Tshepa Moahlodi yo a Nago le Kwelobohloko!

1. Ke’ng seo Jehofa o ilego a se ruta Aborahama?

MENGWAGENG e mentšhi e fetilego, Modimo o ile a diriša morongwa go botša Aborahama gore o tlo fediša motse wa Sodoma le Gomora. Le ge Aborahama a be a na le tumelo go Modimo, o ile a thatafalelwa ke go kwešiša seo morongwa a bego a mmotša sona. O ile a botšiša gore: “Na ruri o ka fediša batho ba ba lokilego le ba babe? . . . Na Moahlodi wa batho lefaseng ka moka a ka se dire se se lokilego?” (Gen. 18:​23-33) Jehofa o ile a thuša mogwera yoo wa gagwe gore a kwešiše. Modimo a ka se tsoge a fedišitše batho bao ba lokilego. Seo Jehofa a se boditšego Aborahama se a re hola le go re homotša.

2. Ke’ng seo se re kgodišago gore Jehofa o ahlola gabotse e bile o na le kwelobohloko?

² Ke eng seo se ka re kgodišago gore Jehofa o ahlola ka tsela e botse e bile o na le kwelobohloko? Re ka kgodišwa ke gore “Jehofa yena o bona dipelo” tša batho. (1 Sam. 16:7) Ge e le gabotse o tseba “dipelo tša batho ka moka.” (1 Dikg. 8:39; 1 Dikor. 28:9) Yeo ke nnete ya go hloka bana ba phefo. Re ka se tsoge re kgonne go kwešiša tsela yeo Jehofa a ahlolago ka yona. Ke ka baka leo moapostola Paulo a ilego a budulelwa go ngwala ka Jehofa Modimo gore “dikahlolo tša gagwe ke tšeo di sa nyakišišegego!”—Baroma 11:33.

3-4. Ke dipotšišo dife tšeo re ka ipotšišago tšona, gona re tlo bolela ka’ng sehlogong se? (Johane 5:​28, 29)

³ Le rena re ka ipotšiša dipotšišo tšeo Aborahama a ilego a di botšiša. Re ka ipotšiša gore: ‘Na go na le kholofelo ya tsogo ka batho bao ba ilego ba ahlolwa kua Sodoma le Gomora? Na go ka kgonega gore ba bangwe ba bona ba tsošwe nakong ya “tsogo ya . . . ba sa lokago”?’—Dit. 24:15.

⁴ A re boledišaneng ka seo re se kwešišago ka tsogo. Ga se kgale re hweditše kwešišo e mpsha ka taba ya go “tsogela bophelong” le ya go “tsogela kahlolo.”a (Bala Johane 5:​28, 29.) Sehlogong se le seo se latelago re tlo boledišana ka kwešišo ye e mpsha. Tabeng ya dikahlolo tša Jehofa tše di lokilego, re tlo boledišana ka seo re sa se tsebego le seo re se tsebago.

SEO RE SA SE TSEBEGO

5. Nakong e fetilego dikgatišo tša rena di be dire’ng ka bao ba fedišitšwego kua Sodoma le Gomora?

⁵ Nakong e fetilego, dikgatišo tša rena di be di bolela ka seo se diregago ka batho bao Jehofa a ba ahlolago e le bao ba sa lokago. Re be re dumela gore bao ba ahlotšwego kua Sodoma le Gomora ga ba na kholofelo ya tsogo. Eupša ka morago ga go rapela le go ithuta ka mo go tseneletšego re ile ra lemoga gore re ka se bolele bjalo. Ka baka la’ng?

