Go Ruta o Diriša Poroutšha ya Ditaba tše Dibotse

1. Poroutšha ya Ditaba tše Dibotse e hlamilwe bjang?

¹ Go etša ge go boletšwe tokollong ya July ya Tirelo ya Rena ya Mmušo, e nngwe ya didirišwa tša rena tše bohlokwa tša go ruta ke poroutšha ya Ditaba tše Dibotse tše di Tšwago go Modimo! Mangwalo ao a bontšhitšwego ga se a tsopolwa e le gore beng ba dintlo ba ka thabela go ipalela ona ka go lebanya go tšwa Beibeleng. Le ge dikgatišo tša rena tše dintši tša go ithuta di ngwadilwe ka tsela ya gore mmadi a ipalele ka boyena, poroutšha ye e hlamilwe ka tsela ya gore morutwana a boledišane le morutiši. Ka gona, ge re e sepediša re swanetše go leka go bontšha mong wa ntlo kamoo thuto e swarwago ka gona e le gore a bone kamoo go kgahlišago go ithuta ditaba tše dibotse tše di tšwago ka Beibeleng.—Mat. 13:44.

2. Re ka diriša bjang poroutšha ya Ditaba tše Dibotse leetong la mathomo?

² Leetong la Mathomo: Mohlomongwe o ka re: “Ke tlile go wena ka gobane batho ba tshwenyegile ka bokamoso bja bona. Na o nagana gore maemo a tla tsoga a kaonafetše? [Dumelela karabo.] Beibele e na le ditaba tše dibotse tšeo di ka re neago kholofelo. Beibele e araba tše dingwe tša dipotšišo tše.” Nea mong wa ntlo poroutšha, ke moka o mo kgopele gore a kgethe potšišo letlakaleng la ka morago. Ka morago mmontšhe kamoo thuto e swarwago ka gona o diriša serapa sa pele sa thuto yeo. Tsela e nngwe e ka ba go botšiša mong wa ntlo potšišo yeo e tsošago kgahlego ye e theilwego thutong yeo o e kgethilego, ke moka wa mmontšha kamoo poroutšha e ka mo thušago go hwetša karabo ya Beibele. Ge e ba thuto yeo e sepedišana le e nngwe ya dibidio go jw.org, bagoeledi ba bangwe ba kgetha go e bapalela mong wa ntlo nakong ya ge ba nea thero.

3. Hlalosa kamoo thuto e swarwago ka gona go dirišwa poroutšha ya Ditaba tše Dibotse.

³ Kamoo o ka Swarago Thuto: (1) Balela mong wa ntlo potšišo yeo e ngwadilwego ka mongwalo o mokoto e le gore o mo thuše go lebiša tlhokomelo ntlheng ya motheo. (2) Bala serapa. (3) Bala mangwalo ao a sekamišitšwego, ke moka o diriše dipotšišo ka bohlale go thuša mong wa ntlo go bona kamoo mangwalo a arabago potšišo yeo. (4) Ge e ba go sa na le serapa se sengwe ka tlase ga potšišo yeo, boeletša mogato wa bobedi le wa boraro. Ge e ba go na le bidio yeo e sepedišanago le potšišo gomme o se wa tšwa o e bapalela mong wa ntlo, dira bjalo ge le dutše le boledišana. (5) Mafelelong, kgopela mong wa ntlo go araba potšišo yeo go kgonthišetša gore o a kwešiša.

4. Re tla thušwa ke’ng gore re kgone go diriša sedirišwa se sa bohlokwa?

⁴ Itlwaelanye le sedirišwa se se bohlokwa. E diriše moo go kgonegago. Pele ga thuto e nngwe le e nngwe, nagana ka morutwana le kamoo o tlago go beelana mabaka le yena ka mangwalo. (Die. 15:28; Dit. 17:2, 3) Ge o dutše o hwetša phihlelo le bokgoni, o ka bona poroutšha ye e le sedirišwa se sengwe sa mmamoratwa seo o ka se dirišago go ruta batho therešo!