Ekišang Mohlala wa Baporofeta—Habakuku
1. Maemo a moporofeta Habakuku a swana bjang le a rena?
1 Ge re dutše re lebeletšana le bokgopo lefaseng, re ka ikwa go swana le Habakuku, yo a ilego a botšiša Jehofa gore: “Ke ka baka la’ng o ntesa ke bona tše di kwešago bohloko gomme wena o dula o lebeletše bokgopo?” (Habak. 1:3; 2 Tim. 3:1, 13) Go naganišiša ka molaetša wa Habakuku le mohlala wa gagwe wa potego go ka re thuša go kgotlelela ge re dutše re letetše letšatši la Jehofa la kahlolo.—2 Pet. 3:7.
2. Re ka bontšha bjang gore re phela ka go botega lehono?
2 Go Phela ka go Botega: Go e na le go nyamišwa ke maemo a sa kgahlišego ao a ilego a lebana le ona, Habakuku o ile a dula a phafogile e bile a le mafolofolo moyeng. (Habak. 2:1) Jehofa o ile a kgonthišetša moporofeta yo gore lentšu la Gagwe le tla phethagala ka nako e swanetšego le gore “moloki o tla phela ka go botega ga gagwe.” (Habak. 2:2-4) Se se ra go re’ng go Bakriste bao ba phelago garegare mehleng ya bofelo? Go bohlokwa go kgodišega gore bofelo bo tla tla go e na le go tshwenyega ka gore bo tla tla neng. Go ba le tumelo go dira gore re dule re phafogile le go etiša bodiredi pele.—Baheb. 10:38, 39.
3. Ke ka baka la’ng re swanetše go dula re hlankela Jehofa ka lethabo?
3 Hlalalela Jehofa: Ge Gogo wa Magogo a hlasela batho ba Jehofa, tumelo ya rena e tla lekwa. (Hesek. 38:2, 10-12) Dintwa di ka tliša mathata, gaešita le go bao e tlago go ba bafenyi. Go ka ba le tlhaelelo ya dijo, batho ba ka loba dithoto gomme maemo a bophelo a ka phuhlama. Re tla dira’ng ge re welwa ke mathata? Habakuku o be a letetše mathata, ka gona o ile a ikemišetša go tšwela pele a hlankela Jehofa a thabile. (Habak. 3:16-19) ‘Lethabo leo Jehofa a re neago lona’ le lona le tla re thuša go kgotlelela diteko tša nakong e tlago.—Neh. 8:10; Baheb. 12:2.
4. Ke’ng seo re ka se thabelago gona bjale le nakong e tlago?
4 Bao Jehofa a ba phološago letšatšing la gagwe la kahlolo leo le tlago ba tla tšwela pele ba rutwa ka tsela ya Modimo ya bophelo. (Habak. 2:14) Bao ba tsošitšwego bahung le bona ba tla ithuta ka Jehofa. Le gona bjale, eka re ka diriša sebaka seo se tšwelelago go bolela ka Jehofa le mediro ya gagwe e makatšago!—Ps. 34:1; 71:17.