“Ikgetheleng . . . Yoo le Tlago go mo Hlankela”

1. Re swanetše go dira’ng gore re dule re thabile? (Jesaya 48:​17, 18)

TATAGO rena wa legodimong o re rata kudu ebile o nyaka gore re thabele bophelo gona bjale le nakong e tlago. (Mmo. 3:​12, 13) Ge a be a re bopa, o dirile gore re kgone go dira dilo tše itšego, eupša a dira gore re se ke ra kgona go ikgethela seo se lokilego le seo se sa lokago. (Mmo. 8:9; Jer. 10:23) Jehofa o a tseba gore e le gore re kgone go dula re thabile, re swanetše go mo hlankela le go mo kwa.—Bala Jesaya 48:​17, 18.

2. Sathane o nyaka gore re dumele eng, gona Jehofa o dirile’ng?

² Sathane o nyaka gore re bone eka ga re hloke Jehofa gore re thabe ebile re nagane gore batho ba ka kgona go ipuša. (Gen. 3:​4, 5) Jehofa o dumeletše batho gore ba ipuše ka nakwana go bontšha gore Sathane o na le maaka. Re a bona gore mo lefaseng go tletše mathata ka ge batho ba ipuša. Eupša Beibele e bolela ka mehlala e mentšhi ya banna le basadi bao ba bego ba dula ba thabile ka ge ba be ba hlankela Jehofa. Yo mongwe wa bona e be e le Jesu Kriste. Sehlogong se re tlo kwa gore ke ka baka la’ng Jesu a ile a kgetha go hlankela Jehofa. Ke moka ra kwa gore ke ka baka la’ng re swanetše go tumiša Tatago rena wa legodimong. Mafelelong ra kwa gore ke ka baka la’ng re swanetše go kgetha go hlankela Jehofa.

KE KA BAKA LA’NG JESU A KGETHILE GO HLANKELA JEHOFA?

3. Sathane o ile a tshepiša Jesu eng gona Jesu o ile a mo araba bjang?

³ Ge Jesu a be a le mo lefaseng, o ile a swanelwa ke go kgetha gore o tlo hlankela mang. Ka morago ga gore Jesu a kolobetšwe, Sathane o ile a mo tshepiša gore o tlo mo nea mebušo ka moka ya lefase ge feela a ka wela fase a mo rapela gatee. Jesu o mo arabile ka gore: “Tloga, Sathane! Gobane go ngwadilwe gwa thwe: ‘Ke Jehofa Modimo wa gago yo o swanetšego go mo rapela, e bile ke yena a nnoši yo o swanetšego go mo direla tirelo e kgethwa.’” (Mat. 4:​8-10) Ke ka baka la’ng Jesu a ile a araba Sathane ka tsela yeo? Re tlo kwa ka a mangwe a mabaka ao a dirilego gore a mo arabe ka tsela yeo.

4-5. Ke mabaka afe ao a dirilego gore Jesu a kgethe go hlankela Jehofa?

⁴ Lebaka le legolo leo le dirilego gore Jesu a hlankele Jehofa ke ka gobane a mo rata kudu. (Joh. 14:31) Lebaka le lengwe leo le dirilego gore Jesu a hlankele Jehofa ke ka gobane e be e le selo seo se nepagetšego. (Joh. 8:​28, 29; Kut. 4:11) O a tseba gore Jehofa ke Mmopi, o a botega ebile o re nea dilo tše dintšhi tše dibotse. (Ps. 33:4; 36:9; Jak. 1:17) Jehofa o be sa utele Jesu selo ebile o ile a mo nea le dilo ka moka tšeo a bego a na le tšona. (Joh. 1:14) Sathane yena ga a swane le Jehofa. Sathane o dirile gore mo lefaseng go be le lehu. O na le maaka, o na le megabaru ebile o nyaka dilo tšeo di holago yena a feela. (Joh. 8:44) Jesu o be a tseba Jehofa gabotse ebile a tseba le Sathane. O be a sa nyake go swana le Sathane ka gobane Sathane o ile a hlanogela Jehofa.—Bafil. 2:​5-8.

⁵ Lebaka le lengwe leo le dirilego gore Jesu a kgethe go hlankela Jehofa ke gore o be a tseba gore ge a dira bjalo go tlo ba le mafelelo a mabotse. (Baheb. 12:2) O be a tseba gore ge a ka dula a botega, o tlo kgethagatša leina la Tatagwe le go dira gore tlaišego ka moka yeo e bakilwego ke Diabolo e fele.

KE KA BAKA LA’NG RE SWANETŠE GO HLANKELA JEHOFA?

