Na Jehofa o Araba Dithapelo tša Rena?

1-2. Ke ka baka la eng re ka bona eka Jehofa ga a arabe dithapelo tša rena?

“THABELA Jehofa kudu, gomme yena o tla go nea tše pelo ya gago e di kgopelago.” (Ps. 37:4) A tshepišo e kgahlišago gakaaka! Eupša na re ka letela gore Jehofa a re nee dilo tšeo re mo kgopelago tšona le semeetseng? Ke ka baka la eng potšišo ye e le bohlokwa? Nagana ka mehlala e latelago. Kgaetšedi yo a sego lenyalong o rapelela gore a kgone go ya Sekolong sa Baebangedi ba Mmušo. Eupša mengwaga e mentšhi e a feta a sa hwetše taletšo ya go ya sekolong. Ngwanabo rena wa moswa o rapela Jehofa gore a mo thuše go kaonefala bolwetšing bjo bo mo tshwenyago gore a kgone go thuša kamoo go oketšegilego ka phuthegong. Eupša ga a kaonefale. Batswadi ba Bakriste ba rapelela gore ngwana wa bona a dule a hlankela Jehofa. Eupša ngwana yoo o kgetha go tlogela go hlankela Jehofa.

² Mohlomongwe le wena go na le seo o se kgopetšego Jehofa eupša ga se wa se hwetša. Ka baka la seo, o ka phetha ka gore Jehofa o araba dithapelo tša batho ba bangwe eupša e sego tša gago. Goba o ka nagana gore go na le phošo yeo o e dirilego. Kgaetšedi yo a bitšwago Janiceb le yena o ile a ikwa ka tsela yeo. Yena le monna wa gagwe ba ile ba rapela Jehofa ka gobane ba be ba nyaka go hlankela Bethele. O re: “Ke be ke kgodišegile gore go se gokae re tla ba re le Bethele.” Eupša go ile gwa feta mengwaga e mentšhi go sa direge selo. Janice o re: “Ke be ke be ke nyamile e bile ke gakanegile. Ke ile ka ipotšiša gore nka ba ke dirile’ng go nyamiša Jehofa. Ke rapetše kudu ka taba ya go ya Bethele, ke ka baka la eng Jehofa a se a araba thapelo ya ka?”

3. Re tlo boledišana ka eng sehlogong se?

³ Ka dinako tše dingwe re ka ipotšiša ge e ba Jehofa a theetša dithapelo tša rena. Le banna ba kgale bao ba bego ba botegela Jehofa ba ile ba ipotšiša potšišo yeo. (Jobo 30:20; Ps. 22:2; Habak. 1:2) Ke eng seo se ka go kgodišago gore Jehofa o tlo araba dithapelo tša gago? (Ps. 65:2) E le gore re hwetše karabo ya potšišo yeo, a re thomeng ka go araba dipotšišo tše di latelago: (1) Re nyaka gore Jehofa a re direle eng? (2) Jehofa o letetše gore re dire eng? (3) Ke ka baka la’ng go ka nyakega gore re fetole dilo tšeo re di rapelelago?

RE NYAKA GORE JEHOFA A RE DIRELE ENG?

4. Ke eng seo Jehofa a tshepišitšego go se dira go Jeremia 29:12?

⁴ Jehofa o re holofetša gore o tlo theetša dithapelo tša rena. (Bala Jeremia 29:12.) Modimo wa rena o a re rata ka gobane re mo hlankela ka go botega, le gona o tlo dula a theetša dithapelo tša rena. (Ps. 10:17; 37:28) Eupša seo ga se bolele gore o tla re nea dilo ka moka tšeo re di kgopelago. Re ka swanelwa ke go letela lefase le leswa pele re ka hwetša tše dingwe tša dilo tšeo re di rapeletšego.

5. Jehofa o nagana ka eng ge a dutše a theeditše dithapelo tša rena? Hlalosa.

⁵ Jehofa o nagana ka morero wa gagwe ge a theetša dithapelo tša rena. (Jes. 55:​8, 9) O mongwe wa merero ya gagwe ke go tlatša lefase ka banna le basadi bao ba thabelago go bušwa ke yena. Eupša Sathane o bolela gore batho ba ka kgona go ipuša (Gen. 3:​1-5) Jehofa o dumeletše batho gore ba ipuše e le go hlatsela gore seo Diabolo a se boletšego ke maaka a matala. Pušo ya batho ke yona e bakilego mathata a mantšhi ao re a bonago lehono. (Mmo. 8:9) Re a kwešiša gore Jehofa a ka se tloše mathata a ka moka gona bjale. Ge a ka dira bjalo, batho bao ba sa mo ratego ba ka bolela gore batho ba kgona go ipuša le go rarolla mathata ka moka ao ba nago le ona.