6. Ke batho bafe ba bangwe bao ba sa lokago bao Jehofa a ilego a ba ahlola, gona ke’ng seo re sa se tsebego?

⁶ Nagana ka dipotšišo tše dingwe tšeo re ka ipotšišago tšona. Go na le dipego tše dintšhi tša Beibele tšeo di hlalosago kamoo Jehofa a ilego a ahlola batho ba sa lokago ka gona, go etša palo yeo e sa tsebjego ya batho bao ba ilego ba fedišwa ka meetsefula goba ditšhaba tšeo Jehofa a ilego a laela Baisiraele gore ba di fediše ge ba be ba eya nageng ya kholofetšo goba madira a 185 000 a Baasiria ao morongwa wa Jehofa a ilego a a bolaya ka bošego bjo tee. (Gen. 7:23; Doit. 7:​1-3; Jes. 37:​36, 37) Na re ka bolela re kgodišegile gore Beibele e re nea mabaka a kwagalago a gore Jehofa a ka se tsoge a tsošitše batho bao a ba ahlotšego? Aowa, ga e re botše. Ke ka baka la’ng re ka re’alo?

7. Ke’ng seo re sa se tsebego ka batho bao ba ilego ba fedišwa ka meetsefula, goba bao ba ilego ba fedišwa kua Kanana? (Bona seswantšho sa letlakala la ka ntle.)

⁷ Ga re tsebe gore Jehofa o be a ahlola bjang motho yo mongwe le yo mongwe, goba go tseba ge e ba bao ba ilego ba bolawa ba ile ba hwetša sebaka sa go ithuta ka Jehofa gomme ba itshola. Ge Beibele e bolela ka nako ya Meetsefula e re botša gore Noa e be e le “mmoledi wa toko.” (2 Pet. 2:5) Eupša ga e re botše gore ge Noa a be a sa aga Areka o ile a leka go bolela le motho yo mongwe le yo mongwe lefaseng yo a bego a tlo fedišwa. Ka mo go swanago, ga re tsebe ge e ba batho ka moka ba kgopo bao ba bego ba dula nageng ya Kanana ba ile ba hwetša sebaka sa go ithuta ka Jehofa le go fetoša tsela yeo ba phelago ka yona.

8. Ke’ng seo re sa se tsebego ka Sodoma le Gomora?

⁸ Re ka reng ka batho bao ba ilego ba fedišwa kua Sodoma le Gomora? Lota e lego monna wa go loka o be a dula Sodoma. Ga re tsebe ge e ba Lota a ile a bolela le bona ka moka ka Jehofa. Batho ba motseng woo e be e le ba kgopo, eupša na ba be ba tseba seo ba se dirago? Gopola gore banna ba motseng woo ba ile ba nyaka go kata baeng ba Lota. Beibele e re batho bao e be e le go tloga ka “mošemane go fihla ka mokgalabje.” (Gen. 19:4; 2 Pet. 2:7) Na re ka re Jehofa Modimo yo a nago le kwelobohloko a ka ba a ile a ahlola batho bao ka lehu le go se ba nee kholofelo ya tsogo? Jehofa o ile a botša Aborahama gore a ka se fediše motse woo ge o ka ba le batho ba lesome ba go loka. (Gen. 18:32) Batho bao ba be ba sa loka gomme Jehofa o ile a ba otla ka baka la dilo tšeo ba bego ba di dira. Na re ka bolela re kgodišegile gore ga go le o tee wa bona yo a tlago go tsošwa ka “tsogo . . . [ya] ba sa lokago?” Re ka se nape re re’alo!

