Ekišang Mohlala wa Baporofeta—Tsefanya
1. Tsefanya o ile a hlankela e le moporofeta ka tlase ga maemo afe, gomme ke ka tsela efe lehono e lego mohlala o mobotse go rena?
1 E be e le magareng ga lekgolong la bošupa la nywaga B.C.E., gomme borapedi bja Baali bo be bo dirwa phatlalatša kua Juda. Kgoši e mpe e lego Amone, e be e sa tšwa go bolawa, gomme ga bjale Kgoši Josia yo monyenyane o be a buša. (2 Dikor. 33:21–34:1) Ka yona nako yeo, Jehofa o ile a kgetha Tsefanya gore a tsebatše molaetša wa Gagwe wa kahlolo. Le ge mohlomongwe Tsefanya e be e le setho sa ka ngwakong wa bogoši bja Juda, ga se a ka a bebofatša molaetša wa Jehofa wa kahlolo go baetapele ba Juda. (Tsef. 1:1; 3:1-4) Ka mo go swanago, re leka go ekiša go ba le sebete ga Tsefanya gomme ra phema go dumelela ba leloko ba šitiša borapedi bja rena go Jehofa. (Mat. 10:34-37) Tsefanya o ile a tsebatša molaetša ofe, gomme ka mafelelo afe?
2. Re swanetše go tšea kgato efe ge e ba re nyaka go phologa letšatši la kgalefo ya Jehofa?
2 Tsoma Jehofa: Ke Jehofa feela yo a ka phološago batho ka letšatši la gagwe la kgalefo. Ka gona, Tsefanya o ile a kgothaletša batho ba Juda gore ba tsome Jehofa, ba tsome go loka, ba tsome boleta ge nako e sa le gona. (Tsef. 2:2, 3) Re boemong bjo bo swanago lehono. Go swana le Tsefanya, re kgothaletša ba bangwe gore ba tsome Jehofa, eupša le rena re swanetše go dira se sengwe, e lego go ikemišetša gore le ka mohla re se ke ra ‘furalela Jehofa.’ (Tsef. 1:6) Go e na le moo, re tsoma Jehofa ka go ithuta Lentšu la gagwe ka kelohloko le ka go kgopela tlhahlo ya gagwe ka thapelo. Re tsoma go loka ka go phela bophelo bjo bo hlwekilego. Re tsoma boleta ka go hlagolela mekgwa e bontšhago boikokobetšo le ka go ikemišetša go theetša ditaelo tše di tšwago mokgatlong wa Jehofa.
3. Ke ka baka la’ng re swanetše go ba le pono e nepagetšego ge re le bodireding?
3 Mafelelo a Mabotse: Molaetša wa kahlolo wa Tsefanya o ile wa šušumetša Bajuda ba bangwe go tšea kgato bjalo ka Josia yo monyenyane yo a ilego a thoma go tsoma Jehofa e sa le mošemane. Ka morago Josia o ile a etelela pele ka sebete lesolo la go fediša borapedi bja medimo ya diswantšho nageng. (2 Dikor. 34:2-5) Lega go le bjalo, lehono dipeu tše dingwe tša Mmušo di wela go bapa le tsela, lekgwareng goba meetlweng, tše dingwe di wela mmung o mobotse gomme tša enywa dienywa. (Mat. 13:18-23) Re kgodišegile gore Jehofa o tla tšwela pele go šegofatša maiteko a rena a go dula re swaregile ka go gaša peu ya Mmušo.—Ps. 126:6.
4. Ke ka baka la’ng re swanetše go ‘dula re letile Jehofa’?
4 Ba bangwe kua Juda ba be ba nagana gore Jehofa a ka se tsoge a tšere kgato. Lega go le bjalo, Jehofa o ile a kgonthišetša bohle gore letšatši la gagwe le legolo le be le le kgauswi. (Tsef. 1:12, 14) Go be go tla phologa feela bao ba bego ba mmotile. (Tsef. 3:12, 17) Ge re ‘dutše re letile Jehofa,’ eka re ka thabela go hlankela Modimo wa rena yo mogolo ka botee le barapedimmogo le rena!—Tsef. 3:8, 9.