Na o be o Tseba?

Batho ba mehleng ya Beibele ba be ba tseba bjang go thoma ga kgwedi le ngwaga?

BAHEBERU bao ba bego ba le Nageng ya Kholofetšo ba be ba thoma ngwaga nakong ya go lema le go bjala, yeo ga bjale e lego magareng ga September le October.

Batho ba be ba balela kgwedi ka go lebelela ngwedi wo o tšeago matšatši a e ka bago a 29 goba a 30 gore o felelele. Ba be ba dira se ka go tsenya matšatši a mangwe goba kgwedi pele ngwaga o thoma. Seo se be se dira gore khalentara e dumelelane le dihla tša go bjala le go buna.

Mehleng ya Moshe, Modimo o ile a botša batho ba gagwe gore ngwaga wa bona o tlo thoma ka kgwedi ya Abibi goba Nisani, e lego seruthwane. (Ek. 12:2; 13:4) Monyanya wo o bego o e ba gona ka kgwedi yeo o be o akaretša go buna dithakangwaga.—Ek. 23:15, 16.

Emil Schürer o ngwadile ka pukung ya gagwe yeo e bitšwago The History of the Jewish People in the Age of Jesus Christ, (175 B.C.–A.D. 135) gore: “Molao wa go oketša kgwedi goba go se e oketše o be o le bonolo kudu.” E bile o ngwadile le gore “paseka e be e swanetše go ketekwa ka Nisani 14 ka morago ga ge letšatši le sobetše. Ba ile ba lemoga ge ngwaga o eya mafelelong gore paseka e tlo ba gona pele ga letšatši leo, ke moka Bajuda ba lokela kgwedi pele ga Nisani.

Dihlatse tša Jehofa di diriša mokgwa wo ge di kgetha letšatši la maleba la Selalelo sa Morena, leo le welago go Nisani 14 ka go khalentara ya Seheberu. Lefaseng ka moka, diphuthego di tsebišwa e sa le pele ka letšatši le.a

Baheberu ba be ba tseba bjang gore kgwedi e a thoma goba e a fela? Lehono re bona dikhalentara tšeo di gatišitšwego goba tše di lego didirišweng tša rena tša elekroniki. Eupša mehleng ya Beibele go be go se bonolo.

Nakong ya meetsefula kgwedi e be e balelwa ka matšatši a 30. (Gen. 7:11, 24; 8:3, 4) Ka morago Baheberu ba be ba sa lebelele gore kgwedi e be matšatši a 30 tlwaa. Khalentareng ya Seheberu, kgwedi e be e thoma ge ngwedi o tletše. Kgwedi ya bona e be e le matšatši a 29 goba a 30.

Ka nako e nngwe Dafida le Jonathane ba ile ba bolela gore: “Gosasa kgwedi e a dula.” (1 Sam. 20:5, 18) Go bonagala nakong ya bona ba be ba balela dikgwedi pele. Baisiraele ba be ba tseba bjang gore kgwedi e mpsha e thomile? Mishnah, e lego puku ya melao le setšo sa Sejuda, e na le boitsebišo bjo itšego. Ka morago ga gore Bajuda ba lokollwe bothopša Babilona, Sanhedrine e ile ya tsena ditaba gare. Kgoro e be e kopana ka letšatši la bo 30 nakong ya menyanya ya dikgwedi tše šupago. Banna bao ba be ba na le boikarabelo bja go tsebatša gore kgwedi e thoma neng. Ba be ba thušwa keng?

Banna bao ba bego ba dula godimo ga meboto ba be ba lebelela godimo bošego go bona ge e ba kgwedi e thomile Jerusalema. Ke moka ka morago ba tsebiša Sanhedrine. Ge banna ba kgorong ba bona gore ba na bohlatse bjo bo tiilego bja gore kgwedi e thomile ba be ba tsebiša motse. Bjale go be go direga eng ge e ba go na le maru goba go na kgodi gomme ba sa kgone go bona ngwedi? Ge e ba go le bjalo, kgwedi e be e tlo fela ka morago ga matšatši a 30 ke moka gwa thoma kgwedi e mpsha.

Kgwedi e mpsha e be e tsebatšwa ka gore ba gotše mollo thabeng ya mehlware kgauswi le Jerusalema. Mollo o bjalo o be o gotšwa le dikarolong tše dingwe ka moka tša Isiraele go tsebatša gore kgwedi e mpsha e thomile. Ka morago ga nako go ile gwa romiwa batho go tsebatša gore kgwedi e fedile. Ka gona seo se be thuša gore Bajuda ka moka bao ba lego Jerusalema le metse ka moka go dikologa Israele, ba tsebe gore kgwedi e mpsha e thomile. Seo se be se dira gore batho ka moka ba kgone go keteka menyanya ka moka ka nako ya maleba.

O ka bala tšhate yeo e tlago go go thuša go kwešiša gore menyanya ya Seheberu e be e dirwa bjang nakong ya Baisiraele.