ka bidio ye, gomme o kgopele go ba bontšha yona. Goba o ba romele e-mail ya linki yeo e tlago go ba iša go bidio, gomme o ba kgopele gore ba e bogele.

Ka go diriša tokišetšo ye e mpsha, re ka kgona go thoma dithuto tše di oketšegilego tša Beibele le go thuša “bao ba nago le tshekamelo e swanetšego ka bophelo bjo bo sa felego” gore ba gole moyeng.—Dit. 13:48.