6. Ke ka baka la eng re ka kgodišega gore Jehofa o tlo dula a dira dilo ka lerato la ka toka?

⁶ Jehofa a ka araba dithapelo tše di swanago ka ditsela tše di fapanego. Ka mohlala, ge Kgoši Hesekia a be a babja o šoro, o ile a lopa Jehofa gore a mo thuše gore a fole. Jehofa o ile a araba thapelo yeo ya gagwe gomme a mo fodiša. (2 Dikg. 20:​1-6) Ka lehlakoreng le lengwe, ge moapostola Paulo a be a kgopela Jehofa o gore a tloše “mootlwa nameng” ya gagwe, Jehofa ga se a ka a o tloša. (2 Bakor. 12:​7-9) Nagana gape le ka mohlala wa baapostola ba babedi e lego Jakobo le Petro. Kgoši Heroda o be a nyaka go ba bolaya. Phuthego e ile ya rapelela Petro, mohlomongwe le Jakobo. Jakobo o ile a bolawa, eupša Petro a phološwa ka mohlolo. (Dit. 12:​1-11) Re ka ipotšiša gore, ‘Ke ka baka la eng Jehofa a phološitše Petro eupša a se phološe Jakobo?’ Beibele ga e re botše.c Se re ka kgodišegago ka sona ke gore ditsela tša Jehofa ka moka ‘ke tša toka.’ (Doit. 32:4) Le gona re a tseba gore Petro le Jakobo ba be ba amogelwa ke Jehofa. (Kut. 21:14) Ka dinako tše dingwe Jehofa a ka no se arabe dithapelo tša rena ka tsela yeo re letetšego ka yona. Eupša ka ge re tseba gore Jehofa o dira dilo ka toka le ka botho, ga re ngongorege ge a araba dithapelo tša rena ka tsela yeo re sa e letelago.—Jobo 33:13.

7. Re leka go phema eng, gona ka baka la eng?

⁷ Re phema go bapetša maemo a rena le a batho ba bangwe. Ka mohlala, re ka kgopela Jehofa gore a re thuše ka selo se itšego eupša a se arabe kgopelo yeo ya rena. Ka morago re ka kwa gore motho yo mongwe o dirile kgopelo e swanago gomme Jehofa a mo araba. Kgaetšedi yo a bitšwago Anna o ile a ba boemong bjo bjalo. O ile a rapelela gore monna wa gagwe e lego Matthew a fole bolwetšing bja gagwe bja kankere. Ka nako e swanago, dikgaetšedi tše pedi tšeo di godilego le tšona di be di na le bolwetši bja kankere. Anna o ile a rapelela monna wa gagwe le dikgaetšedi tšeo. Dikgaetšedi tšeo di ile tša fola eupša monna wa gagwe a hlokofala. Anna o ile a ipotšiša ge e ba dikgaetšedi tšeo di fodile ka gobane Jehofa a di thušitše goba bjang. Le gona, ge e ba go le bjalo, ke ka baka la’ng Jehofa a se a araba thapelo ya gagwe ya gore monna wa gagwe a fole? Ga re tsebe gore dikgaetšedi tšeo di fodile bjang. Eupša seo re se tsebago ke gore Jehofa o tlo fediša tlaišego ka moka ya batho e bile o fela pelo ya go tsoša bagwera ba gagwe bao ba hlokofetšego.—Jobo 14:15.

8. (a) Go ya ka Jesaya 43:​2, Jehofa o re thekga bjang? (b) Go rapela go ka re thuša bjang ge re kopana le mathata? (Bogela bidio yeo e rego, Thapelo e re Thuša go Kgotlelela Mathata.)

⁸ Jehofa o tlo dula a re thekga. Jehofa ga a rate go re bona re ekwa bohloko ka ge e le Tatago rena yo lerato. (Jes. 63:9) Le ga go le bjalo, a ka se thibele mathata a rena ka moka ao a ka swantšhwago le dinoka goba mollo. (Bala Jesaya 43:2.) Eupša o re tshepiša gore o tla re thuša go a “phatša.” Go sa šetšwe mathata ao re nago le ona gona bjale, o a re kgonthišetša gore go a kgonega gore re mo hlankele. Jehofa o re nea le moya wa gagwe o mokgethwa gore o re thuše go kgotlelela. (Luka 11:13; Bafil. 4:13) Ka gona, re ka kgodišega gore re tlo dula re na le seo re se hlokago gore re kgone go kgotlelela, re mo hlankele le go dula re mmotegela.d

JEHOFA O LETETŠE GORE RE DIRE ENG?

