SEHLOGO SE ITHUTWAGO 23
KOPELO 2 Leina la Gago ke Jehofa
Leina la Jehofa le Bohlokwa go Rena
“Jehofa o re, ‘lena le dihlatse tša ka.’”—JES. 43:10.
SEO RE TLAGO GO ITHUTA SONA
Sehlogong se re tlo ithuta gore re ka dira eng go bontšha gore Jehofa ke yo mokgethwa le gore dilo ka moka tšeo Sathane a di bolelago ka yena ke maaka.
1-2. Re tseba bjang gore leina la Jehofa le bohlokwa kudu go Jesu?
LEINA la Jehofa le bohlokwa kudu go Jesu. Ga go na motho yo a ilego a kgethagatša leina la Tatagwe go mo feta. Sehlogong se se fetilego, re kwele gore Jesu o be a ikemišeditše go hwela leina la Jehofa le seo le se emelago. (Mar. 14:36; Baheb. 10:7-9) Ka morago ga Pušo ya Mengwaga e Sekete, Jesu o tlo bušetša matla ka moka go Jehofa le go kgethagatša leina la gagwe. (1 Bakor. 15:26-28) Dilo ka moka tšeo Jesu a ilego a di dira, di bontšha gore o rata Jehofa kudu le go hlompha leina la gagwe.
2 Jesu o ile a tla lefaseng ka leina la Tatagwe. (Joh. 5:43; 12:13) O ile a thuša balatedi ba gagwe gore ba tsebe leina la Tatagwe. (Joh. 17:6, 26) O ile a ruta ka leina la Tatagwe le go dira mehlolo ka leina leo. (Joh. 10:25) Ge e le gabotse, Jesu o ile a lopa Jehofa gore a šireletše barutiwa ba gagwe ‘ka baka la leina la gagwe.’ (Joh. 17:11) Ka ge Jesu a rata Jehofa kudu, na go ka kgonega gore motho a bolele gore ke yena molatedi wa Jesu eupša a sa tsebe leina la Tatagwe goba go le diriša?
3. Re tlo boledišana ka’ng sehlogong se?
3 Ka ge re le Bakriste bao ba lekago go latela dikgato tša Jesu, re tšeela godimo leina la Tatagwe. (1 Pet. 2:21) Sehlogong se re tlo kwa gore ke ka baka la’ng Jehofa a ile a fa batho bao ba bolelago “ditaba tše dibotse tša Mmušo” leina la gagwe. (Mat. 24:14) Re tlo kwa le gore leina le la Jehofa le swanetše go ba bohlokwa gakaakang go rena.
“BATHO BA LEINA LA GAGWE”
4. (a) Jesu o ile a laela barutiwa ba gagwe gore ba dire’ng pele a boela legodimong? (b) Ke potšišo efe yeo re ka ipotšišago yona ka baka la taelo yeo?
4 Pele Jesu a boela legodimong, o ile a botša barutiwa ba gagwe gore: “Le tla amogela matla ge moya o mokgethwa o fihla godimo ga lena gomme le tla ba dihlatse tša ka Jerusalema, Judea ka moka le Samaria le go fihla karolong ya kgole ya lefase.” (Dit. 1:8) Ditaba tše dibotse di be di ka se bolelwe Isiraele feela. Batho ba ditšhaba ka moka ba be ba tlo hwetša sebaka sa go ba balatedi ba Jesu. (Mat. 28:19, 20) Jesu o itše: “Le tlo ba dihlatse tša ka.” Na batho ba, bao e bego e tlo ba balatedi ba Jesu ba baswa, ba be ba swanetše go tseba leina la Jehofa goba e be e tlo no ba dihlatse tša Jesu? Ditiragalo tšeo go bolelwago ka tšona go Ditiro kgaolo 15, di tlo re thuša go araba potšišo yeo.
5. Baapostola le banna ba bagolo kua Jerusalema ba ile ba bontšha bjang gore batho ka moka ba swanetše go tseba leina la Jehofa? (Bona le seswantšho.)
5 Ka 49 C.E., baapostola le banna ba bagolo ba Jerusalema ba ile ba kopana gore ba boledišane ka taba ya ge e ba batho bao e sego Bajuda ba swanetše go bolla pele e ka ba Bakriste. Ka morago ga poledišano yeo, Jakobo yo e lego ngwanabo Jesu o ile a bolela gore: “[Petro] o laodišitše ka botlalo kamoo Modimo ka lekga la pele a ilego a retologela ditšhabeng go amogela batho ba leina la gagwe.” O be a bolela ka leina la mang? Ge a be a tsopola moporofeta Amose, o ile a re: “Gore bao ba šalago ba tsome Jehofa ka phišego, gotee le batho ba ditšhaba ka moka, e lego batho bao ba bitšwago ka leina la ka, go re’alo Jehofa.” (Dit. 15:14-18) Barutiwa ba baswa ba be ba ka se no ithuta ka Jehofa, eupša ba be ba tlo ‘bitšwa ka leina la gagwe.’ Se se be se bolela gore ba be ba tlo bitšwa ka leina la Modimo le go tsebja ka lona.