9. Ke’ng seo re sa se tsebego ka Solomone?

⁹ Beibele e bolela ka batho bao ba thomilego ba lokile gomme ba feleletša e le batho ba sa lokago. Yo mongwe wa bona ke Kgoši Solomone. O be a rutilwe gabotse ka ditsela tša Modimo e bile Jehofa a mo šegofatša, eupša ka morago o ile a kgetha go hlankela medimo ya maaka. Dibe tša gagwe di ile tša galefiša Jehofa gomme Baisiraele bao ba ilego ba phela ka morago ba ile ba otlwa ka baka la seo. Beibele e re botša gore “Solomone a robala le borakgolokhukhu ba gagwe gomme a bolokwa Motseng wa Dafida tatagwe.” (1 Dikg. 11:​5-9, 43; 2 Dikg. 23:13) Na tsela yeo a bolokilwego ka yona e kgonthišetša gore o tlo tsošwa? Beibele ga e re botše. Ba bangwe ba ka bolela gore Solomone o tlo tsošwa ka gobane Beibele e re “yo a hwilego o hunologile sebeng sa gagwe.” (Baroma 6:7) Se ga se bolele gore batho bao ba hlokofetšego ba tlo tsošwa ka moka. Ge e le gabotse, ga se gore ge motho a ehwa o no hwetša tokelo ya go tlo phela gape. Tsogo ke mpho e tšwago go Modimo yo lerato. O e nea batho bao a bonago ba ikemišeditše go mo hlankela kamoo go sa felego. (Jobo 14:​13, 14; Joh. 6:44) Na Solomone o tla hwetša mpho ya mohuta woo? Jehofa ke yena a tsebago karabo. Ge e le rena ga re tsebe selo. Selo feela seo re se tsebago ke gore Jehofa o tlo dira seo se lokilego.

SEO RE SE TSEBAGO

10. Jehofa o ikwa bjang ka go fediša batho? (Hesekiele 33:11) (Bona le seswantšho.)

¹⁰ Bala Hesekiele 33:11. Re kgona go bona tsela yeo Jehofa a ikwago ka yona ge a ahlola batho. Moapostola Petro o ile a budulelwa go ngwala mantšu a moporofeta Hesekiele ao a rego “Jehofa . . . ga a rate gore go fedišwe le ge e le mang.” (2 Pet. 3:9) Mantšu ao a tloga a re kgothatša, e bile re a tseba gore Jehofa ga a kitimele go fedišetša batho sa ruri. Ke Modimo yo a nago le kwelobohloko, e bile o e bontšha ka mehla ge go nyakega.

11. Ke bomang bao ba ka se tsošwego, gona re tseba bjang seo?

¹¹ Ke eng seo re se tsebago ka batho bao ba ka se tsošwego? Beibele e re botša ka batho ba sego kae ba bona.b Jesu ile a bolela gore Judase Isikariote a ka se tsošwe. (Bala sehlogo seo se rego “Sebe Seo se ka se Lebalelwego ke sa Mohuta Mang?” go jw.org/nso.) Judase o ile a kgetha go dira dilo tšeo a bego a tseba gore Jehofa le Morwa wa gagwe ga ba di amogele. Ka mo go swanago Jesu o boletše gore ba bangwe ba baetapele ba bodumedi bao ba bego ba mo ganetša ba tlo hwa ntle le kholofelo ya tsogo. (Mat. 23:33) Moapostola Paulo le yena o boletše gore bahlanogi bao ba sa itsholego ba ka se tsošwe.—Baheb. 6:​4-8; 10:29.

12. Ke’ng seo re se tsebago ka kwelobohloko ya Jehofa? Nea mehlala.

¹² Ke eng seo re se tsebago ka kwelobohloko ya Jehofa? O bontšhitše bjang gore ga a nyake gore “go fedišwe le ge e le mang?” Nagana ka batho bao ba ilego ba dira dibe tše dikgolo gomme a ba bontšha kwelobohloko. Kgoši Dafida o ile a dira dibe tše dintšhi tše dikgolo, tšeo di akaretšago bohlotlolo le go bolaya. Dafida o ile a itshola gomme Jehofa a mo lebalela. (2 Sam. 12:​1-13) Kgoši Manase o ile a dira dilo tše dintšhi tše kgopo bophelong bja gagwe. Ka morago ga go dira dilo tšeo ka moka Jehofa o ile a mo lebalela ge a itshola. (2 Dikor. 33:​9-16) Mehlala ye, e re ruta gore Jehofa o bontšha kwelobohloko ge go nyakega gore a dire bjalo. O tlo tsoša batho bao ba ilego ba lemoga gore ba dirile dibe tše dikgolo gomme ba itshola.

