Amogela Gore go na le Dilo tše o sa di Tsebego

1. Ke bokgoni bofe bjo Jehofa a re filego bjona, gona ka baka la’ng?

JEHOFA o re bopile re na le bokgoni bja go nagana, bja go ithuta dilo tše diswa, bja go kgona go kwešiša le go bontšha bohlale. Ke ka baka la’ng a re bopile ka tsela yeo? Modimo o nyaka gore re atlege ge re ithuta ka yena ebile o nyaka gore ge re mo hlankela re dire diphetho tše dibotse re diriša tsebo e nepagetšego yeo re nago le yona.—Die. 2:​1-5; Baroma 12:1.

2. (a) Na re ka kgona go tseba dilo ka moka? (Jobo 37:​23, 24) (Bona le seswantšho.) (b) Re holega bjang ge re amogela gore ga re tsebe dilo ka moka?

² Le ge re na le bokgoni bja go ithuta dilo tše diswa, re ka se kgone go tseba dilo ka moka. (Bala Jobo 37:​23, 24.) Nagana ka mohlala wa Jobo. Jehofa o ile a mmotšiša dipotšišo tše dintši tšeo di ilego tša bontšha gore go be go na le dilo tše dintši tšeo a sa di tsebego. Seo se mo thušitše gore a be le boikokobetšo le gore a fetoše tsela yeo a bego a nagana ka yona. (Jobo 42:​3-6) Le rena re ka holega ge re ka ba le boikokobetšo gomme ra lemoga gore ga re tsebe dilo ka moka. Ge re ka dula re gopola gore go na le dilo tše dintši tšeo re sa di tsebego, re tlo kgona go ba le boikokobetšo gomme ra tshepa gore Jehofa o tlo dula a re botša dilo tšeo re swanetšego go di tseba e le gore re dire diphetho tše dibotse.—Die. 2:6.

3. Re tlo boledišana ka’ng sehlogong se?

³ Sehlogong se, re tlo boledišana ka dilo tše dingwe tšeo re sa di tsebego le mathata ao re ka bago le ona ka baka la go tsebe dilo tšeo. Le gona, re tlo ithuta gore ke ka baka la’ng go le bohlokwa go se tsebe dilo tše itšego. Go ithuta ka dilo tše, go tlo re thuša go tshepa gore Jehofa “yo a tsebago dilo ka moka,” o re botša dilo tšeo re swanetšego go di tseba.—Jobo 37:16.

GA RE TSEBE GORE BOFELO BO TLO TLA NENG

4. Go ya ka Mateo 24:​36, ke’ng seo re sa se tsebego?

⁴ Bala Mateo 24:36. Ga re tsebe gore bofelo bja tshepedišo ye ya dilo bo tlo tla neng. Le ge Jesu a be a sa le mo lefaseng, o be a sa tsebe “letšatši leo le iri.”a O ile a botša baapostola gore Jehofa ke yena a laolago nako ebile ke yena a kgethago gore ditiragalo tše itšego di tlo direga neng. (Dit. 1:​6, 7) Jehofa o beile nako ya gore o tlo fediša neng tshepedišo ye ya dilo, eupša rena re ka se kgone go tseba gore ge e le gabotse letšatši leo le tlo tla neng.

5. Go se tsebe gore bofelo bo tlo tla neng, go ka dira gore re ikwe bjang?

⁵ Ka ge Jesu a boletše, ga re tsebe gore re tlo swanelwa ke go leta nako e kaakang pele bofelo bo ka tla. Seo se ka dira gore re thome go fela pelo goba go nyama, kudukudu ge eba e le kgale re letetše letšatši la Jehofa. Goba go ka ba thata go kgotlelela ge ba gabo rena goba ba bangwe ba re kwera. (2 Pet. 3:​3, 4) Re ka nagana gore re be re ka se fele pelo ge nkabe re tseba gore bofelo bo tlo tla neng ebile go be go tlo ba bonolo go kgotlelela ge ba bangwe ba re kwera.

6. Go se tsebe gore bofelo bo tla neng go re hola bjang?

⁶ Ka ge Jehofa a se a re botša gore bofelo bo tla neng, seo se re nea sebaka sa go mmontšha gore re mo hlankela ka gobane re mo rata ebile re mo tshepa. Re nyaka go hlankela Jehofa go ya go ile le ka morago ga ge bofelo bo tlile. Go ena le go fetša nako e ntšhi re nagana ka gore “letšatši la Jehofa” le tlo tla neng, re tlo holega kudu ge re ka naganišiša ka dilo tšeo di tlago go direga ka morago ga ge bofelo bo tlile. Seo se tlo re thuša go batamela kgauswi le Jehofa, go mo tshepa le go dira sohle seo re ka se kgonago gore re mo kgahliše.—2 Pet. 3:​11, 12.