9. Go ya ka Jakobo 1:​6, 7, ke ka baka la eng re swanetše go tshepa gore Jehofa o tlo re thuša?

⁹ Jehofa o letetše gore re mo tshepe. (Baheb. 11:6) Ka dinako tše dingwe re ka ikhwetša re imelwa ke mathata ao re nago le ona. Re ka thoma le go belaela ge e ba Jehofa a tla re thuša. Eupša Beibele e re kgonthišetša gore ge e ba Jehofa a re nea matla, re ka kgona go “namela morako.” (Ps. 18:29) Ka gona, go e na le go dula re belaela, re ka rapela Jehofa re na le tumelo re tshepa gore Jehofa o tla araba dithapelo tša rena.—Bala Jakobo 1: 6, 7.

10. Nea mohlala woo o bontšhago gore re swanetše go phela ka go dumelelana le dilo tšeo re di rapelelago.

¹⁰ Jehofa o letetše gore re dire dilo ka go dumelelana le dithapelo tša rena. Ka mohlala, ngwanabo rena a ka kgopela Jehofa gore a mo thuše gore a kgone go ya kopanong go e na le go ya mošomong. Jehofa a ka araba bjang thapelo yeo? A ka nea ngwanabo rena sebete sa gore a ye go kgopela mongmošomo wa gagwe gore a se ke a šoma ka letšatši la go ya kopanong. Eupša ngwanabo rena o swanetše go ya go mongmošomo gomme boledišane le yena. A ka swanelwa ke go mo kgopela gantšhintšhi. A ka ba a kgopela gore a šomele motho yo mongwe ka letšatši le lengwe leo le fapanego. Le gona, ge e ba go nyakega, a ka ba a kgopela gore a se ke a patelwa letšatši leo a sego a šoma ka lona.

11. Ke ka baka la eng re swanetše go dula re rapela ka mathata a rena?

¹¹ Jehofa o letetše gore re dule re mo rapela. (1 Bathes. 5:17) Re kgona go bona mantšung a Jesu gore dilo tše dingwe tšeo re di rapelelago di ka se phethagale le semeetseng. (Luka 11:9) Ka gona o se ke wa fela matla! Rapela Jehofa ka mehla go tšwa pelong. (Luka 18:​1-7) Ge re dula re rapela Jehofa gore a re thuše ka selo se itšego, re mmontšha gore selo seo re se rapelelago se tloga se le bohlokwa go rena. E bile re mmontšha gore re na le tumelo le gore re tshepa gore o tla re thuša.

KE KA BAKA LA ENG GO KA NYAKEGA GORE RE FETOŠE DILO TŠE DINGWE TŠEO RE DI RAPELELAGO?

12. (a) Ke potšišo efe yeo re swanetšego go ipotšiša yona mabapi le dilo tšeo re di kgopelago ge re rapela, gona ka baka la eng? (b) Re ka kgonthišetša bjang gore re hlompha Jehofa ge re mo rapela? (Bona lepokisi leo le rego: “Na Dilo Tšeo ke di Kgopelago di Bontšha Gore ke Hlompha Jehofa?”)

¹² Ge e ba re sa hwetše dilo tšeo re di rapelelago, re ka ipotšiša dipotšišo tše tše tharo. Potšišo ya pele e ka ba ya gore, ‘Na ke rapelela dilo tša maleba?’ Gantšhi re nagana gore re tseba dilo tšeo di re loketšego. Eupša dilo tšeo re di kgopelago di ka no se re hole. Ge e ba re rapelela bothata bjo itšego, o ka hwetša go na le tharollo e kaone kudu go feta yeo rena re e rapelelago. E bile dilo tše dingwe tšeo re di rapelelago, di ka no se sepedišane le thato ya Jehofa. (1 Joh. 5:14) Ka mohlala, nagana ka batswadi bao re boletšego ka bona pejana. Ba kgopetše Jehofa gore a dire gore ngwana wa bona a dule a mo hlankela. Yeo e bonagala e le kgopelo ya maleba. Eupša Jehofa a ka se tsoge a re gapeleditše gore re mo hlankele. O nyaka gore ka moka ga rena, go akaretša le bana ba rena, re kgethe go mo hlankela. (Doit. 10:​12, 13; 30:​19, 20) Ka gona, batswadi ba ka kgopela Jehofa gore a ba thuše gore ba rute ngwana wa bona ka yena le gore yena a feleletše a e ba mogwera wa gagwe le go mo hlankela.—Die. 22:6; Baef. 6:4.