13. (a) Ke ka baka la’ng Jehofa a ile a gaugela batho ba Ninife? (b) Ke’ng seo Jesu a ilego a se bolela ka batho ba Ninife?

¹³ Re a tseba gore Jehofa o ile a kwela batho ba motse wa Ninife bohloko. Jehofa o ile a botša Jona gore: “Bobe bja [bona] bo rotogetše pele ga ka.” Eupša Jehofa o ile a ba lebalela ge ba be ba itshola. O be a na le kwelobohloko go feta Jona. Modimo o ile a swanelwa ke go gopotša moporofeta wa gagwe yo a bego a galefile gore Baninife ba be ba sa tsebe “phapano magareng ga seatla sa bona sa le letona le sa le letshadi.” (Jona 1:​1, 2; 3:10; 4:​9-11) Ka morago Jesu o ile a diriša mohlala wa Baninife go ruta batho ka toka ya Jehofa le kwelobohloko ya gagwe. Jesu o boletše gore Baninife bao ba bego ba itshola ba tla “tsoga le moloko wo kahlolong.”—Mat. 12:41.

14. Go “tsogela kahlolo” go tlo kgoma bjang batho ba Ninife?

¹⁴ Jesu o be a e ra gore’ng ge a be a re “ba tla tsoga le moloko wo kahlolong?” Jesu o be a ruta ka go “tsogela kahlolo.” (Joh. 5:29) O be a bolela ka Pušo ya gagwe ya Mengwaga e Sekete, moo ‘ba lokilego le ba sa lokago’ ba tlago go tsošwa. (Dit. 24:15) Bao ba sa lokago ba tlo “tsogela kahlolo.” Seo se ra gore Jehofa le Jesu ba tlo lebelela tsela yeo ba itshwerego ka yona le gore ba arabela bjang go seo ba ithutilego sona. Ge e ba motho wa Ninife a ka gana go hlankela Jehofa o tlo fedišetšwa sa ruri. (Jes. 65:20) Eupša bao ba kgethago go hlankela Jehofa ka go botega, ba tlo thabela go phela kamoo go sa felego.—Dan. 12:2.

15. (a) Ke ka baka la’ng re swanetše go phema go bolela gore batho bao ba fedišitšwego kua Sodoma le Gomora ba ka se tsošwe? (b) Re ka kwešiša bjang mantšu ao a lego go Juda 7? (Bona lepokisi leo le rego “Juda o be a e ra Gore’ng?”)

¹⁵ Ge Jesu a be a bolela ka batho ba Sodoma le Gomora o itše ba tlo gaugelwa “letšatšing la kahlolo,” go feta batho bao ba gannego dithuto tša gagwe. (Mat. 10:​14, 15; 11:​23, 24; Luka 10:12) O be a e ra gore’ng? Re ka nagana gore Jesu o be a feteletša dilo ge a be a bolela mantšu ao. Re ka se re Jesu o be a feteletša dilo, eupša o be a bolela seo se be go se tlo direga ka Baninife. Batho ba Sodoma le Gomora ba ile ba dira dilo tše mpe go swana le batho ba Ninife. Eupša batho ba Ninife ba ile ba ba le sebaka sa go itshola. Le gona, gopola seo Jesu a ilego a se bolela ka go “tsogela kahlolo.” Tsogo ye e tlo akaretša le “bao ba tlwaetšego go dira dilo tše mpe.” (Joh. 5:29) Go bonala go ka ba le kholofelo ka batho ba Sodoma le Gomora. Go ka direga gore ba bangwe ba batho bao ba tsošwe, le gona re ka tla ra hwetša sebaka sa go ba ruta ka Jehofa le Jesu Kriste.

