Na O Neela Dithuto Tša Beibele?

1 Ba bantši ba hwetša katlego e botse tabeng ya go thoma dithuto tša Beibele ka go diriša mokgwa wa go bolela ka go lebanya ge ba nea batho sebaka sa go ithuta Beibele. Monna yo a ilego a gana dipuku ka makga a mantši o ile a arabela gabotse ge go be go ithapelwa go mo nea thuto ya Beibele. O ile a arabela ka gore: “Ke be ke dutše ke nyaka go ithuta Beibele.” Thuto ya Beibele e ile ya thongwa, gomme lapa ka moka le ile la dira tšwelopele ka pela.

2 Ka moka ga rena re swanetše go kgomega ka go thoma dithuto. Gore batho ka o tee ka o tee ba dire tšwelopele ka go ba barutiwa ba Kriste, ba swanetše go rutwa. (Mat. 28:19, 20) Gore ba rutwe, ba swanetše go swarelwa thuto ya Beibele. Dithuto di ka thongwa feela ka go ithapela go bontšha mong wa ntlo kamoo a ka ithutago go gontši ka Beibele le dikholofetšo tša Modimo. Ngwanabo rena o ile a kgona go thoma dithuto tša Beibele tše hlano ka pampišana ya Bophelo Lefaseng le Lefsa la Khutšo. Ka ge a be a sa kgone go swara dithuto tša Beibele tše dintši gakaalo, o ile a thoma go fetišetša dithuto tša Beibele go bagoeledi ba bangwe.

3 Ge e ba re hwetša go le bonolo go thoma dithuto tša Beibele, re ka sepela le bagoeledi ba bangwe gomme ra ba thuša gore le bona ba hwetše dithuto. Goba re ka fetišetša dithuto tše dingwe tša Beibele tšeo re di thomago go ba bangwe ka phuthegong. Ge e ba o nyaka go swara thuto ya Beibele, ke ka baka la’ng o sa leke go ithapela go nea thuto ya Beibele go bao o ba hwetšago bodireding bja ntlo le ntlo? Lebakeng le lengwe mogoeledi o ile a boela go ngwanenyana wa nywaga ya magareng ga e lesome-tee le masome-pedi yo a sa kago a bontšha kgahlego e kgolo. Lega go le bjalo, mogoeledi o ile a ithapela go mo nea thuto ya Beibele gomme a dumela. Mo nakong ye o kolobeditšwe, gomme ngwanabo le molamo wa gagwe le bona ba ba gona dibokeng.—Ba-Gal. 6:6.

4 Ga se yo mongwe le yo mongwe yo re thomago thuto le yena yo a tlago go tšwela pele a ithuta. Ga se bohle bao ba ithutago bao ba tlago go tla therešong. Eupja ba bangwe ba tla tla. Ge re thoma dithuto tše dintši kudu, ke mo go bago le kgonagalo e kgolo ya gore re tla kgona go thuša ba bangwe gore e be batumiši ba Jehofa.