6-7. Ke ka baka la’ng lehono batho ba bantšhi ba sa hlankele Jehofa, gona ke ka baka la’ng re swanetše go rapela yena feela?

⁶ Lehono batho ba bantšhi ga ba hlankele Jehofa ka gobane ga ba tsebe gore o gona ebile ga ba tsebe le dika gagwe. Ga ba lemoge le dilo tše dibotse tšeo a ba diretšego tšona. Batho ba ba swana le bao moapostola Paulo a ilego a ba botša ditaba tše dibotse kua Athene. Le bona ba be ba sa tsebe Modimo.—Dit. 17:​19, 20, 30, 34.

⁷ Paulo o ile a botša batho bao ba bego ba mo theeditše gore Modimo wa nnete o “nea batho ka moka bophelo le mohemo le dilo ka moka.” O ile a tšwela pele ka gore: “Ka yena re na le bophelo, re a sepela e bile re gona.” Modimo ke mmopi, gomme “go tšwa mothong o tee o dirile setšhaba se sengwe le se sengwe sa batho,” ka gona re swanetše go rapela yena feela.—Dit. 17:​25, 26, 28.

8. Ke’ng seo Jehofa a ka se tsogego a se dirile, gona o bontšhitše bjang gore o re rata kudu?

⁸ Jehofa a ka gapeletša batho gore ba mo hlankele ka ge e le Mmopi wa bona ebile e le Mmuši wa legohle. Eupša a ka se tsoge a dirile bjalo. O re file bohlatse bja gore o gona ebile o re rata kudu. O nyaka gore batho ba bantšhi ka mo go ka kgonegago e be bagwera ba gagwe ka mo go sa felego. (1 Tim. 2:​3, 4) Ke ka baka leo Jehofa a re tlwaeditšego gore re rute batho ba bangwe ka dilo tše dibotse tšeo a tlo di direlago batho le kamoo a tlo di dirago ka gona. (Mat. 10:​11-13; 28:​19, 20) O dirile gore go be le diphuthego a ba a re nea le balebeledi bao ba re hlokomelago.—Dit. 20:28.

9. Jehofa o bontšhitše bjang gore o rata batho ka moka?

⁹ Jehofa o bontšha gore o rata batho ka go ba nea dilo tše dibotse go akaretša le bao ba sa dumelego gore o gona. Nagana ka se: Ke kgale batho ba phela ka tsela yeo ba e ratago go e na le go kwa Modimo. Lega go le bjalo, Jehofa o be a dutše a ba nea dilo tšeo ba di hlokago gore ba kgone go phela le go ipshina ka bophelo. (Mat. 5:​44, 45; Dit. 14:​16, 17) O dirile gore ba kgone go thabela go ba le bagwera, go ba le malapa le go hwetša moputso ka baka la mošomo wa bona. (Ps. 127:3; Mmo. 2:24) Dilo tše ka moka ke bohlatse bjo bo lego molaleng bja gore Tatago rena wa legodimong o rata batho ka moka. (Ek. 34:6) Ga bjale a re boledišaneng ka mabaka a mangwe a gore re kgethe go hlankela Jehofa le gore yena o re šegofatša bjang ge re dira bjalo.

KE KA BAKA LA’NG RE KGETHA GO HLANKELA JEHOFA?

10. (a) Ke ka baka la’ng re hlankela Jehofa? (Mateo 22:37) (b) O holegile bjang ka baka la ge Jehofa a go lebalela? (Psalme 103:​13, 14)

¹⁰ Go swana le Jesu, re hlankela Jehofa ka gobane re mo rata kudu. (Bala Mateo 22:37.) Ge re ka ithuta ka dika tša Jehofa re tlo kgona go gwerana le yena. Ka mohlala, o dula a ikemišeditše go re lebalela. Ge Baisiraele ba be ba sa mo kwe, o be a ba lopa ka gore: “Sokologang hle, le lokišeng ditsela tša lena.” (Jer. 18:11) Jehofa o tseba gabotse gore re a fokola le gore re lerole. (Bala Psalme 103:​13, 14.) Ge o ka naganišiša ka tsela yeo Jehofa a go lebalelago ka yona, o tlo nyaka go mo hlankela ka mo go sa felego.