16. Ke’ng seo re se tsebago ka phetho yeo Jehofa a tlo e dirago nakong ya tsogo? (Jeremia 17:10)

¹⁶ Bala Jeremia 17:10. Temana ye e re thuša go gatelela seo re se tsebago. Ka mehla Jehofa ke yena a ‘fetlekago pelo le go hlahloba dipshio.’ Nakong ya ge Jehofa o tsoša batho o tlo “nea yo mongwe le yo mongwe go ya ka ditsela tša gagwe.” Jehofa o dula a bontšha batho kwelobohloko, eupša ge go nyakega gore a tiiše letsogo o dira bjalo. Ga se ra swanela go no phetha ka gore motho a ka se tsošwe ntle le ge re kgodišegile gore seo ke se Beibele e se bolelago!

“MOAHLODI WA BATHO LEFASENG” O TLO ‘DIRA SE SE LOKILEGO’

17. Ke’ng seo re se tsebago ka batho bao ba hlokofetšego?

¹⁷ Batho ba dibilione ba ile a ba hwa ka morago ga gore Adama le Efa ba thekge Sathane ge a be a hlanogela Jehofa Modimo. Lenaba le legolo e lego lehu le feditše batho ba bantšhi! (1 Bakor. 15:26) Go tlo direga’ng ka batho ka moka bao ba hlokofetšego? Palo e lekanyeditšwego ya balatedi ba Kriste ba botegago e lego ba 144 000, e tlo tsošetšwa bophelong bjo bo sa felego legodimong. (Kut. 14:1) Batho ba bantšhi bao ba ratago Jehofa e tlo ba karolo ya “tsogo ya. . . ba lokilego,” gomme ge ba ka dula ba botega nakong ya Pušo ya Kriste ya Mengwaga e Sekete le nakong ya teko ya mafelelo, ba tlo phela ka mo go sa felego mo lefaseng. (Dan. 12:13; Baheb. 12:1) E bile ka yona nako yeo, “ba sa lokago” e lego bao ba sa kago ba hlankela Jehofa goba bao ba bego ‘ba tlwaetše go dira dilo tše mpe,’ ba tlo hwetša sebaka sa gore ba fetoše maphelo a bona gomme ba hlankele Jehofa Modimo. (Luka 23:​42, 43) Le ga gole bjalo, go na le batho bao ba bego ba tlwaetše go dira dilo tše kgopo bao Jehofa a ka se ba tsošego ka gobane ba be ba lwantšhana le yena le merero ya gagwe.—Luka 12:​4, 5.

18-19. (a) Ke ka baka la’ng re ka tshepa gore Jehofa o tlo ahlola batho bao ba hlokofetšego gabotse? (Jesaya 55:​8, 9) (b) Re tlo boledišana ka’ng sehlogong se se latelago?

¹⁸ Na re ka kgodišega gore Jehofa o tlo ahlola gabotse? Ee! Aborahama o ile a kwešiša gabotse gore Jehofa o phethagetše, ke yo bohlale e bile ke “Moahlodi” yo a nago le kwelobohloko. O ile a tlwaetša morwa wa gagwe gomme a mo nea le boikarabelo bja go ahlola. (Joh. 5:22) Jehofa le Jesu ba tseba seo se lego ka pelong ya yo mongwe le yo mongwe. (Mat. 9:4) Ge ba ahlola ba tlo dula ba dira “se se lokilego”!

¹⁹ A re duleng re ikemišeditše go tshepa Jehofa. Ke yena a swanelwago ke go ahlola e sego rena! (Bala Jesaya 55:​8, 9.) Re a tseba gore Jehofa le morwa wa gagwe ba tlo ahlola gabotse, ka gobane Jesu o ekiša tatagwe ka go ba le toka le kwelobohloko. (Jes. 11:​3, 4) Jehofa le Jesu ba tlo ahlola bjang batho nakong ya masetlapelo a magolo? Ke’ng seo re sa se tsebego? Ke’ng seo re se tsebago? Re tlo araba dipotšišo tšeo sehlogong se se latelago.