Ditsela tše Hlano tša go Hwetša Thuto ya Beibele
1. Ke eng seo re swanetšego go se dira ge e ba re thatafalelwa ke go hwetša thuto ya Beibele tšhemong ya gabo rena, gona ka baka la’ng?
1 Na o thatafalelwa ke go hwetša motho yo o tlago go ithuta le yena Beibele? Gona dula o leka. Jehofa o šegofatša bao ba sa lapego go dira thato ya gagwe. (Bagal. 6:9) Ka mo tlase go na le ditšhišinyo tše hlano tšeo di tla go thušago.
2. Re ka diriša bjang mokgwa wa go kgopela batho ka go lebanya go thoma thuto?
2 Kgopela Batho ka go Lebanya: Batho ba bantši ba a tseba gore re sepediša Morokami le Phafoga!, eupša ba ka ba ba sa tsebe gore re swara dithuto tša Beibele. Go re’ng o sa leke mokgwa wa go kgopela batho ka go lebanya ge o eya ka ntlo le ntlo? Le gona, batho bao ba thabelago bao o boelago go bona o ka kgopela ge e ba ba ka thabela gore o ba swarele thuto ya Beibele. Ge e ba ba sa thabele seo, gona o ka tšwela pele o ba nea dikgatišo gomme o hlagolele kgahlego. Ngwanabo rena yo mongwe o be a boela go banyalani ba bangwe ka nywaga e mentši e le karolo ya tsejana ya gagwe ya dimakasine. Ka morago ga gore a ba tlogelele dimakasine tša moragorago, o ile a retologa a ba botšiša gore: “Na le ka thabela gore ke le swarele thuto ya Beibele?” O ile a makala ge ba dumela seo. Ga bjale ba kolobeditšwe.
3. Na re swanetše go fo nagana gore bao ba bago gona dibokeng go na le motho yo a ba swarelago thuto ya Beibele? Hlalosa.
3 Bao ba Bago Gona Dibokeng: O se ke wa fo nagana gore bao ba thabelago ba o ba bonago dibokeng tša phuthego ba šetše ba swarelwa thuto ya Beibele. Ngwanabo rena yo mongwe o bega gore: “Palo ya ka godimo ga seripa sa dithuto tšeo ke bilego le tšona tša Beibele ke di thomile ka go boledišana le bao ba bego ba eba gona dibokeng.” Kgaetšedi yo mongwe o ile a phetha ka gore a boledišane le mosadi yo a bego a lewa ke dihlong yoo barwedi ba gagwe ba kolobeditšwego ba bego ba kopanela phuthegong yeo. Mosadi yoo o be a na le nywaga e ka bago e 15 a eba gona dibokeng gomme o be a dula a etla Holong ya Mmušo nakwana pele ga ge diboka di thoma ke moka a sepela gateetee ka morago ga ge di fela. Mosadi yoo o ile a dumela go ithuta gomme mafelelong a amogela therešo. Kgaetšedi yoo o ngwala gore: “Ke fo ba maswabi gore ke ile ka letela nywaga e 15 e feta gore ke kgopele ge e ba a ka rata ke mo swarela thuto!”
4. Re ka hwetša bjang thuto ka go kgopela maina a bao ba ratago go ithuta?
4 Kgopela Maina a Bao ba Ratago go Ithuta: Kgaetšedi yo mongwe o katanela go sepela le ba bangwe ge ba eya dithutong tša bona tša Beibele. Ka tumelelo ya moswari wa thuto, ge thuto e fedile o botšiša morutwana ge e ba a tseba motho le ge e le ofe yo a ka thabelago go ba le thuto. Ge o nea motho yo o boelago go yena puku ya Seo Beibele e se Rutago, o ka mmotšiša gore: “Na o tseba motho le ge e le ofe yo a ka thabelago go ba le puku ye?” Ka dinako tše dingwe, maemo ga a dumelele bagoeledi le babulamadibogo go swara thuto le motho yo mongwe yoo ba kopanago le yena tšhemong. Ka gona, tsebiša ba bangwe gore o nyaka go swara thuto ya Beibele.
5. Ke ka baka la’ng re ka botšiša balekane ba ba sa dumelego ba ditho tša phuthego ya gabo rena ge e ba ba ka thabela go swarelwa thuto?
5 Balekane Bao ba sa Dumelego: Na ka phuthegong ya gabo lena go na le bagoeledi bao ba nyalanego le bao ba sa dumelego? Ba bangwe bao ba sa dumelego ba gana go boledišana le balekane ba bona ba Bakriste ka Beibele eupša ba ka thabela go ithuta le motho yo mongwe yo e sego setho sa lapa. Gantši ke mo gobotse gore o thome ka go boledišana le molekane yo a dumelago e le gore o hwetše tsela e kaonekaone ya go boledišana le molekane wa gagwe.
6. Thapelo e bohlokwa gakaaka’ng ge o leka go hwetša thuto?
6 Thapelo: O se ke wa nyatša matla a thapelo. (Jak. 5:16) Jehofa o holofetša go theetša dikgopelo tša rena ge e ba di dumelelana le thato ya gagwe. (1 Joh. 5:14) Ngwanabo rena yo mongwe yo a bego a swaregilego kudu o ile a thoma go rapelela gore a be le thuto ya Beibele. Mosadi wa gagwe o ile a ipotšiša ge e ba monna wa gagwe a tla ba le nako ya go hlokomela morutwana, kudukudu ge e ba morutwana yoo a be a na le mathata a mantši. Ka gona, mosadi yoo o ile a rapela Jehofa gore monna wa gagwe a hwetše thuto. Dithapelo tša bona di ile tša arabja mo e ka bago dibeke tše pedi ka morago ge mmulamadibogo yo mongwe ka phuthegong yeo a hwetša monna yo a bego a nyaka go ithuta gomme a fetišetša thuto yeo go ngwanabo rena. Mosadi yoo o ngwala gore: “Ke botša motho le ge e le ofe yo a ka naganago gore go ba le thuto ya Beibele go ka se kgonege, gore: Eba yo a lebanyago dithapelong tša gago e bile o se kgaotše go rapelela seo. Re bile le lethabo le oketšegilego go feta kamoo ke bego ke nagana ka gona.” Ka go ba le kgotlelelo, le wena o ka kgona go hwetša thuto ya Beibele gomme wa ba le lethabo la go thuša motho yo mongwe go tsena ‘tseleng e išago bophelong.’—Mat. 7:13, 14.