BASWA BA BOTŠIŠA

Ke ka Baka la Eng Batswadi Ba ka ba sa Ntumelele ke Ipshina?

Bagwera ba gago ba go laleditše mmokanong mafelo bekeng a. O kgopela batswadi ba gago gore o ye moo eupša ba gana ba tiišitše. Seo ga se go makatše, ka gobane le nakong e fetilego ba ile ba gana ge o ba kgopela.

Sehlogong se

Ke ka baka la eng batswadi ba ka ba dula ba gana?

Ge eba o ikwa eka batswadi ba gago ba dula ba gana ge o ba kgopela selo se itšego, o ka phetha ka gore batswadi ba ka ga ba nyake ke ipshina.

Moswa yo a bitšwago Marie o ile a ikwa ka mo go swanago ge a sa tšo hwetša founo la mathomo, o re : “Tate o mpeetše melao e mentšhi go swana le gore ke taoneloute dilo dife, ke bolele le bomang le gore ke bolele le bona go fihla nako mang. Mola ka lehlakoreng le lengwe bagwera ba ka ba be ba dira se sengwe le se sengwe seo ba se nyakago!”

Seo o ka se naganago: Na tatago Marie o be a leka go thibela Marie gore a se ke a ipshina? Ke eng se sengwe seo a ka bago a tshwenyegile ka sona?

Koloi e sepela mo tseleng. Ka thoko ga tsela go na le leswao leo le bontšhago gore koloi ga se ya swanela o kitima go feta lebelo la “50”. Lenaka la koloi le bontšha gore e sepela ka lebelo la 50. — Melao ya tsela e go thibela gore o se ke wa dira seo o se ratago eupša e go šireletša gore o se ke wa wela kotsing. Se se swana le melao yeo batswadi ba go beelago yona

Leka se: inagane o le motswadi, o na le ngwana wa moswa yo a sa tšwago go hwetša founo. O be o ka tshwenyega ka eng? Ke melao efe yeo o ka e beago go šireletša ngwana wa gago yo a lego mahlalagading? O be o ka reng ge ngwana wa gago yo a lego mahlalagading a be a go botša gore ga o nyake a ipshina?

“Tate o be a dula a re “Leka go nagana gore go bjang go ba motswadi. Go dira seo go nthušitše go se bone feela bohlokwa bja melao ya gagwe eupša go nthušitše le go bona gore ke ka lebaka la eng a mpeela yona. Ge nkabe ke na le bana ke be ke tlo letela gore ba latele melao yeo tate a bego a nyaka ke e latela.”—Tanya.

Nka dira eng gore batswadi ba ka ba dumele?

Mošemane o kwatile kudu le go ngala gomme o phuthile matsogo.

O se ke wa dira se: Go ngala, go balabala, goba go ba manganga.

“Go baka mašata ga go thuše ka selo, go ena le moo go ka dira gore wena le batswadi ba gago le ikwe le lapile monaganong. Ge eba o rata di ngangišano batswadi ba gago ba ka bona eka ga wa gola ka mo go lekanego gore o ka hwetša tokologo.”—Richard.

Leka se: O se ke wa kitimela go araba go ena le moo leka go bona dilo ka tsela yeo batswadi ba gago ba di lebelelago ka yona. Ipotšiše gore na ba tloga ba sa go tshepe goba ga ba tshepe mo o yago gona le batho bao o tla bego o na le bona? Ke ka baka la eng o sa boledišane le bona ka taba ye wa leka go kwešiša mabaka a bona?

“Batswadi ba ka ba na le mabaka a kwagalago ge ba bea molao o mongwe le o mongwe. Batswadi ba ka ga ba leke go nthibela gore ke ipshine, ba nyaka feela gore ke ipshine ka tsela ya maleba, tsela yeo e ka se feleletšego ka mathata.”—Ivy.

Molao wa motheo wa Beibele: “Setlaela se ntšha bogale bja sona ka moka, Eupša yo bohlale o dula a thekgile ditho.”—Diema 29:11.

Ngwanenyana yo a lego mahlalagading o romelana melaetša ebile o diriša social media bošego.

O se ke wa dira se: O se ke wa dira dilo batswadi ba gago ba sa tsebe.

“Ke ile ka leka go tshela melao yeo tate a bego a nneile yona ge ke be ke diriša founo ya ka. Ke lekile go hwetša ditsela tša go romela bagwera ba ka melaetša bošego goba go taonelouta dilo tšeo tate a bego a sa nyake ke eba le tšona founong. Eupša mafelelong o ile a tseba ka seo ke moka a nnea melao e mengwe e mentšhi ka ge a be a se sa ntshepa. Go leka go tshela melao ga se kakanyo e botse.”—Marie.

O ka leka se: Bontšha batswadi ba gago gore ba ka go tshepa ka go dirišana le bona.

“O se ke wa fela pelo. Go ka tšea nako gore batswadi ba gago ba fetoše molao o itšego, eupša ge ba bona o latela melao yeo ba go beetšego yona ba ka go dumelela go dira dilo tše di oketšegilego.”—Melinda.

Molao wa motheo wa Beibele: “Dulang le ekwa batswadi ba lena..”—Bakolose 3:20.

Mošemane yo a leho mahlalagading o tloga a kgopela. O naganne ka baswa ba bangwe ba bararo bao ba lego mahlalagading.

O se ke wa dira se: Go gapeletša batswadi ba gago gore ba go dumelele go dira seo dithaka tša gago di dumeletšwego go se dira.

“Go dula o gapeletša batswadi ba gago gore ba go dumelele go dira seo o se nyakago go ka se go thuše ka selo.”—Natalie.

O ka leka se: Diriša letlakala la go itekola leo le rego “Go Naganišiša ka Melao” go go thuša go boledišana le batswadi ba gago.

“Motswadi o nyaka go bona gore o kgona go dira diphetho tše dibotse. Ka gona ge ke boledišana le batswadi ba ka, ga ke diriše maikwelo eupša ke leka go thekga taba yeo re boledišanago ka yona ka mabaka a kwagalago. Go dira bjalo go nthuša gore batswadi ba ka ba ntumelele go dira seo ke se kgopelago.”—Joseph.

Molao wa motheo wa Beibele: “Hlompha papago le mmago.”—Baefeso 6:2.