11. Ke mabaka afe ao a dirago gore re kgethe go hlankela Tatago rena wa legodimong?

¹¹ Re hlankela Jehofa ka gobane re swanetše go dira bjalo. (Mat. 4:10) Re a tseba le gore ge re hlankela Jehofa, re tlo diragalelwa ke dilo tše dibotse. Ge re hlankela Jehofa, re kgethagatša leina la gagwe, re bontšha gore Diabolo o na le maaka ebile re thabiša le pelo ya Tatago rena. Ge eba re ka kgetha go hlankela Jehofa gona bjale, gona re tlo kgona le go mo hlankela ka mo go sa felego.—Joh. 17:3.

12-13. Re ithuta’ng phihlelong ya Jane le Pam?

¹² Re ka kgona go ithuta go rata Jehofa re sa le ba banyenyane, gomme ra tšwela pele re mo rata le ge re gotše. Nagana ka mohlala wa bana ba motho bao ba bitšwago Jane le Pam.a Jane o be a na le mengwaga e 11 gomme Pam a na le e 10 ge ba be ba thoma go ithuta Beibele. Le ge batswadi ba bona ba be ba sa nyake go ithuta, ba ile ba ba dumelela gore ba ithute Beibele le Dihlatse tša Jehofa ge feela ba ka se tlogele go ya kerekeng yeo lapa la gabo bona le bego le e tsena. Jane o re: “Dilo tšeo Dihlatse di nthutilego tšona di diriša Beibele, di nthušitše gore ke se ke ka dira dilo tše mpe tšeo bana bao ke bego ke tsena le bona sekolo ba bego ba di dira, tše bjalo ka go diriša diokobatši le go ba le thobalano.”

¹³ Ka morago ga mengwaga e sego kae, Jane le Pam ba ile ba thoma go ba bagoeledi. Ka morago ba ile ba bulamadibogo ge ba dutše ba hlokometše batswadi ba bona bao ba godilego. Ge Jane a hlalosa kamoo a ikwago ka gona ka dilo tšeo Jehofa a ba diretšego tšona o re: “Ke bone gore Jehofa o dula a hlokomela bagwera ba gagwe ebile lengwalo la 2 Timotheo 2:19 le bolela nnete ge le re, ‘Jehofa o tseba ba gagwe.’” Ga go pelaelo gore Jehofa o dula a hlokomela bao ba kgethago go mo rata le go mo hlankela.

14. Dilo tšeo re di bolelago le tšeo re di dirago di ka re thuša bjang go emela leina la Jehofa? (Bona le diswantšho.)

¹⁴ Re nyaka gore batho ba tsebe nnete ka Jehofa. Ka mohlala, a re re o na le mogwera yo a nago le botho, yo a sa timanego ebile a lebalela. Ka letšatši le lengwe o kwa motho a mo latofatša ka gore o na le pelo e mpe ebile ga a botege. O tlo dira eng? Ga go pelaelo gore o tlo mo emelela. Ka mo go swanago, ge Sathane le batho bao ba šomago le yena ba leka go senya leina la Jehofa ka go phatlalatša maaka ka Yena, rena re bolela nnete ka yena le go emela leina la Gagwe. (Ps. 34:1; Jes. 43:10) Dilo tšeo re di dirago le tšeo re di bolelago di bontšha gore re nyaka go hlankela Jehofa ka dipelo tša rena ka moka.

15. Diphetogo tšeo moapostola Paulo a ilego a di dira bophelong bja gagwe di ile tša mo hola bjang? (Bafilipi 3:​7, 8)

¹⁵ Re dira diphetogo tše itšego maphelong a rena gore re kgone go kgahliša Jehofa goba re mo hlankele ka mo go oketšegilego. Ka mohlala, moapostola Paulo o be a na le maemo a bohlokwa bodumeding bja Sejuda, eupša o ile a tlogela bodumedi bjoo gore a kgone go ba molatedi wa Kriste le go hlankela Jehofa. (Bagal. 1:14) Ka baka leo, o ile a ba le ditšhegofatšo bophelong bja gagwe ebile o be a tlo buša le Kriste legodimong. Moapostola Paulo ga se a ka a itshola ka baka la ge a kgethile go hlankela Jehofa gomme le rena re ka se itshole ge re ka mo ekiša.—Bala Bafilipi 3:​7, 8.