Ka morago ga seboka sa sehlopha se bušago sa lekgolong la pele la mengwaga, banna bao ba botegago ba ile ba lemoga gore Bakriste ba swanetše go phelela leina la Modimo (Bona serapa 5)
6-7. (a) Ke ka baka la’ng Jesu a ile a tla lefaseng? (b) Lebaka le lengwe la bohlokwa kudu la gore Jesu a tle lefaseng e be e le lefe?
6 Leina la Jesu le bolela gore “Jehofa ke Phološo,” ebile o ile a bontšha gore Jehofa o a mo diriša gore a phološe bao ba nago le tumelo. Jesu o ile a tla lefaseng gore a hwele batho. (Mat. 20:28) O ile a dira gore batho ba kgone go phološwa le go tlo hwetša bophelo bjo bo sa felego ka go lefelela topollo.—Joh. 3:16.
7 Ke ka baka la’ng batho ba ile ba swanelwa ke go phološwa? Ka baka la seo se diragetšego serapeng sa Edene. Sehlogong se se fetilego, re kwele gore batswadi ba rena ba pele ba ile ba rabela kgahlanong le Jehofa gomme ba palelwa ke go phela ka mo go sa felego. (Gen. 3:6, 24) Jesu o ile a tla lefaseng gore a dire selo sa bohlokwa kudu go feta go phološa batho. Leina la Jehofa le be le sentšwe. (Gen. 3:4, 5) Leina la Jehofa le be le swanetše go kgethagatšwa gore bana ba Adama le Efa ba tle ba kgone go phološwa. Jesu ke yena a ilego a kgona go kgethagatša leina la Jehofa gabotse ka gobane ke yena a bego a mo emetše legato ebile a dira dilo ka moka tšeo Jehofa a bego a nyaka gore a di dire.
Na go ka kgonega gore motho a bolele gore ke yena molatedi wa Jesu eupša a sa tsebe leina la Tatagwe goba go le diriša?
8. Ke’ng seo Bakriste ka moka ba bego ba swanetše go se tseba?
8 Bakriste ka moka ba be ba swanetše go dumela gore Jehofa Modimo, e lego Tatago Jesu, ke yena a dirago gore ba tle ba kgone go phologa. (Joh. 17:3) Le bona ba be ba tlo bitšwa ka leina la Jehofa go swana le Jesu. Ba be ba swanetše go lemoga le gore go bohlokwa go kgethagatša leina leo. Go dira bjalo go be go tlo ba thuša gore ba phologe. (Dit. 2:21, 22) Balatedi ba Jesu ka moka ba be ba swanetše go ithuta ka Jehofa le Jesu. Ke ka baka leo Jesu a ilego a phetha thapelo yeo e lego go Johane kgaolo 17 ka mantšu ao a rego: “Ke ba tsebišitše leina la gago e bile ke tla le tsebatša, e le gore lerato leo o nthatilego ka lona le be go bona gomme nna ke be boteeng le bona.”—Joh. 17:26.
“LE DIHLATSE TŠA KA”
9. Re ka bontšha bjang gore leina la Jehofa le bohlokwa go rena?
9 Balatedi ba Jesu ka moka ba swanetše go tshwenyega ka go kgethagatša leina la Jehofa. (Mat. 6:9, 10) Ka ge re le Dihlatse tša Jehofa, re swanetše go lebelela leina la gagwe e le le bohlokwa kudu go feta maina ka moka. Re ka bontšha ka dilo tšeo re di dirago gore leina le le bohlokwa kudu go rena. Re ka dira’ng gore re kgethagatše leina la Jehofa le go bontšha gore dilo tšeo Sathane a di boletšego ka Jehofa ga se nnete?
