O ka Thoma Bjang Poledišano o Diriša Dipampišana

Go tloga ka January 2018, letlakala la ka ntle la Pukwana ya Seboka sa Bophelo bja Rena le Bodiredi, le be le dutše le bontšha dipoledišano tša mohlala. Re kgothaleditšwe go balela batho ditemana tša Beibele ge re le tšhemong go e na le go no ba nea dikgatišo. E le gore bagoeledi ba kgone go diriša mokgwa wo, ba thoma ka go bona dibidio tša mohlala ba le dibokeng. Ke moka dibidio tšeo di tlo ba thuša go thoma dipoledišano ba diriša Beibele. Na seo se ra gore ge re eya ka ntlo le ntlo ga se ra swanela go diriša dikgatišo tša rena? Le gatee! Ka mohlala, dipampišana di ka re thuša go thoma poledišano ge re le tšhemong. Re ka diriša mokgwa wo o lego ka mo tlase go thoma poledišano re diriša dipampišana:

1. Botšiša mong wa ntlo potšišo yeo e lego letlakaleng la ka ntle gomme o mo kgopele gore a kgethe karabo go tšeo di lego ka tlase ga potšišo yeo.

2. Ke moka o mmontšhe karabo ya Beibele yeo e lego mathomong a letlakala la bobedi la pampišana yeo. Ge nako e dumela, mmalele ditaba tše dingwe tšeo di lego ka pampišaneng yeo gomme le boledišaneng ka tšona.

3. Ke moka o nee mong wa ntlo pampišana yeo, gomme o mo kgothaletše gore a e bale ge a hweditše nako.

4. Pele o sepela, bontšha mong wa ntlo potšišo yeo e rego “Seo o ka Naganišišago ka Sona,” yeo e lego ka morago ga pampišana, ke moka o mmotše gore ge o boa le tla tla le boledišana ka yona le diriša Beibele.

Ge o boela, boledišana le yena ka potšišo yeo o mo tlogeletšego yona, ka morago ga moo o mo tlogelele potšišo e nngwe yeo o tlago go e araba nakong e tlago. O ka kgetha e nngwe ya dipotšišo tšeo di hwetšagalago wepesaeteng ya rena goba ye e lego ka kgatišong yeo e lego ka morago ga letlakala la pampišana yeo o mo neilego yona. Ka nako ya maleba, mo nee poroutšha ya Ditaba tše Dibotse tše di Tšwago go Modimo! goba e nngwe ya dikgatišo tšeo di lego ka go Teaching Toolbox, yeo le tlago go e diriša ge le ithuta Beibele.