Beibele e Re’ng ka go Hlokomela Batswadi ba Rena Bao ba Tšofetšego?

Karabo ya Beibele

Bana ge ba godile ba swanetše go kgonthišetša gore batswadi ba bona bao ba tšofetšego ba hlokometšwe gabotse. Le gona Beibele e re bana bao ba godilego ba swanetše ‘go diriša boineelo go Modimo go ba lapa la gabo bona le go lefa batswadi ba bona, gobane se se a kgahliša go Modimo.’ (1 Timotheo 5:4) Ge bana bao ba godilego ba kgonthišetša gore batswadi ba bona ba hlokometšwe gabotse ba tla be ba latela molao wa Beibele woo o rego ba godiše batswadi ba bona.—Baefeso 6:2, 3.

Beibele ga e re botše ka go lebanya gore re hlokomele batswadi ba rena bao ba tšofetšego bjang, eupša e re botša ka mehlala ya banna le basadi bao ba bego ba na le tumelo, bao ba ilego ba hlokomela batswadi ba bona bao ba tšofetšego. Le gona e re fa keletšo ya Beibele yeo e ka re thušago gore re kgone go ba hlokomela.

• Batho ba bangwe ba mehleng ya ge Beibele e be e ngwalwa ba ile ba hlokomela batswadi ba bona bao ba tšofetšego bjang?

• Ke dikeletšo dife tša ka Beibeleng tšeo di ka re thušago gore re hlokomele batswadi ba rena bao ba tšofetšego?

• Na Beibele e re batswadi bao ba tšofetšego ba swanetšwe go hlokomelwa ka gae

Batho ba bangwe ba mehleng ya ge Beibele e be e ngwalwa ba ile ba hlokomela batswadi ba bona bao ba tšofetšego bjang?

Ba ile ba dira seo ka mekgwa e fapafapanego, go ithekgile ka maemo a bona.

• Josefa o be a dula kgole le tatagwe yo a be go a tšofetše e lego Jakobo. Eupša mafelelong o ile a rulaganya gore a tle kgaufsi le yena. Josefa o ile a nea tatagwe ntlo, a mo fepa a ba a mo šireletša.—Genesi 45:9-11; 47:11, 12.

• Ruthe o ile a hudugela nageng yeo mmatswale wa gagwe a tšwago go yona gomme a šoma ka thata gore a mo hlokomele.—Ruthe 1:16; 2:2, 17, 18, 23.

• Pele ga ge Jesu a ka hwa, o ile a nyaka motho gore a šale a hlokomela mmagwe yoo ka nako yeo e lego mohlologadi.—Johane 19:26, 27.a

Ke dikeletšo dife tša ka Beibeleng tšeo di ka re thušago gore re hlokomele batswadi ba rena bao ba tšofetšego?

Beibele e na le melao ya motheo yeo e ka re thušago gore re hlokomele batswadi ba rena bao ba tšofetšego ga e šita le ge ka dinako tše dingwe re ikwa re lapile.

• Godiša batswadi ba gago.

  Seo Beibele e se bolelago: “Godiša tatago le mmago.”—Ekisodo 20:12.

  Re ka diriša bjang molao wa motheo wo wa Beibele? Bontšha gore o godiša batswadi ba gago ka go ba dumelela gore ba ikgethele go dira seo ba nyakago go se dira. Ge e ba go kgonega ba tlogele gore ba itirele phetho ya gore ba nyaka go hlokomelwa bjang. Le gona bontšha gore o a ba hlompha ka gore o dire sohle seo o ka se kgonago gore o ba thuše.

• Eba yo a kwešišago le yo a lebalelago.

  Seo Beibele e se bolelago: “Temogo ya motho e fokotša bogale bja gagwe gomme go botse ge a sa latišiše molato.”—Diema 19:11.

  Re ka diriša bjang molao wa motheo wo wa Beibele? Ge motswadi yo a tšofetšego a ka bolela selo seo se sa kgahlišego goba a bontšha okare ga a leboge ipotšiše gore, ‘Ke be ke tlo ikwa bjang ge ke be ke le boemong bjo a lego go bjona?’ Ge o ka leka go mo kwešiša le go mo lebalela o ka dira gore boemo bo seke bja mpefala le go feta.

• Kgopela ba bangwe gore ba go thuše.

  Seo Beibele e se bolelago: “Maano a a fela ge batho ba sa ntšhetšane sa mafahleng, eupša taba e a atlega mo go nago le baeletši ba bantši.”—Diema 15:22.

  Re ka diriša bjang molao motheo wo wa Beibele? Dira nyakišišo ya kamoo o ka thušago motswadi wa gago gore a kgone go lebeletšana le bolwetši bjo a ka bago a na le bjona. Nyaka dilo tšeo di ka go thušago gore o kgone go hlokomela motswadi wa gago yo a tšofetšego lefelong la geno. Boledišana le batho bao ba hlokometšego batswadi ba bona bao ba tšofetšego gore ba go thuše. Ge e ba o na le bana beno, dira gore le kopane gomme le boledišane gore le ka thušana bjang gore le hlokomele batswadi ba lena bao ba tšofetšego.

  

• Ikokobetše.

  Seo Beibele e se bolelago: “Bohlale ke bja baipoetši.”—Diema 11:2.

  Re ka diriša bjang molao wa motheo wo wa Beibele? Dira dilo tšeo o di kgonago feela. Ka mohlala, motho yo mongwe le yo mongwe go na le dilo tšeo a ka se kgonego go di dira. Ge o tseba dilo tšeo o kgonago go di dira le tšeo o sa kgonego go di dira, seo se tlo go thuša go bona gore o ka kgona go hlokomela batswadi ba gago go fihla kae. Ge e ba o bona mošomo wo o le o montši kudu, nyaka thušo ka lapeng goba go batho bao ba ithutetšego mošomo wo.

• Itlhokomele.

  Seo Beibele e se bolelago: “Ga go na motho yo a kilego a hloya mmele wa gagwe; eupša o a o fepa le go o babalela.”—Baefeso 5:29.

  Re ka diriša bjang molao motheo wo wa Beibele? Ge e ba o hlokomela batswadi ba gago bao ba tšofetšego le wena o swanetše gore o itlhokomele o be o hlokomele le lapa la gago ge e ba o nyetše goba o nyetšwe. O swanetše go ja dijo tšeo di nago le phepo. Le gona o swanetše go robala ka mo go lekanego. (Mmoledi 4:6) Ge e ba go kgonega o swanetše go fela o khutša. Ge e ba o dira bjalo, o tlo hlokomela batswadi ba gago gabotse o sa gateletšege.

Na Beibele e re batswadi bao ba tšofetšego ba swanetše go hlokomelwa ka gae?

Beibele ga e re botše ge e ba bana bao ba godilego ba swanetše go hlokomela batswadi ba bona ka gae. Malapa a mangwe a kgetha go hlokomela batswadi ba bona ka gae ge e ba go kgonega. Ka dinako tše dingwe, bana bao ba šetšego ba godile ba ka kgetha go iša batswadi ba bona bao ba tšofetšego lefelong leo go hlokomelwago batšofadi. Lapa le ka boledišana gore le tšee phetho yeo e tlago go kgotsofatša yo mongwe le yo mongwe.—Bagalatia 6:4, 5.