10. Ke’ng seo re ithutago sona go Jesaya 42 go ya go 44? (Jesaya 43:9; 44:7-9) (Bona le seswantšho.)
10 Go Jesaya 42 go ya go 44, re ithuta gore re ka dira eng gore re kgethagatše leina la Jehofa. Dikgaolong tšeo, Jehofa o botša bao ba hlankelago medingwana gore ba bontšhe bohlatse bja gore medingwana ya bona e a phela. Ga go le o tee yo a ilego a kgona go bontšha bohlatse bja gore medingwana yeo e gona e le ka nnete.—Bala Jesaya 43:9; 44:7-9
Re bontšha gore Jehofa ke yena Modimo a nnoši ka dilo tšeo re di bolelago le tšeo re di dirago (Bona dirapa 10-11)
11. Jehofa o ile a botša batho ba gagwe eng go Jesaya 43:10-12?
11 Bala Jesaya 43:10-12. Jehofa o boditše batho ba gagwe gore: “Le dihlatse tša ka ebile ke nna Modimo.” Jehofa o botšiša le gore: “Na go na le Modimo yo mongwe ka ntle le nna?” (Jes. 44:8) Re na le tokelo ya go araba potšišo yeo. Dilo tšeo re di dirago le tšeo re di bolelago di bontšha gore Jehofa ke Modimo a nnoši wa nnete. Leina la gagwe ke le bohlokwa kudu go feta maina ka moka. Tsela yeo re phelago ka yona e bontšha gore ka nnete re rata Jehofa ebile re a mmotegela go sa šetšwe mathata ao a ka re welago. Re ka kgona go thuša go kgethagatša leina la Jehofa.
12. Boporofeta bjo bo lego go Jesaya 40:3, 5 bo phethagetše bjang?
12 Re ekiša Jesu Kriste ka go emela leina la Jehofa. Jesaya o ile a bolela e sa le pele gore “motho yo mongwe o tla kgora tsela ya Jehofa.” (Jes. 40:3) Boporofeta bjo bo phethagetše bjang? Johane mokolobetši o ile a lokišetša Jesu tsela gomme Jesu a tla ka leina la Jehofa. (Mat. 3:3; Mar. 1:2-4; Luka 3:3-6) Boporofeteng bjoo go ile gwa bolelwa le gore: “Letago la Jehofa le tla bonagala.” (Jes. 40:5) Le tla bonagala bjang? Nakong ya ge Jesu a le mo lefaseng o ile a emela Jehofa ka bokgwari gomme gwa ba bjalo ka ge e ka Jehofa o tlile mo lefaseng ka boyena.—Joh. 12:45.
13. Re ka ekiša Jesu bjang?
13 Re dihlatse tša Jehofa go swana le Jesu. Re bitšwa ka leina la Jehofa ebile re botša motho yo mongwe le yo mongwe yo re kopanago le yena ka dilo tše dibotse tšeo Jehofa a di dirilego. E le gore re kgone go dira seo gabotse re swanetše go botša batho le ka karolo yeo Jesu a e bapalago go kgethagatšeng leina la Jehofa. (Dit. 1:8) Jesu ke hlatse e kgolo ya Jehofa gomme rena re latela mohlala wa gagwe. (Kut. 1:5) Re bontšha ka ditsela dife tše dingwe gore leina la Jehofa le bohlokwa go rena?
KAMOO RE KA BONTŠHAGO GORE LEINA LA JEHOFA LE BOHLOKWA
14. Re ikwa bjang ka leina la Jehofa? (Psalme 105:3)
14 Re ikgantšha ka leina la Jehofa. (Bala Psalme 105:3.) Jehofa o thaba kudu ge a bona re ikgantšha ka leina la gagwe. (Jer. 9:23, 24; 1 Bakor. 1:31; 2 Bakor. 10:17) Re na le tokelo ya go botša batho ba bangwe gore Jehofa ke yo mokgethwa le gore dilo ka moka tšeo a di dirago di lokile. Ga se ra swanela go tšhaba go botša batho bao re šomago le bona, bao re tsenago le bona sekolo, baagišane ba rena le batho ba bangwe gore re Dihlatse tša Jehofa. Diabolo ga a nyake re botša batho ba bangwe ka leina la Jehofa. (Jer. 11:21; Kut. 12:17) Ge e le gabotse, Sathane le baporofeta ba gagwe ba nyaka go dira gore batho ba lebale leina la Jehofa. (Jer. 23:26, 27) Ka ge re rata leina la Jehofa re nyaka go dula re mo reta ka dinako tšohle, gomme re tlo “thaba letšatši ka moka.”—Ps. 5:11; 89:16.
15. Go bitša leina la Jehofa go bolela’ng?
15 Re dula re bitša leina la Jehofa. (Joele 2:32; Baroma 10:13, 14) Go bitša leina la Jehofa ga se go no diriša leina leo feela. Re tseba Modimo gabotse, re a mo tshepa ebile re mo kgopela le gore a re thuše le go re hlahla. (Ps. 20:7; 99:6; 116:4; 145:18) Re botša batho ba bangwe ka leina la gagwe le dika tša gagwe le go ba kgothatša gore ba fetole maphelo a bona gore Jehofa a kgone go ba amogela.—Jes. 12:4; Dit. 2:21, 38.