13. Go ya ka Baheberu 4:​16, Jehofa o tlo re thuša neng? Hlalosa.

¹³ Potšišo ya bobedi e ka ba ya gore, ‘Na ke nako ya maleba ya gore Jehofa a arabe thapelo ya ka?’ Re ka ikwa eka go nyakega gore dithapelo tša rena di arabje ka pelapela. Jehofa o tloga a tseba nako ya maleba ya go re thuša. (Bala Baheberu 4:16.) Ge e ba re sa hwetše selo seo re se rapelelago le semeetseng, re ka nagana gore Jehofa ga a nyake go araba dithapelo tša rena. Eupša go ka direga gore ga se ya hlwa e e ba nako ya gore a re arabe. Ka mohlala, nagana ka ngwanabo rena yola wa moswa yo a bego a kgopela Jehofa gore a mo kaonefatše. Ge nkabe Jehofa a mo fodiše ka mohlolo, Sathane o be a ka bolela gore ngwanabo rena o hlankela Jehofa feela ka gobane a mo fodišitše. (Jobo 1:​9-11; 2:4) Go oketša moo, Jehofa o šetše a na le nako yeo a e beilego ya go tlo fodiša malwetši ka moka. (Jes. 33:24; Kut. 21:​3, 4) Ka baka leo, re ka se letele gore a no re fodiša ka mohlolo gona bjale. Ka gona, ngwanabo rena a ka kgopela Jehofa gore a mo nee matla le khutšo ya monagano gore a kgone go kgotlelela bolwetši ba gagwe le gore a mo thuše gore a dule a mo hlankela ka go botega.—Ps. 29:11.

14. Phihlelo ya kgaetšedi Janice e go ruta’ng?

¹⁴ Nagana ka phihlelo ya kgaetšedi Janice, yo a bego a rapelela go hlankela Bethele. Go mo tšere mengwaga e mehlano gore a kwešiše tsela yeo Jehofa a arabilego thapelo ya gagwe ka yona. O re: “Jehofa o ile a diriša nako yeo gore a nthute le gore a nthuše gore ke be Mokriste yo mokaone. Ke be ke swanetše go mo tshepa kudu. Ke ile ka swanelwa le ke go kaonefatša thuto ya motho ka noši. Le gona, ke ile ka ithuta gore ke thabele go hlankela Jehofa go gongwe le go gongwe mo ke lego gona.” Ka morago, Janice le monna wa gagwe ba ile ba kgethwa gore ba hlankele e le balebeledi ba tikologo. Ka morago ga gore kgaetšedi Janice a naganišiše ka dilo tše ka moka, o re: “Jehofa o arabile dithapelo tša ka, eupša e sego ka tsela yeo ke bego ke letetše ka yona. Go ntšere nako e telele pele nka bona kamoo Jehofa a arabilego thapelo ya ka le go bona mpho e botse yeo a nneilego yona. Ke leboga gore o nneile sebaka sa gore ke bone lerato la gagwe le botho bja gagwe.”

15. Ke ka baka la eng ka dinako tše dingwe go ka nyakega gore re se ke ra bolela dilo ka go lebanya ge re rapela? (Bona le diswantšho)

¹⁵ Potšišo ya boraro e ka ba ya gore, ‘Na ke swanetše go rapelela selo se sengwe?’ Go bohlokwa gore ge re rapela, re bolele ka go lebanya dilo tše re di rapelelago. Eupša ka dinako tše dingwe go ka nyakega gore re se ke ra di bolela ka go lebanya e le gore re kgone go tseba seo Jehofa a re nyakelago sona. Nagana ka mohlala wa kgaetšedi yo a sego lenyalong yo a bego a rapelela gore a ye Sekolong sa Baebangedi ba Mmušo. O nyaka go ya sekolong seo gore a kgone go ya mo go nyakegago bagoeledi ba oketšegilego. Ge a dutše a rapelela gore a laletšwe moo sekolong, a ka kgopela Jehofa gore a mo thuše go bona le dilo tše dingwe tšeo a ka di dirago go oketša tirelo ya gagwe. (Dit. 16:​9, 10) Ke moka a ka dira dilo ka go dumelelana le thapelo yeo ya gagwe ka go boledišana le molebeledi wa tikologo gomme a mmotšiša ge e ba go na le phuthego ye e hlokago babulamadibogo ba oketšegilego. Goba a ka ngwalela ofisi ya lekala gomme a botšiša gore ke kae moo go nago le tlhokagalo ya bagoeledi ba Mmušo.e

16. Re ka kgodišega ka eng?

¹⁶ Re ithutile gore Jehofa o araba dithapelo tša rena ka tsela e lerato le e botho. (Ps. 4:3; Jes. 30:18) Ka dinako tše dingwe re ka no hwetša karabo yeo re sa e letelago. Eupša Jehofa o theetša dithapelo tša rena ka mehla. O tloga a re rata. E bile a ka se tsoge a re lahlile. (Ps. 9:10) Ka gona tšwela pele o ‘mmota ka dinako tšohle,’ o mo tšhollela seo se lego pelong ya gago ka thapelo.—Ps. 62:8.