Diema 16:3—“Gafela Morena Mediro ya Gago ka Moka”

“Ithekge ka Jehofa dilong ka moka tšeo o nyakago go di dira, Gomme dilo tšeo o nyakago go di dira, di tla atlega.”—Diema 16:3, Phetolelo ya Lefase le Leswa.

“Gafela MORENA mediro ya gago ka moka, gomme o tla phethagatša merero ya gago.”—Diema 16:3, New International Version.

Seo se Hlaloswago ke Diema 16:3

Lengwalo le la diema le kgonthišetša bao ba rapelago Modimo wa therešo gore o tla atlegiša dilo tšeo ba nyakago go di dira ge eba ba mo tshepa ebile ba tsoma tlhahlo ya gagwe.

“Ithekge ka Jehofa dilong ka moka tšeo o nyakago go di dira.” Bahlanka ba Jehofaa ba tsoma tlhahlo go yena pele ba ka dira diphetho. (Jakobo 1:5) Ka baka la’ng? Sa pele, batho gantši ga ba kgone go laola dilo tšeo di diregago maphelong a bona. (Mmoledi 9:11; Jakobo 4:13-15) Go oketša moo, ba ka no ba ba se na bohlale bja go dira selo seo ba nyakago go se dira. Ke ka lebaka leo ba bantši ka bohlale ba ithekgago ka Modimo dilong ka moka tšeo ba nyakago go di dira. Ba dira se ka gore ge ba rapela ba kgopele tlhahlo ya Jehofa gotee le go dira dilo ka go dumelelana le thato ya gagwe go etša ge go ngwadilwe ka lentšung la gagwe elego Beibele.—Diema 3:5, 6; 2 Timotheo 3:16, 17.

Polelwana yeo e rego “gafela MORENAb mediro ya gago ka moka” ge e le gabotse e bolela gore “lahlela mediro ya gago go MORENA.” Go ya ka nyakišišo e nngwe, polelwana ye e bolela ka “monna yo a tlošago morwalo mokokotlong wa gagwe gomme a o nea motho yo a tiilego le yo a kgonago go kgotlelela morwalo woo.” Bao ba ithekgago ka Modimo ba ka kgodišega gore o tla ba thuša le go ba thekga.—Psalme 37:5; 55:22.

Polelwana “dilong ka moka tšeo o nyakago go di dira” ga e bolele gore Modimo o tla atlegiša le go šegofatša dilo ka moka tšeo motho a nyakago go di dira. Ele gore batho ba kgone go hwetša ditšhegofatšo tša Jehofa ba swanetše go dira dilo ka go dumelelana le ditekanyetšo tša gagwe le thato ya gagwe. (Psalme 127:1; 1 Johane 5:14) Modimo ga a šegofatše batho ba go se kwe. Go ena le moo, “O dira gore maano a batho ba babe a se atlege.” (Psalme 146:9) Mola ka lehlakoreng le lengwe, a thekga bao ba ikokobeletšago yena ka go hlompha melao yeo a e ngwadilego ka Beibeleng.—Psalme 37:23.

“Gomme dilo tšeo o nyakago go di dira, di tla atlega.” Diphetolelo tše dingwe di hlalosa polelwana ye e le “merero ya gago e tla phethagala.” Ka Mangwalong a Seheberu ao batho ba tlwaetšego e le Testamente ya Kgale, lentšu leo le fetoletšwego ka Seisemane elego go “phethega” le fa kgopolo ya go thea motheo ebile gantši le lebiša tlhokomelo go dilo tšeo Modimo a di dirilego. (Diema 3:19; Jeremia 10:12) Ka mo go swanago Modimo o tlo phethagatša merero ya gagwe go bao ba dirago seo se lokilego mahlong a gagwe, gomme o tlo ba thuša gore ba be le bophelo bjo bo thabišago le bjoo bo šireletšegilego.—Psalme 20:4; Diema 12:3.

Seo se bolelwago ke Diema 16:3

Seema se se ngwadilwe ke Kgoši Solomone, yo a ngwadilego bontši bja puku ya Diema. O be a kgona go bolela Diema tše dintši ka gobane Modimo o mo nneile bohlale.—1 Dikgoši 4:29, 32; 10:23, 24.

Go kgaolo 16, Solomone o thoma go reta bohlale bja Modimo le ka mo a hloilego bao ba ikgantšhago ka gona. (Diema 16:1-5) Ke moka kgaolo ye e thuša mmadi go kwešiša therešo yeo e tšwelelago gantši ka pukung ya Diema yeo e rego: Batho ba ka ba bohlale le go atlega ge feela ba ikokobeditše ebile ba dumelela Modimo gore a hlahle dikgato tša bona. (Diema 16:3, 6-8, 18-23) Therešo ye e ipušeletša ga mmalwa ka Beibeleng.—Psalme 1:1-3; Jesaya 26:3; Jeremia 17:7, 8; 1 Johane 3:22.

Bogela bidio e kopana ya kakaretšo ya puku ya Diema.