16. Re ka bontšha bjang gore Sathane o na le maaka?
16 Re ikemišeditše go tlaišega ka baka la leina la Jehofa. (Jak. 5:10, 11) Ge re botegela Jehofa le ge re na le mathata, re bontšha gore Sathane o na le maaka. Mehleng ya Jobo, Sathane o ile a latofatša bao ba hlankelago Jehofa ka go bolela gore: “Motho a ka dira selo se sengwe le se sengwe e le gore a phološe bophelo bja gagwe.” (Jobo 2:4) Sathane o ile a bolela gore batho ba tlo hlankela Jehofa ge feela dilo di ba sepelela gabotse. Jobo o ile a bontšha gore Sathane o na le maaka. Le rena re na le tokelo ya go bontšha gore re ka se tsoge re tlogetše go hlankela Jehofa go sa šetšwe mathata ao Sathane a ka re lahlelago ka ona. Re kgodišegile gore Jehofa o tlo dula a re hlokomela ka baka la leina la gagwe.—Joh. 17:11.
17. Lengwalo la 1 Petro 2:12 le bontšha gore re ka tumiša Jehofa ka ditsela dife tše dingwe?
17 Re hlompha leina la Jehofa. (Die. 30:9; Jer. 7:8-11) Ka ge batho ba tseba gore re Dihlatse tša Jehofa, re ka dira gore leina la gagwe le tumišwe goba le nyatšwe ka dilo tšeo re di dirago. (Bala 1 Petro 2:12.) Re nyaka go dira sohle seo re ka se kgonago gore re tumiše leina la Jehofa ka dilo tšeo re di bolelago le tsela yeo re itshwarago ka yona. Ge re dira bjalo, re tlo tagafatša leina la Jehofa le ge re sa phethagala.
18. Tsela e nngwe gape yeo re ka bontšhago ka yona gore leina la Jehofa le bohlokwa kudu go rena ke efe? (Bona le mongwalo wa tlase.)
18 Re tshwenyegile kudu ka leina la Jehofa go feta go tshwenyega ka botumo bja rena. (Ps. 138:2) Ke ka baka la‘ng seo se le bohlokwa? Ka gobane batho bao re phelago gare ga bona ba ka thoma go re nyatša ka ge re rata leina la Jehofa.a Jesu o ile a ikemišetša go hwa ka tsela e lešago dihlong gore a tagafatše Jehofa. Ga se a ka a hlabišwa dihlong goba go tshwenyega kudu ka dilo tšeo batho ba bego ba ka di bolelago ka yena. (Baheb. 12:2-4) O be a tshwenyegile kudu ka go dira thato ya Modimo.—Mat. 26:39.
19. O ikwa bjang ka leina la Jehofa, gona ke ka baka la’ng o ikwa ka tsela yeo?
19 Ra thabišwa ke go hlankela Jehofa le tokelo ya go bitšwa Dihlatse tša gagwe. Ka ge leina la Jehofa le le bohlokwa kudu go rena, re tlo dula re mo hlankela le ge batho ba bangwe ba ka re nyatša. Leina la Jehofa le bohlokwa kudu go rena go feta tsela yeo re tumilego ka yona. Eka re ka dula re ikemišeditše go tumiša leina la Jehofa go sa šetšwe mathata ao re ka kopanago le ona. Ge re dira bjalo re tla be re bontšha gore leina la Jehofa le bohlokwa kudu go rena go swana le ge le le bohlokwa go Jesu Kriste.
KOPELO 10 Tumišang Jehofa Modimo wa Rena!
a Monna yo a botegago Jobo o ile a thoma go tshwenyega ka tsela yeo batho ba mo lebelelago ka yona, ka morago ga gore bagwera ba gagwe ba bararo ba bolele gore go na le phošo yeo a e dirilego. Mathomong ge bana ba Jobo ba hlokofala ebile a lahlegelwa ke dilo tšeo a bego a na le tšona, “ga se a ka a dira sebe goba go bea Modimo molato.” (Jobo 1:22; 2:10) Ge Jobo a thoma go latofatšwa, o ile a thoma go bolela “dilo tšeo di sa rego selo.” O ile a tshwenyega ka tsela yeo a tumilego ka yona go e na le go kgethagatša leina la Modimo.—Jobo 6:3; 13:4, 5; 32:2; 34:5.