16. Re ithuta’ng phihlelong ya kgaetšedi Julia? (Bona le diswantšho.)

¹⁶ Ge eba go hlankela Jehofa go ka tla pele bophelong bja rena, Jehofa o tlo re šegofatša gona bjale le nakong e tlago. Nagana ka phihlelo ya kgaetšedi yo a bitšwago Julia. Pele Julia a ka ithuta ditherešo, o be a opela khwaereng ya kereke moo a thomilego e sa le yo monyenyane. Ka ge a be a opela gabotse, seopedi se sengwe seo se ithutetšego go opela, se ile sa thoma go mo tlwaetša gore e be seopedi seo se nago le bokgoni. Go se kgale ke ge Julia a tumile ebile a opela mafelong ao a tsebegago. Ge a be a le sekolong sa go ithutela tša mmino, motho yo mongwe yo a bego a tsena le yena ka klaseng o ile a thoma go bolela le yena ka Modimo a ba a mo hlalosetša gore leina la Modimo ke Jehofa. Ga se gwa tšea nako gore Julia thome go ithuta Beibele gabedi ka beke. Mafelelong o ile a dira phetho ya gore a fetše nako e ntšhi a hlankela Jehofa go e na le gore a swarege ka mmino. Phetho yeo e be e se bonolo. O re: “Batho ba bantšhi ba be ba mpotša gore ke senya talente ya ka, eupša nna ke be ke nyaka go swarega ka go hlankela Jehofa.” Lehono o ikwa bjang ka phetho yeo a e dirilego mengwaga e 30 e fetilego? O re: “Ke thabile kudu ka baka la go kgetha go hlankela Jehofa ebile ke a tseba gore nakong e tlago Jehofa o tlo mpha dilo ka moka tšeo ke di kganyogago.”—Ps. 145:16.

TŠWELA PELE O HLANKELA JEHOFA

17. Taba ya gore re phela mehleng ya bofelo e kgoma bjang batho bao ba šetšego ba kgethile go hlankela Jehofa le bao ba sa hlwago ba kgetha go mo hlankela?

¹⁷ Re phela mehleng ya bofelo. Moapostola Paulo o ngwadile gore: “Gobane go šetše ‘lebakanyana’ gomme ‘yo a tlago o tla fihla, a ka se diege.’” (Baheb. 10:37) Mantšu a a re kgoma bjang? Nako e šetšego ya gore batho ba kgethe go hlankela Jehofa ke e nyenyane kudu. (1 Bakor. 7:29) Ge eba re šetše re kgethile go hlankela Modimo, re a tseba gore le ge re ka kopana le mathata e tlo ba ka “lebakanyana.”

18. Jehofa le Jesu ba nyaka gore re dire’ng?

¹⁸ Jesu o ile a kgothaletša barutiwa ba gagwe gore ba mo latele ka go se kgaotše. (Mat. 16:24) Ge eba re na le mengwaga e mentšhi re hlankela Jehofa, ga se ra swanela go fela matla. Re swanetše go šoma ka thata gore re dule re mo hlankela. Go ka no se be bonolo, eupša ge re ka dula re hlankela Jehofa, re tlo ba le ditšhegofatšo tše dintšhi le go kgotsofala.—Ps. 35:27.

19. Re ithuta’ng phihlelong ya ngwanabo rena Gene?

¹⁹ Batho ba bangwe ba nagana gore ba ka se ipshine ka bophelo ge ba ka kgetha go hlankela Jehofa. Ge eba o sa le moswa, na o nagana gore ge o ka kgetha go hlankela Jehofa o ka se ipshine ka bophelo? Ngwanabo rena yo mongwe wa moswa yo a bitšwago Gene o re: “Ke be ke bona okare go ba yo mongwe wa Dihlatse tša Jehofa go a nkgatelela. Go be go bonagala eka bana ba bangwe bao ke lekanago le bona ba be ba ipshina ka bophelo, ba ratana ebile ba bapala dipapadi tša bidio tšeo di nago le bošoro mola nna ke swanetše go fetša nako e ntšhi ke le dibokeng le tšhemong.” Gene o ile a dira eng ge a be a ikwa ka tsela yeo? O re: “Ke ile ka thoma go dira dilo tšeo dithaka tša ka di bego di dira gomme ke ipshina ka nakwana eupša lethabo la gona le be le sa re selo. Ke ile ka thoma go naganišiša ka tsela yeo ke holegago ka gona ge ke ekwa seo Beibele e se bolelago gomme ka kgetha go hlankela Jehofa ka pelo ka moka. Go tloga ka yona nako yeo, ke be ke bona okare Jehofa o araba dithapelo tša ka.”

20. Re swanetše go ikemišetša go dira’ng?

²⁰ Mopsalme o ile a opelela Jehofa ka gore: “Go thaba yo o mo kgethago gomme wa mmatametša kgauswi le wena gore a dule ntlong ya gago.” (Ps. 65:4) Eka re ka ikemišetša go dula re hlankela Jehofa gomme ra bolela go swana le Joshua ra re: “Ge e le nna le ba lapa la ka re tla hlankela Jehofa.”—Josh. 24:15.