Mongwalo wa Tlase
c Dintlha tše seswai ke tše di latelago: (1) O se ke wa gakanega; (2) nagana ka tsela e nepagetšego; (3) bulela kgopolo ya gago mehuta e mefsa ya mošomo; (4) phela ka tekanyo ya seo o nago le sona—e sego ka ya o mongwe; (5) hlokomela mokitlana; (6) boloka lapa le momagane; (7) boloka boitlhompho bja gago; gomme o (8) ipeele peakanyo ya tšhelete.
Ge o Gateleditšwe ke Mathata a Maphelo
10. Mohlala wa Kgoši Dafida o bontšha bjang gore ke ga bohlale go bota Jehofa ge re lebeletšane le bolwetši bjo bošoro?
10 Na ke ga bohlale go bota Jehofa ge re lebeletšane le bolwetši bjo bošoro? Ruri ke ga bohlale! Jehofa o kwela batho ba gagwe bao ba babjago bohloko. Go feta moo, o ikemišeditše go thuša. Ela hloko mohlala wa Kgoši Dafida. Mohlomongwe yena ka noši a ka ba a be a babja o šoro ge a be a ngwala ka ditirišano tša Modimo le molwetši yo a lokilego. O itše: “Xe a babya à le dilaong, Morêna ó tlo mo thêkxa; xo lala xa xaxwe à le bohlokong—Morêna ó tlo di phekxola tšohle.” (Psalme 41:1, 3, 7, 8) Go bota ga Dafida Modimo go ile gwa dula go le matla gomme mafelelong kgoši e ile ya fola bolwetšing bja yona. Lega go le bjalo, re ka bontšha bjang go bota ga rena Modimo ge re gateleditšwe ke mathata a maphelo?