7. Ke’ng seo re se tsebago?

⁷ Go bohlokwa gore re nagane ka dilo tšeo re di tsebago. Re a tseba gore mehla ya bofelo e thomile ka 1914. Ka Beibeleng, Jehofa o ngwadile boporofeta bjo bo re bontšhago gore mehla ya bofelo e thomile ka 1914. O re boditše le gore maemo a lefase a be a tlo ba bjang ka morago ga ngwaga woo. Go bona boporofeta bjo bo phethega, go re kgonthišetša gore “letšatši le legolo la Jehofa le kgauswi.” (Tsef. 1:14) Re tseba le modiro wo Jehofa a nyakago re o dira, e lego go botša batho ba bantši ka mo re ka kgonago “ditaba tše dibotse tša Mmušo.” (Mat. 24:14) Re bolela ditaba tše dibotse dinageng tše e ka bago tše 240 le ka maleme a fetago a 1 000. Ga go hlokagale gore re tsebe “letšatši leo le iri” e le gore re tšwele pele re bolela ditaba tše dibotse ka mafolofolo.

GA RE TSEBE GORE JEHOFA O TLO DIRA’NG

8. “Modiro wa Modimo wa nnete” o ra gore’ng? (Mmoledi 11:5)

⁸ Ga se ka mehla re ka dulago re tseba “modiro wa Modimo wa nnete.” (Bala Mmoledi 11:5.) Polelwana ye e bolela ka dilo tšeo Jehofa a di dirago goba dilo tšeo a di dumelelago di direga gore a kgone go phetha morero wa gagwe. Re ka se kgone go tseba gore ke ka baka la’ng Jehofa a dumelela dilo tše itšego di direga goba dilo tšeo a ka di dirago gore a re thuše. (Ps. 37:5) Beibele e swantšha go se kwešiše modiro wa Modimo wa nnete le tsela yeo re sa kwešišego kamoo lesea le golago ka gona ka popelong ya mmago lona. Le lehono borasaense ga ba kwešiše ka mo go feletšego gore lesea le gola bjang ka popelong ya moimana. Ka mo go swanago, ga re kwešiše ka mo go feletšego gore Jehofa o tlo dira dilo bjang.

9. Re ka thoma go nagana’ng ka ge re sa tsebe gore Jehofa o tlo dira dilo bjang?

⁹ Go se tsebe gore Jehofa o tlo re thuša bjang go ka dira gore re dikadike go dira diphetho tše itšego. Re ka dikadika go nolofatša maphelo a rena e le gore re kgone go oketša tirelo ya rena goba go ya mo go nago le tlhokagalo ya bagoeledi ba Mmušo. Re ka nagana gore ga re kgahliše Jehofa ge e ba re leka go oketša tirelo ya rena eupša re sa fihlelele dipakane tša rena. Re ka swarega ka go bolela ditaba tše dibotse eupša ra se be le batho bao re ithutago Beibele le bona goba re ka ba re šoma karolong e itšego e kgethegilego ka mo mokgatlong eupša re na le mathata. Seo se ka dira gore re nagane gore Jehofa ga a re thuše.

10. Go se tsebe gore Jehofa o tlo dira dilo bjang, go ka re thuša gore be le dika dife tše bohlokwa?

¹⁰ Go se tsebe gore Jehofa o tlo dira dilo bjang go tlo re thuša gore re be le dika tše dibotse tša go swana le boikokobetšo le boipoetšo. Re tlo dula re gopola gore tsela yeo Jehofa a dirago dilo ka yona le dikgopolo tša gagwe, ga di swane le tša rena. (Jes. 55:​8, 9) Re tlo ithuta le go tshepa Jehofa ka mo go feletšego le go ithekga ka yena gore re kgone go atlega. Re tlo reta Jehofa ge re atlega bodireding goba medirong e mengwe ya mokgatlo. (Ps. 127:1; 1 Bakor. 3:7) Ge dilo di direga ka tsela yeo re bego re sa nagane ka yona, re swanetše go gopola gore Jehofa o tseba dilo ka moka. (Jes. 26:12) Re dira sohle seo re ka se kgonago gomme ra tshepa gore Jehofa o tlo dula a re thuša. Re kgodišegile gore Jehofa o tlo re nea tlhahlo yeo re e hlokago le ge a ka se diriše mehlolo go swana le nakong e fetilego.—Dit. 16:​6-10.

