Go Hlagolela Kgahlego Molaetšeng Wa Mmušo

1 Go šetše go fetile nako—mohlomongwe letšatši le tee goba a mabedi, mohlomongwe beke—ga e sa le o bolela le motho yo mongwe yo a bontšhitšego kgahlego molaetšeng wa Mmušo. Go sa šetšwe gore o amogetše dipuku tša Beibele goba a se a di amogela, go bohlokwa go hlagolela kgahlego le ge e le efe ka pela ka mo go kgonegago.

2 Hlahlobišiša tsebišo yeo o e ngwadilego ka morago ga ketelo ya mathomo. Ke moka ge o beakanya mokotlana wa gago wa dipuku kgonthiša gore o tsentšha le kopi ya dipuku tšeo o di sepeditšego e le gore o tle o lebelele go tšona nakong ya leeto la go boela.

Ge e ba o sepeditše pukwana ya “Bonang,” o ka re:

◼“Ke thabela go go bona gape. Nakong ye re feleleditšego go boledišana ka yona, ke ile ka go bontšha letlakala la ka ntle la pukwana ye, gomme ra bala lengwalo go tšwa Beibeleng go hlatsela gore Modimo ka Mmušo wa gagwe o tla nea o mongwe le o mongwe madulo le mošomo. Eupja Modimo gape o holofeditše go fediša bolwetši, botšofadi gaešita le lehu. Na o hwetša go le thata go dumela se? [Letela karabo ya mong wa ntlo.] Ela hloko ntlha ye go serapa 4 sa pukwana yeo ke go tlogeletšego yona.” Bala serapa, gomme o hlahlobe lengwalo le tee goba a mabedi ao a lokeleditšwego botlaseng bja letlakala. Thuto ya Beibele e thomilwe!

3 Ge o lokišeletša tsela ya go dira ketelo e tlago, o ka phetha poledišano ka gore:

◼“Ke therešo gore se sengwe le se sengwe seo re se hlahlobilego se ka Beibeleng, eupja batho ba bantši ba ipotšiša ge e ba ruri ba ka dumela seo Beibele e se bolelago. Nakong e tlago ge ke e-tla, ke tla rata go diriša metsotso e sego kae ke hlahloba taba ye le wena.” Ge o boa bakeng sa go hlagolela kgahlego, thoma poledišano go tloga sehlogwaneng se se rego “Puku Yeo e Hlalosago Paradeise,” go thoma go serapa 5 sa pukwana ye.

4 Mašemong Ao go Sepedišwago Dipuku tše Sego Kae: Thero e swanago ya kakaretšo e ka dirišwa ge o etela batho bao ba bontšhitšego kgahlego eupja ba se amogele dipuku. O ka lebiša tlhokomelo pukwaneng yeo o ilego wa e bolelela poledišanong ya nakong e fetilego. Mo gongwe go ka nyakega gore o etele gantši o diriša Beibele le kopi ya gago ka noši ya pukwana pele mong wa ntlo a amogela pukwana. Ge e ba o sepedišitše ditokollo tša Morokami wa July 1 goba wa July 15, lebelela dihlogo tše di swanago ka go pukwana ya “Bonang,” ge o boela bakeng sa go hlagolela kgahlego.

5 Maeto a go boela a mabotse ao a lebišago thutong ya Beibele ka pukwana ya Mmušo a ka lokišetšwa tabeng yeo e lego go matlakala 379-81 a puku ya Go Boledišana. Goba thuto ya Beibele e ka thongwa ka go botšiša potšišo e rego: “Na o be o tseba gore Beibele e nea dikholofelo tše pedi? E nngwe ke ya go phela ka mo go sa felego mo lefaseng. Pukwana ye e hlalosa kamoo se se tlago go kgonega ka gona.” Ke moka phetla go letlakala 15 la pukwana, gomme o bale mangwalo a mararo ao a bontšhitšwego.

6 Ge e ba o sepedišitše dimakasine tše pedi, puku ya letlakala le thata, goba pukwana goba le bile feela le poledišano e kgahlišago ya Beibele le motho o mongwe, o na le boikarabelo bja go hlagolela kgahlego. Re le kgothatša ka moka gore le beele nako ka thoko ka July bakeng sa go kopanela modirong wo wo o phološago bophelo.—1 Tim. 4:16.