11. Ke dilo dife tše bohlokwa tšeo re di tsebago?

¹¹ Re a tseba gore Jehofa o a re rata, o lokile ebile o bohlale. Re a tseba gore o tšeela godimo seo re mo direlago sona le seo re se direlago bana babo rena le dikgaetšedi. Re tseba le gore Jehofa o dula a putsa bao ba mmotegelago.—Baheb. 11:6.

GA RE TSEBE DILO TŠEO DI TLAGO GO DIREGA NAKONG E TLAGO

12. Re ithuta’ng go lengwalo la Jakobo 4:​13, 14?

¹² Bala Jakobo 4:​13, 14. Nnete ke gore ditlalemeso ga di tsebje. Mehleng ye re phelago go yona, re welwa ke “ditiragalo tšeo di sa letelwago tšeo di tlago ka nako yeo re sa e letelago.” (Mmo. 9:11) Ka gona, ga re tsebe gore dilo tšeo re nyakago go di dira di tla atlega goba ra di bona ge di phethega.

13. Re ka ikwa bjang ge re sa tsebe dilo tšeo di tlago go direga nakong e tlago?

¹³ Go ka ba thata gore re kgotlelele ka ge re sa tsebe dilo tšeo di tlago go direga nakong e tlago. Bjang? Re ka palelwa ke go thaba ge eba re ka dulela go nagana ka dilo tšeo di ka tlago tša direga. Bophelo bja rena bo ka fetoga ka ponyo ya leihlo gomme seo sa dira gore re ikwe re nyamile ebile re tshwenyegile. Re ka nyama le go fela matla ge eba dilo tšeo re di letetšego di sa direge.—Die. 13:12.

14. Ke’ng seo se ka dirago gore re dule re thabile? (Bona le diswantšho.)

¹⁴ Ge eba re kgotlelela mathata, re kgona go bontšha gore re hlankela Tatago rena wa legodimong ka gobane re mo rata e sego ka gobane go na le selo seo re tlago go se hwetša. Dipego tša Beibele di bontšha gore ga se ra swanela go letela gore Jehofa a re šireletše mathateng ka moka ebile ga a beakanye e sa le pele dilo tšeo di tlago go direga maphelong a rena. O a tseba gore re ka kgona go thaba le ge re sa tsebe dilo ka moka tšeo di tlago go re diragalela nakong e tlago. Re tlo thaba ge re dula re kgopela tlhahlo ya Jehofa le go mo kwa. (Jer. 10:23) Ge re kgopela Jehofa tlhahlo pele re dira diphetho, re tla ba re ekiša mantšu a Jakobo ge a be a re: “Ge Jehofa a rata, re tla phela gomme ra dira se goba sela.”—Jak. 4:15.

15. Ke’ng seo re se tsebago ka bokamoso?

¹⁵ Le ge re sa tsebe selo seo se tlago go direga letšatši le lengwe le lengwe, re a tseba gore Jehofa o re tshepišitše gore re tlo phela ka mo go sa felego, e ka ba legodimong goba mo lefaseng. Re a tseba gore a ka se tsoge a boletše maaka ebile ga go na selo seo se ka mo šitišago go dira dilo ka moka tšeo a di tshepišitšego. (Tito 1:2) Ke Jehofa a nnoši a kgonago go “bolela pele dilo tšeo di tlago go direga e bile go tloga kgale ke yena a bolelago dilo tšeo di sa tšwago di direga.” Dilo ka moka tšeo a boletšego e sa le pele ka Beibeleng gore di tlo direga, di phethagetše. Le dilo ka moka tšeo a rego di tlo direga nakong e tlago di tlo phethagala. (Jes. 46:10) Re kgodišegile gore ga go na selo seo se ka šitišago Jehofa go re bontšha gore o a re rata. (Baroma 8:​35-39) O tlo re nea bohlale, a re homotša le go re nea matla gore re kgone go kgotlelela mathata ao re ka bago le ona. Re ka kgodišega gore Jehofa o tlo re thuša le go re šegofatša.—Jer. 17:​7, 8.

RE KA SE KWEŠIŠE KA MO GO FELETŠEGO TSELA YEO JEHOFA A RE TSEBAGO KA YONA

16. Ke’ng seo Jehofa a se tsebago ka rena, gona seo se dira gore o ikwe bjang? (Psalme 139:​1-6)

¹⁶ Bala Psalme 139:​1-6. Mmopi wa Rena o tseba tsela yeo re bopegilego ka yona, re ikwago ka yona le kamoo re naganago ka gona. O dula a nagana ka rena. O tseba tsela yeo re bolelago ka yona le dilo tšeo re nyakago go di bolela, o tseba le dilo tšeo re di dirago le gore ke ka baka la’ng re di dira. Kgoši Dafida o ile a bolela gore Jehofa o dula a ikemišeditše ebile o kgona go re thuša. O ikwa bjang ge o tseba gore Modimo Ramatlaohle yo a phagamego kudu ebile a bopile dilo ka moka o na le taba le wena? Dafida o itše: “Wena o ntseba gabotse kudu, e bile nna ga ke kgone go kwešiša seo.”—Ps. 139:6.

17. Ke ka baka la’ng go ka ba thata go dumela gore Jehofa o re tseba gabotse?

¹⁷ Mohlomongwe ka baka la tsela yeo re gotšego ka yona, setšo sa rena goba dilo tšeo re bego re di dumela peleng, go ka ba thata go bona gore Jehofa ke Tatago rena yo lerato ebile o na le taba le rena. Ka dinako tše dingwe re ka ikwa okare Jehofa ga a nyake go re tseba ebile o kgole le rena ka baka la diphošo tšeo re ilego ra di dira nakong e fetilego. Dafida le yena o ile a ikwa ka tsela e swanago. (Ps. 38:​18, 21) Motho yo a šomago ka thata go fetoša tsela yeo a phelago ka yona e le gore a phele ka melao ya Modimo a ka ipotšiša gore, ‘ge eba Modimo a ntseba gabotse, ke ka baka la’ng a ka nyaka ke tlogela go phela ka tsela yeo ke e tlwaetšego?’

18. Re holega bjang ge re dumela gore Jehofa o re tseba ga kaone go feta ka tsela yeo re itsebago ka yona? (Bona le diswantšho.)

¹⁸ Re ka ithuta go dumela gore Jehofa o re tseba gakaone go feta ka tsela yeo re itsebago ka yona ebile o bona dilo tše dibotse tšeo re sa di bonego ka rena. Jehofa o a re rata le ge a tseba diphošo tša rena ebile o kwešiša tsela re ikwago ka yona le tsela yeo re dirago dilo ka yona. (Baroma 7:15) Ge re lemoga gore Jehofa o tšeela godimo maiteko a rena, re tlo ba le mafolofolo a go mo hlankela re thabile le go mmotegela.

19. Ke’ng seo re se tsebago ka Jehofa?

¹⁹ Re kgodišegile gore Jehofa ke lerato. (1 Joh. 4:8) Re a tseba gore melao ya gagwe e bontšha gore o a re rata ebile o dula a re nyakela dilo tše dibotse. O nyaka gore re tle re phele ka mo go sa felego ebile o re file topollo gore seo se tle se kgonege. Mpho yeo ya topollo e re kgonthišetša gore re ka kgona go dula re hlankela Jehofa ka tsela yeo a e nyakago le ge re fela re dira diphošo. (Baroma 7:​24, 25) Re a tseba gore “Modimo ke yo mogolo go feta dipelo tša rena e bile o tseba dilo ka moka.” (1 Joh. 3:​19, 20) Ka ge Jehofa a tseba dilo ka moka ka rena, o kgodišegile gore re ka kgona go dira thato ya gagwe.

20. Re ka thušwa ke’ng gore re se ke ra tshwenyega kudu ka dilo tšeo re sa di tsebego?

²⁰ Jehofa o re botša dilo ka moka tšeo re swanetšego go di tseba. Ka gona, ga se ra swanela go tshwenyega kudu ka dilo tšeo re sa di tsebego, go ena le moo, re swanetše go dula re nagana ka dilo tšeo di lego bohlokwa. Ge re dira bjalo, re tla be re bontšha gore re tshepa Jehofa ka mo go feletšego, “yena yo a tsebago dilo ka moka.” (Jobo 36:4) Le ge gona bjale re sa kwešiše dilo ka moka, re fela pelo ya go tlo ithuta dilo tše diswa ka Jehofa le go tlo rutwa ke yena go ya go ile.—Mmo. 3:11.